Qurban bayramında necə qidalanmaq lazımdır? – Mütəxəssislərdən vacib tövsiyələr

Qurban bayramı süfrələrinin vazkeçilməzi olan ət yeməkləri düzgün qidalanmadıqda həzm problemləri, təzyiq yüksəlməsi və mədə narahatlığına səbəb ola bilər. Xüsusilə bayram günlərində normadan artıq qidalanma sağlamlıq üçün risk yaradır. Mütəxəssislər isə bayramda həm sağlam, həm də balanslı qidalanmağın mümkün olduğunu bildirirlər.

Ölkə.az bildirir ki, yeni kəsilmiş ətin dərhal istehlakı məsləhət görülmür. Təzə ət həm daha sərt olur, həm də həzm sistemini yora bilər. Ətin ən azı bir neçə saat, mümkün olduqda isə 24 saat soyuducuda saxlanıldıqdan sonra bişirilməsi tövsiyə edilir.

Bayram süfrəsində qızartmalardan çox, qaynadılmış və ya sobada bişmiş yeməklərə üstünlük verilməsi daha faydalıdır. Yağlı ətlərin həddindən artıq qəbulu xolesterin və təzyiq problemi olan şəxslər üçün təhlükə yarada bilər.

Mütəxəssislər ətlə birlikdə bol göyərti, salat və tərəvəzlərin istehlakını vacib hesab edirlər. Bu həm həzmi asanlaşdırır, həm də orqanizmdə balans yaradır. Gün ərzində kifayət qədər su içmək də xüsusi önəm daşıyır.

Şirniyyat və qazlı içkilərin həddindən artıq istifadəsi isə bayram sonrası halsızlıq və həzm problemlərinə səbəb ola bilər. Xüsusilə uşaqlar və yaşlıların qidalanmasına diqqət yetirilməsi tövsiyə olunur.

Bayram günlərində az-az, amma tez-tez qidalanmaq, gec saatlarda ağır yeməklərdən uzaq durmaq sağlamlıq baxımından daha doğru seçimdir.

Həmidə İbrahimova