Gənclər Rəsulzadəni belə xatırladılar
Bir qrup həvəskar gənc Azərbaycan Demokratik Cümhuriyyətinin banisi Məhəmməd Əmin Rəsulzadənin "Gənclərə xitabı" ilə bağlı videoçarx hazırlayıb.
Ölkə.Az saytı xəbər verir ki, videoçarxda gənclər M.Ə.Rəsulzadənin "Gənclərə xitabı"nı həm səslə, həm də işarət dili ilə ifadə ediblər. Layihənin ideya müəllifi Ayaz İlyasovdur, prodüsseri isə Rəşid Mustafazadədir.
Layihənin prodüsseri Rəşid Mustafazadə bildirib ki, videoçarx M.Ə.Rəsulzadənin qarşıdan gələn doğum günü münasibəti ilə hazırlanıb: "Bildiyiniz kimi yanvarın ayının 31-i M.Ə.Rəsulzadənin doğum günüdür. İdeyanı mənə ilk dəfə Ayaz İlyasov dedi. Razılaşdıq. İştirakçıları tapdıq, çəkiliş üçün məkanı seçdik. Nuranə Abıyeva da işarət dilini iştirakçılara öyrətməkdə bizə dəstək oldu. Birlikdə belə bir iş ərsəyə gətirdik. Məqsədimiz AXC dövründə dövlətçiliyimizin qurulması və möhkəmlənməsində müstəsna xidmətləri olan Məhəmməd Əmin Rəsulzadənin vaxtı ilə dediyi sözləri gənclərə daha maraqlı formada çatdırmaq və bununla tarixi şəxsiyyətimizi yaşatmaqdır".
Onun sözlərinə görə, videoda Məhəmməd Əmir Rəsulzadənin "Əsrimizin Səyavuşu" əsəri və 1953-ci il 28 May çıxışından istifadə olunub.
İdeya müəllifi Ayaz İlyasov qeyd edib ki, videoçarx hər hansı qurum, təşkilat, müəssisə, partiya, ictimai birlik, yaradıcılıq birliyinin təşkilatçılığı və maliyyə dəstəyi olmadan, fiziki şəxsin ideya və təşəbbüsü nəticəsində hazırlanıb: “Bu ideya ağlıma keçən ilin dekabrın 7-də gəldi. Fətəli xan Xoyskinin 140 illik yubileyinə təsadüf edən gün. Çoxları kimi mən də deyinməyə başladım ki, bu qədər tarixi önəmi olan şəxsin yubileyi münasibəti ilə heç kim heç nə etmir və s. və i. Sonra isə özümə “guya sən nə etmisən?” sualını verəndə cavab “heç nə” oldu. Beləliklə deyinməkdənsə, fəaliyyətin daha yaxşı olduğu fikrinə gəldim. Səhərisi gün bu ideyanı Rəşid Mustafazadəyə dedim. Çox sağ olsun, elə həmin an “edək” dedi. Və bununla da hazırlıqlarımız, iştirakçılar və digər texniki məsələlərlə əlaqədar işlərimiz başladı. Nəticədə hazırda gördüyünüz videoçarx yarandı”.
Qeyd edək ki, Türkiyədə siravi vətəndaşlarla məşhur simalar da birlikdə Atatürkün "Gənclərə xitab"ı ilə bağlı belə bir videoçarx hazırlamışdılar.
