XİN: Ermənistan KİV-də yayılan xəbərlər həqiqəti əks etdirmir
Azərbaycanın Ermənistan tərəfindən işğal olunmuş ərazilərində yaradılmış qondarma rejimin fermer və əkinçilərindən ibarət nümayəndə heyətinin 2015-ci ilin oktyabr ayında İrana səfəri və bu ölkənin rəsmiləri ilə görüşməsi barədə Ermənistan kütləvi informasiya vasitələrində məlumat verilib.
Ölkə.Az-ın məlumatına görə, bu barədə mətbuata açıqlama verən Azərbaycan Xarici İşlər Nazirliyinin (XİN) mətbuat xidmətinin rəhbəri Hikmət Hacıyev bildirib ki, bu məlumat XİN tərəfindən diplomatik kanallar vasitəsilə araşdırılıb.
"İranın Azərbaycandakı səfirliyindən Xarici İşlər Nazirliyinə ünvanlanmış cavab notasında qondarma rejimin fermer və əkinçilərindən ibarət nümayəndə heyətinin İrana səfəri və bu ölkənin rəsmiləri ilə görüşməsi barədə xəbərin həqiqəti əks etdirmədiyi bildirilib və Ermənistan KİV-də yayılan xəbərlər təkzib olunub” – deyə XİN sözçüsü qeyd edib.
