Helium şarları liftdə partladı: Mütəxəssisdən XƏBƏRDARLIQ - VİDEO

Ölkə.Az xəbər verir ki, fevralın 2-də baş verən hadisə zamanı liftə əlində balonlarla bir nəfərin daxil olduğu görünür. Saniyəyələr sonra isə liftdə partlayış baş verir.

Helium şarlarının təhlükəli olması barədə dəfələrlə xəbərdarlıq edilsə də, insanlar xüsusi günlərdə şarlarla olan dekorlara üstünlük verməkdən çəkinmirlər. Ölkəmizdə də helium şarların partlaması hadisəsi olsa da, təəssüf ki, zaman keçdikcə, bu, unudulur.

Mövzu ilə bağlı danışan sağlamlıq, əməyin təhlükəsizliyi və ətraf mühitin mühafizəsi üzrə ekspert Elsevər Hüseynli deyib ki, belə partlayışların bir neçə mümkün səbəbi var:

“Aşkar alov mənbəyi görünməsə belə, hidrogen olan balon lift kimi qapalı məkanda partlayış və yanğına səbəb ola bilər. Balonun səthinin sürtünməsi statik elektrik yarada bilər və bu, hidrogeni alışdıra bilər. Liftin elektrik sistemindən və ya metal hissələrdən çıxan çox kiçik bir qığılcım belə partlayışı başlada bilər.

Balon zədələnərsə və ya zəif nöqtədən partlayarsa, hidrogen sürətlə havaya qarışır və qapalı mühitdə alışa bilən qaz qarışığı yaradır”.

Mütəxəssis əlavə edib ki, bu cür hadisələr adətən tək səbəbdən yox, bir neçə risk faktorunun eyni anda üst-üstə düşməsi nəticəsində baş verir.

“Unutmayın, helium təhlükəsizdir, hidrogen isə yanıcı qazdır. Mənbəyi bilinməyən balonlar ciddi risk yarada bilər”, - deyə o əlavə edib.

Billurə