\"İcra hakimiyyəti orqanlarının saxlanılması xərcləri ciddi şəkildə azaldılmalıdır\"

Yenilənmiş dövlət büdcəsinin layihəsi prezidentə təqdim olunub

Maliyyə naziri Samir Şərifov bildirib ki, yenilənmiş dövlət büdcəsində neftin 1 barelinin baza qiyməti 25 dollardan götürülüb.

Bununla bağlı iqtisadçı ekspert Vüqar Bayramov Ölkə.Az-a danışıb:

"Neftin dünya bazarında qiymətinə uyğun olaraq dövlət büdcəsinə yenidən baxılmasına, dəyişikliyə ehtiyac var idi. Mövcud qiymət büdcədə nəzərdə tutulan qiymətlə eyni deyil və eyni olmadığı üçün bunun da büdcədə öz əksini tapmasına ehtiyac var. Təklif edirik ki, 2016-cı ilin dövlət büdcəsi sözün həqiqi mənasında anti-böhran büdcəsi olsun. 25 dollar indiki məqamda sığorta olunmuş rəqəmdir. Rusiyada və digər neft ölkələrində 30 dollar əsas qiymət kimi götürülüb və buna uyğun hesablamalar aparılır. 25 dollar daha çox sığorta olunmuşdur. Çünki neftin dünya bazarında qiymətinin 30 dollardan aşağı düşməsi ehtimalı daha yüksəkdir.

Büdcə anti-böhran büdcəsi olmalıdır. Büdcədə hökumət iki istiqamətə daha çox diqqət ayırmalı və digər istiqamətlərdə xərclərin azaldılmasına getməlidir. Onlardan biri sosial ayırmalardır ki, sosial istiqamətə ayrılan vəsaitlərin həcmini artırmağa ehtiyac var. 2016-cı ilin dövlət büdcəsində sosial istiqamətdə ayrılan vəsaitlərin həcmi 5.7 milyard manatdır. Onun 3.6 milyard manatı birbaşa əməyin ödənilməsi ilə bağlı xərclərdir. Biz hesab edirik ki, bu məbləğ artırılsın. Bu məbləğin artırılması ona görə vacibdir ki, hökumət 2016-cı ilin ortalarında yenidən əməkhaqqı və pensiyaların artırılmasına getsin. Çünki bizim qiymətləndirmələrimiz göstərirdi ki, indiki məqamda istehlak bazarında yaranan qiymət artımlarının təsirini minimumlaşdırmaq üçün sektorlardan asılı olaraq 25-30% qiymət artımlarına ehtiyac var. Artıq 10% əməkhaqqı artımları baş verib. Təbii ki, bu müsbət haldır. Bu prosesin davam etdirilməsinə ehtiyac var. Biz təklif edirik ki, hökumət 2016-cı ilin ortalarında yenidən əməkhaqqı və pensiyaların artırılması ilə bağlı qərar qəbul etsin.

İkinci istiqamət biznesin dəstəklənməsidir. Büdcə 2016-cı ildə kiçik və orta sahibkarlara yardım üçün güzəştli kreditlərin həcmini artırmalıdır və çalışmalıdır ki, daha çox güzəştli kreditlər vasitəsi ilə real sektorun dəstəklənməsini həyata keçirsin. Real sektora isti pulların daxil olmasına ehtiyac var. Təklif edirik ki, real sektora verilən güzəştli kreditlərin həcmi artırılsın. Nəticə etibarı ilə real sektorun canlanması üçün real zəmin yarana bilər. Kapital, infarstruktur və digər xərclərin ixtisar edilməsinin tərəfdarıyıq.

İcra hakimiyyəti orqanlarının saxlanması xərcləri ixtisar edilməlidir. İcra hakimiyyəti orqanlarının saxlanılması xərclərinin ciddi şəkildə ixtisarına ehtiyac var. Azərbaycanda 2016-cı ildə struktur dəyişikliləri həyata keçirməklə icra hakimiyyəti orqanlarının saxlama xərclərini ən azı 25% azaltmaq mümkündür. Ona görə də, struktur islahatları aparılmalıdır. Bu da öz əksini büdcədə tapmalıdır. Bütün hallarda büdcəyə dəyişiklik qaçılmazdır. Yeni büdcə anti-böhran büdcəsi olmalıdır".

Qeyd edək ki, 2016-cı ilin dövlət büdcəsində neftin 1 barelinin bazar qiyməti 50 dollardan götürülmüşdü.

Səxavət Məmməd
Ölkə.Az