Xaricə pomidor ixrac edirik

Bu gün Ölkə.az saytında Milli Məclisin deputatı Zahid Orucun "Azərsun Holdinq"i "monopolist" adlandırması və digər fikirlərinə cavab olaraq holdinqin mətbuat xidməti redaksiyamıza məktub göndərib.

Mətbuatda qarşı tərəfin fikirlərini vermək etikasını göstərərək heç bir dəyişiklik etmədən həmin mətni təqdim edirik:

"Kütləvi İnformasiya vasitələrinin diqqətinə:
Bu gün mətbuatda millət vəkili Zahid Oruc bəzi qrupların təşviqi ilə Azərbaycanın mövcud iqtisadi vəziyyətində birləşdirici deyil, dağıdıcı mövqe nümayiş etdirərək iftiralara başlayıb. Xaricə pomidor ixrac edən "Azərsun Holdinq"i, Çindən tomat konsentratı gətirməkdə ittiham edərək, gülünc mövqe sərgiləyib. Buna inanan və şübhəsi olan hər kəs Azərbaycana Çindən tomat pastası gətirilib-gətirilməməsi barədə Dövlət Gömrük Komitəsindən məlumat ala bilər. Şirkətin bu çətin dönəmdə Azərbaycan xalqı və dövlətinə necə dəstək ola biləcəyini, böhrandan çıxış yollarını araşdırdığı bir zamanda, millət vəkilinin bu ali statusa yaraşmayan iftiralara başlaması təəssüf doğurur.

Minlərlə çeşiddə məhsul istehsal edən, on minlərlə iş yeri yaradan, yüz minlərlə insanın məşğulluğuna şərait yaradan bir qurumun da fəaliyyəti göz önündədir, Zahid Orucun da fəaliyyəti və həyat yolu.
Zahid Oruca bundan artıq cavab verməyə lüzum görmürük.

Hörmətlə,

Azərsun Holdinq Mətbuat Xidməti"

Ölkə.Az