Azərbaycanlı merin qətlini sifariş verənin kimliyi məlum oldu

Ukrayna Daxili İşlər Nazirliyi Kremençuq şəhərinin azərbaycanlı meri Oleq Babayevin qətlinin sifarişçisinin “Vizit” teleşirkətinin direktoru olduğunu bildirib

Daxili işlər naziri Arsen Avakov sentyabrın 4-də açıqlama yayaraq bildirib ki, Oleq Babayevin qətlini təşkil edən cinayətkar qrupun daha bir iştirakçısı həbs olunub: “İfadələr və faktlar qətlin daha bir sifarişçisinin “Vizit” teleşirkətinin direktoru – Koval soyadlı biznesmenin olduğunu göstərir. Bu iş üzrə artıq 5 nəfər tutulub”.

Oleq Babayev bu il iyulun 26-da odlu silahla öldürülüb.

1965-ci il oktyabrın 21-də Rusiyanın Kursk şəhərində doğulan Oleq Babayevin atası azərbaycanlı, anası rusdur. O, 1986-cı ildə Minsk Hərbi Siyasi Məktəbini, 2000-ci ildə Kiyev Milli Universitetini bitirib. 1996-cı ilədək orduda qulluq edib. Həmin ildən bizneslə məşğul olub, 1998-ci ildən “Kremençuqmyaso” Açıq Səhmdar Cəmiyyətinə rəhbərlik edib. 2005-ci ildən “Vorskla” futbol klubunun prezidenti idi. 2007-2010-cu illərdə Ukrayna Ali Radasının deputatı olub. Kremençuq meri postunu 2010-cu ilin noyabrından tutub./Mediaforum/

Ölkə.Az