Zahid Oruc Oqtay Əsədovun ona dediyi \"sənin gələcək yerin görünür\" sözlərindən danışdı

Bu gün Milli Məclisin iclasında deputat Zahid Orucun parlamentdəki çıxışına spiker Oqtay Əsədov isə "sənin gələcək yerin görünür..."- replikası ilə cavab verib.

Bunu bir çox media qurumları spikerin deputata əsəbləşdiyi kimi dəyərləndirib.

Bununla bağlı Ölkə.Az-a açıqlama verən millət vəkili Zahid Oruc məsələnin heç də təqdim olunduğu kimi olmadığını bildirib:

"Spiker Oqtay Əsədov "Sənin gələcəkdə yerin görünür" deyəndə burada xoş ortamı nəzərdə tuturdu. Bu bir neçə deputat tərəfindən alqışla da qarşılandı. Sonra Oqtay Əsədov dediyi sözü açıq ifadə elədi. Əlavə müsbət fikirlər səsləndirdi. KİV-in yazdığı kimi əsəbləşmədi, əksinə oldu. O qədər mübahisə etmişik ki, camaatı inandırmaq mümkün deyil.

Sessiyada ölkə başçısının son günlər atdığı addımların iqtisadi sabitliyin təmin olunması üçün həllədici və mühüm xarakter daşıdığını bildirdik. Orada bildirdim ki, manat təkcə milli valyutamız deyil, təhlükəsizlik, sabitliyin göstəricisidir. Yəni, bu gün biz səngərdə dayanan əsgərimizin gücü ilə hərbi təhlükəsizliyimizi önləyə bilirik, diplomatik xəttimiz başqa bir məkanda öz maraqlarımızı qoruyur, ölkənin siyasi sistemi də hakimiyyətin idarə olunmasını təmin edir. Lakin, manat məsələsi sübut etdi ki, o bizim sinir sistemimizdir. Sabitliyimizin ən önəmli faktorlarından biridir. Şəxsi həyatımızı müəyyənləşdirən vasitədir. Mən bunları vurğuladım. Neft baha qiymətə olduğu dövrdə görülən böyük işlərdən danışdım ki, minlərlə qaçqının, məcburi köçkünün qəsəbələrə yerləşdirilməsi, şəhid ailələri ilə bağlı həyata keçirilən tədbirlər və s. Bakının "neft Bakısı" olması 100 illərdir formalaşıb. Bunun cazibəsinə kəndlərdən insanlarımız da gəlib, xarici şirkətlər də. Biz indi deyirik ki, neftdən kənar iqtisadiyyat formalaşsın. Bakıda kirayədə, ən ağır şərtlərdə yaşayan insanlar dözürlər. Onlar ekoloji təmiz olan kəndlərə, rayonlara qayıtmağa hazırdılarmı?

Aqil Abbas bir məhsul üzərindən fikir söyləmişdi, insanlar sosial şəbəkələrdə ona basqılar etdilər. Söhbət ondan gedir ki, vətəndaşlarımız neftdən kənar həyatını qurmağa qadirdir. Telefonlarımızdan, idarə etdiyimiz maşınlarımıza qədər, toy və yas mərasimlərimizin hamısı elə bil neftin mayasına batırılıb. Belə olan təqdirdə biz digər sahələri necə ayağa qaldırmalıyıq? Bundan ötrü 4 mühüm amil var:

1. Ölkənin coğrafiyasının qazanılması: Daşıma xidmətləri;
2. Kənd təsərüffatı: İnsanlarımızın oraya qayıdışı;
3. Texnologiya: Bizə yaxşı texnoloqlar lazımdır ki, qərbdən gətirdiyimiz texnoloji avadanlıqlardan istifadə edilə bilinsin. Rusiyadan fərqli olaraq biz sanksiyalar altında deyilik;
4. Menecmentlik: Menecment işinin təşkil edilməsi hazırda dünyanın ən önəmli amilidir.

Bu gün irəli sürülən qanun layihələrindən ən başlıcası əhalinin bütün əmanətləri sığortalanmasıdır. "Vahid Bank" sindromu olmayacaq. Bankda olan əmanətlər sığortalanacaq. Bu addım banklardan əmanətlərini çəkmək istəyənlərin qarşısını almaq üçün ən mühüm dövləti addımdır. Bütün bu təkliflərimdən sonra spiker Oqtay Əsədov dedi ki, hökumətdə yerin görünür. Bu xoş mənada söylənilən fikri başqaları necə qəbul edib, onu bilmirəm".

Zahid Oruc ona hökumətdə mühüm post, nazirlik verilsə qəbul edərmi sualına da aydınlıq gətirib:

"Hər halda biz parlament üzvüyük. Heç bir ambissiyalarımız, istəklərimiz olmayıb. Buna qədərki dövrdə bizi xarakterizə edən ən mühüm keyfiyyət bu olubdur. Ölkə rəhbəri tərəfindən hamının yeri müəyyənləşib. Bu günki parlement iclası da dövlət başçısının iradəsi ilə toplaşmışdı. Bu o dəmkdir ki, təkcə qanun qəbul etmək yox, cəmiyyətdəki panika mühitini də aradan qaldırmış oluruq. Əgər biz bu missiyanı yerinə yetirmiş oluruqsa hökumətin də, dövlətin də işinə kömək etmiş oluruq. Doğrusu məmur olmaq haqqında heç zaman düşünməmişəm".

Səxavət Məmməd
Ölkə.Az