Tələbələr arasında “Atıcılıq turniri” keçirildi

"Güllə Atıcılığı" idman növü üzrə 40 tələbə universitetləri üçün yarışıblar

Ölkə.Az xəbər verir ki, Azərbaycan Respublikasının Prezidenti yanında Gənclər Fondunun VII qrant müsabiqəsi çərçivəsində maliyyələşdirdiyi, Azərbaycan Atıcılıq Federasiyası və Azərbaycan Velosiped İdmanı Federasiyasının tərəfdaş qismində iştirak etdiyi “Sağlam Universiada” layihəsinin ikinci turniri keçirilmişdir.

"Güllə Atıcılığı" idman növü üzrə keçirilən bu turnirdə 8 universitet komandası 1-ci, 2-ci və 3-cü yerlər üzrə yarışmışlar. 1-ci və 2-ci yerləri qazanan universitetlər velosiped turnirinə vəsiqə qazanmışlar.

1-ci yerə Dövlət İdarəçilik Akademiyası
2-ci yerə Azərbaycan Texniki Universiteti
3-cü yerə Azərbaycan Turizm və Menecment Universitetinin tələbələri layiq görülmüşdür.

Qaliblər “Sağlam Universiada” layihəsinin rəhbəri Şəbnəm Məhərrəmova, "Azəri Yurdu" Gənclər İctimai Birliyinin sədri Mirəli Mahmudov və Azərbaycan Atıcılıq Federasiyasının məşqçisi Elman Rzayev tərəfindən diplomlarla mükafatlandırılmışdır.

Qeyd edək ki, layihənin əsas məqsədi gənclərin asudə vaxtının səmərəli təşkilinə dəstək, onlar arasında sağlam həyat tərzinin təbliği, bir sıra idman növlərinin geniş şəkildə yayımlanmasına təkan vermək, onlarda idmana maraq yaratmaqdır.

Daha geniş məlumatla layihənin “Facebook”dakı “Universiada” səhifəsindən tanış ola bilərsiniz.

Ölkə.Az