Təhlükəsizliyin memarı: Bakı yeni regional arxitektura formalaşır

 Bunu Ölkə.az-a açıqlamasında Milli Məclisin Təbii sərvətlər, energetika və ekologiya komitəsinin sədri  Sadiq Qurbanov deyib.

Onun sözlərinə görə, Cənubi Qafqaz uzun illər münaqişələr, risklər və geosiyasi rəqabət məkanı kimi tanınıb. “Lakin son illərdə regionun təhlükəsizlik gündəliyinin dəyişməsi müşahidə olunur. Bu transformasiyanın mərkəzində Azərbaycanın təşəbbüsləri dayanır.
Xartiyada ABŞ tərəfindən Azərbaycanın beynəlxalq sülhməramlı əməliyyatlara verdiyi töhfələrin xüsusi vurğulanması Bakının artıq regional sabitliyin təminatçısı kimi qəbul edildiyini göstərir. Bu, Azərbaycanın təhlükəsizlik siyasətinin beynəlxalq legitimliyini gücləndirən mühüm mesajdır”, - o vurğulayıb.

 Deputat əlavə edib ki,  sənəddə müdafiə və təhlükəsizlik sahəsində əməkdaşlığın genişləndirilməsi bir neçə istiqaməti əhatə edir:

“Müdafiə sənayesi məhsullarının satışı və əməkdaşlıq imkanları, təhlükəsizlik sahəsində yeni əməkdaşlıq mexanizmləri, birgə təhlükəsizlik təşəbbüslərinin genişləndirilməsidir. Bu, Azərbaycanın müdafiə potensialının güclənməsi və təhlükəsizlik sisteminə inteqrasiyası deməkdir.

Azərbaycan və ABŞ terrorizmə qarşı mübarizəni prioritet istiqamət kimi müəyyən edir. Bu əməkdaşlıq regional sabitliyin möhkəmlənməsi. transsərhəd təhlükələrin qarşısının alınması, beynəlxalq təhlükəsizlik sisteminə inteqrasiya baxımından mühüm əhəmiyyət daşıyır”.
Deputat onu da qeyd edib ki, müasir dövrdə təhlükəsizlik anlayışı yalnız hərbi sahə ilə məhdudlaşmır: “Xartiyada kibertəhlükəsizlik və mühüm infrastrukturun qorunması xüsusi vurğulanır. Bu isə Azərbaycanın rəqəmsal təhlükəsizlik sisteminin gücləndirilməsi istiqamətində yeni mərhələnin başlanğıcıdır.

Azərbaycanın mina problemi beynəlxalq səviyyədə qəbul olunur. ABŞ-la bu sahədə əməkdaşlıq işğaldan azad olunmuş ərazilərin bərpasını sürətləndirir, humanitar təhlükəsizlik məsələlərini ön plana çıxarır və regionda sabitliyin möhkəmlənməsinə xidmət edir.
Xartiyanın ən mühüm bəndlərindən biri əməkdaşlığın institusional çərçivəsinin yaradılmasıdır. Müxtəlif sahələr üzrə işçi qruplarının yaradılması və yol xəritələrinin hazırlanması tərəfdaşlığın sistemli və uzunmüddətli xarakter daşıdığını göstərir.
Bu model əməkdaşlığı davamlı edir, konkret layihələrin həyata keçirilməsini təmin edir, Bakı–Vaşinqton əlaqələrini strateji səviyyəyə yüksəldir”.

Mürtəza