Rövnəq Abdullayevin kanalında kütləvi ixtisarlar başlayır

Azərbaycanda daha bir telekanalda ixtisarlar başlamaq üzrədir.

Ölkə.az-ın əldə etdiyi məlumata görə, yaxın günlərdə yeni fəaliyyətə başlamış CBC Sport telekanalında işçilərin kütləvi ixtisarı gözlənilir. Manatın devalvasiyaya uğraması teleşirkətə də təsirsiz ötüşməyib və rəhbərlik vəziyyətdən çıxış yolu kimi əməkdaşlarının bir qismiylə vidalaşacaq.

Qeyd edək ki, CBC Sport fəaliyyətə başladığı ilk aylarda bir sıra məşhur simaları digər telekanallardan yüksək maaş vədi ilə işə cəlb etmişdi. Hazırda həmin işçilərin aqibəti də qeyri-müəyyən olaraq qalır.

Xatırladaq ki, sözügedən telekanalın SOCAR prezidenti Rövnəq Abdullayevə məxsus olduğu deyilir.

İntiqam VALEHOĞLU
Ölkə.az