\"Heroini belimə bağlamışdım\"

Ölkədə 18 kq-dan artıq narkotik vasitə dövriyyədən çıxarılıdı.

Ölkə.Az Region TV-yə istinadən xəbər verir ki, Cəlilabad rayon Polis şöbəsi əməkdaşlarının həyata keçirdikləri əməliyyat-axtarış tədbirləri nəticəsində, şəhər sakini Zülfüqar Nadirovdan 13 kiloqram 520 qram tiryək götürülüb.

Ucar RPŞ əməkdaşlarının həyata keçirdikləri əməliyyat-axtarış tədbirləri nəticəsində isə Ağcabədi rayon sakinləri, əvvəllər məhkum olunan Elxan Əsgərov və Ruslan Süleymanov 4 kiloqram 175 qram marixuananı satarkən tutulublar.

Nəsimi Rayon Polis İdarəsi əməkdaşları tərəfindən həyata keçirilən əməliyyat tədbirləri nəticəsində isə narkotik vasitələrin qanunsuz dövriyyəsi ilə məşğul olan İran İslam Respublikasının vətəndaşı Fəthi Qasım, Kürdəmir rayon sakini Hüseyn Xəlilov və Ağsu rayon sakini Nurlan Şirəliyev saxlanılıblar. İran vətəndaşının üzərindən Azərbaycana satış məqsədi ilə gətirdiyi 1 kiloqram 410 qram heroin aşkar edilərək götürülüb.

Fəthi Qasım - saxlanılan şəxs: "Heroini belimə bağladım, İrandan Azərbaycana gəldim, burada məni tutdular. Mənə 3000 pul verəcəkdilər İrandakı adamlar".

Hüseyn Xəlilov - saxlanılan şəxs: "Mənə iranlı zəng elədi ki, filan yerdə gözləyirəm. Görüşüb maşına oturan kimi, polislər tərəfindən saxlanıldıq".

Daha bir əməliyyat Suraxanı rayonunda həyata keçirilib. Rayon Polis İdarəsi 31-ci Polis Bölməsi əməkdaşlarının keçirdiyi əməliyyat-axtarış tədbirləri nəticəsində Bakı şəhər sakinləri, əvvəllər məhkum olunan 35 yaşlı Həmid Əliyevdən 1,21 qram, ona narkotik vasitəni satan 37 yaşlı Yaşar Əliyevin Yeni Suraxanı qəsəbəsi Çaparidze küçəsindəki evindən isə 36,5 qram heroin aşkar olunaraq götürülüb.

Faktlarla bağlı saxlanılan şəxslər barəsində Cinayət Məcəlləsinin müvafiq maddələri ilə cinayət işləri başlanılıb. 

Ölkə.Az