İİB-nin Bakı toplantısı: Azərbaycan üçün strateji sıçrayış nöqtəsi

Bunu Ölkə.az-a açıqlamasında Milli Məclisin deputatı Kamran Bayramov deyib.

O bildirib ki, bu tədbir Azərbaycanın İslam dünyasındakı liderlik missiyasını və beynəlxalq nüfuzunu möhkəmləndirir. COP29-dan və WUF13-dən sonra Bakının belə bir elitar maliyyə sammitinə ev sahibliyi etməsi ölkəmizin qlobal iqtisadi və maliyyə idarəetməsində etibarlı tərəfdaş və mühüm bir mərkəz olduğunu yenidən sübut etdi. 57 üzv ölkənin nazirlərini, bank-maliyyə strukturlarının rəhbərlərini və özəl sektor nümayəndələrini bir araya gətirən bu toplantı ölkəmiz üçün iqtisadi divident və investisiya axınına əlverişli şərait yaratdı. Bu isə, Azərbaycanın Qarabağ və Şərqi Zəngəzur bölgələrinin “yaşıl enerji” zonasına çevrilməsi və "ağıllı şəhər" layihələrinin maliyyələşdirilməsi üçün alternativ, faizsiz və güzəştli investisiya mənbələri deməkdir.

Deputat əlavə edib ki, toplantının ən vacib məqamlarından biri də regional inteqrasiya və “Orta Dəhliz” layihəsinin gücləndirilməsidir. İslam İnkişaf Bankının bu toplantısı Cənubi Qafqazı Asiya ilə Avropa, eləcə də İslam dünyası arasında dayanıqlı bir logistika və enerji qovşağına çevirir. Regional enerji dəhlizlərinin qurulması, transsərhəd infrastruktur layihələrinin reallaşdırılması təkcə Azərbaycanın deyil, qonşu dövlətlərin və gələcəkdə regionun digər aktorlarının da iqtisadi təhlükəsizliyini təmin edəcək, ticarət əlaqələrinin şaxələndirəcək, yeni iş yerlərinin yaradılmasına yol açacaq.

K.Bayramov onu da qeyd edib ki, bu toplantı sadəcə bir neçə günlük müzakirə paneli deyil, İslam dünyasının nəhəng kapitalının Cənubi Qafqaza yönəldilməsi, regionda sabitliyin, dayanıqlı inkişafın və rifahın bərqərar olunması üçün strateji bir sıçrayış nöqtəsidir. Azərbaycan isə bu missiyanın mərkəzində durmağa və onu tam həcmdə reallaşdırmağa hazır olduğunu bir daha nümayiş etdirdi.

Mürtəza