Ərdoğanla Tokayev Cənubi Qafqazı, Bakı-Tbilsi-Ceyhanı, Xəzəri müzakirə edəcək 

Türkiyə Prezident Rəcəb Tayyib Ərdoğan bu gün  Qazaxıstanın paytaxtı Astanaya rəsmi səfər edəcək.

Ölkə.az xəbər verir ki, Qazaxıstan Prezidenti Kasım-Jomart Tokayevin dəvəti ilə  reallaşan  səfərdə iki qardaş ölkənin lideri siyasi münasibətlərlə yanaşı, enerji, nəqliyyat, ticarət və müdafiə sənayesi sahələrində yeni əməkdaşlıq  məsələlərini müzakirə edəcəklər. 
Qazaxıstanın Akorda Prezident Sarayından verilən açıqlamaya görə, Ərdoğan və Tokayev görüş zamanı "genişləndirilmiş strateji tərəfdaşlıq" səviyyəsinə qaldırılmış ikitərəfli münasibətlərin hazırkı vəziyyətini və gələcəyini qiymətləndirəcəklər.
Liderlər həmçinin Qazaxıstan-Türkiyə Yüksək Səviyyəli Strateji Əməkdaşlıq Şurasının 6-cı iclasına sədrlik edəcəklər.

Prezident Ərdoğanın Astanadakı danışıqları Rusiya-Ukrayna müharibəsindən sonra formalaşan yeni geosiyasi tarazlıqlar baxımından diqqətlə izlənilir. Xüsusilə Orta Asiya, Cənubi Qafqaz və Xəzər dənizi bölgəsində yeni ticarət və enerji marşrutları Türkiyə ilə Qazaxıstan arasında əməkdaşlığı daha da strateji edir.

Müzakirələrin Orta Dəhlizin inkişafı, Xəzər tranzit nəqliyyat layihələri, enerji təhlükəsizliyi, logistika əlaqələri və müdafiə sənayesi əməkdaşlığı kimi mövzulara yönəlməsi gözlənilir.
Məqsəd Çin ilə Avropa arasında alternativ ticarət yolu hesab edilən Orta Dəhlizdə Türkiyə ilə Qazaxıstan arasında koordinasiyanı artırmaq və Bakı-Tbilisi-Ceyhan boru kəməri ilə nəql edilən Qazaxıstan neftinin miqdarını artırmaqdır.

Ərdoğan və Tokayev mayın 15-də Qazaxıstanın Türküstan şəhərində keçiriləcək Türk Dövlətləri Təşkilatının (TDT) Dövlət Başçılarının Qeyri-rəsmi Zirvə Görüşü çərçivəsində yenidən görüşəcəklər.

Ekspertlərin fikrincə, Qazaxıstanın enerji resursları və tranzit ölkə statusu, Türkiyənin Avropa bazarına açılan logistika mərkəzi kimi rolu ilə birlikdə iki ölkəni regional miqyasda tamamlayıcı tərəfdaşlara çevirir.
Səfər son illərdə dərinləşən Ankara ilə Astana arasında strateji tərəfdaşlıqda yeni bir mərhələnin başlanğıcı kimi dəyərləndirilir.

 Mürtəza