İran “Nabucco” ilə Avropaya qaz verməyə hazırdır

İranın neft nazirinin müavini Əli Məcidi Tehranın “Nabucco” kəməri vasitəsilə Avropaya qaz verməyə hazır olduğunu bəyan edib

Nazir müavininin sözlərinə görə, İran bu yolla Avropanın qaza olan ehtiyacının bir hissəsini təmin edə bilər. O qeyd edib ki, yaxınlarda Avropadan İrana gələn iki nümayəndə heyəti ilə bu qitəyə İran qazının çatdırılması üçün müxtəlif variantlar müzakirə olunub. Nazir müavininin fikrincə, Tehrana qarşı birtərəfli sanksiyalar zəifləyəndən sonra İran və avropalı tərəfdaşlar problemin həlli yollarını müəyyən edə bilərlər. Onun sözlərinə görə, İran qazının ixracı Türkiyə, İraq, Suriya, Qafqaz regionu, eləcə də Qara dəniz vasitəsilə həyata keçirilə bilər. Nazir müavini onu da vurğulayıb ki, Türkiyə vasitəsilə qazın nəqli daha optimal variantdır.  

Qeyd edək ki, Rusiyadan yan keçməklə Orta Asiya və Azərbaycanın enerji ehtiyatlarının Avropa İttifaqına nəqli üçün “Nabucco” magistral qaz kəmərinin tikintisi layihəsi müzakirə olunub. 2011-ci ildə tikintisinə başlanacaq bu kəmərin 2014-cü ildə başa çatdırılacağı planlaşdırılırdı. Ancaq layihənin reallaşdırılması bir sıra problemə görə hələ də sual altındadır.

Ölkə.Az