Əbülfəs Qarayev, İlhamə və Aygün
Turizm və Turizm Nazirliyi. Qəribə səsləndi, deyilmi? Amma nə qədər qəribə də olsa, bu gün Mədəniyyət və Turizm Nazirliyi məhz Turizm və Turizm Nazirliyi funksiyasını yerinə yetirir. Şübhəsiz ki, istənilən iddianın fakta, sübuta ehtiyacı var. "Kaseti" bir az əvvələ "yığaq". Yayda "Azdrama"da, elə günü bu gün Mingəçevir Teatrında, ondan bir az əvvəl Gəncə teatrında baş verənləri xatırlayın. Hətta ağsaqqal adamlar bir-birinə yumruq atdılar. Elə indinin özündə də vəziyyət çox da dəyişməyib həmin teatrlarda. Bu, Zahid Oruc demişkən, müqəddimə hissəsi idi və deməliydim. İndi təzə "kaset"ə baxaq.
Üç gündür ki, xalq artistləri İlhamə Quliyeva ilə Aygün Kazımova bir-birinə olmazın sözlər deyirlər. Özü də bu ittihamlar, təhqirlər mətbuat vasitəsi ilə gedir. Yəni kimsə bu qadınlar arasındakı söz-söhbəti gizli şəkildə hardansa, kimdənsə eşidib yazmır. Əgər bu sənətçilərin heç bir titulu olmasaydı, fəxri ad daşımasaydılar, bir az başqa cür düşünmək olardı. Amma bir polis polkovniki hardasa cinayət törədirsə, kimisə təhqir edirsə, buna cavab verəcək ilk qurum Daxili İşlər Nazirliyidir. Çünki ortada paqon məsələsi var.
Mədəniyyətimizin "paqonları"nı daşıyan bu xanımlara kim cavabdehdir? Sizcə? Mədəniyyət və Turizm Nazirliyi. Cavabdeh ola bilirmi? Nazirlik rəsmisi Vüqar Şıxməmmədovun reaksiyasını diqqətinizə çatdırırq. Özünüz qərar verin:
“Bu barədə heç bir açıqlama vermək istəmirik. Mövzu ilə bağlı bir neçə mətbuat orqanı bizimlə əlaqə saxlayıb. Bizim mövqeyimiz bəllidir, nazir hələ oktyabr ayında bu tipli suallara cavab vermişdi. Bizim heç bir cavabımız yoxdur”.
Bu da oktyabrda mədəniyyət və turizm naziri Əbülfəs Qarayevin cavabı:
“Mədəniyyət, incəsənət, şou-biznes cəmiyyətə açıq olan sahələrdir. İstər-istəməz burda gedən proseslər ictimaiyyətin diqqətinə çatır. Bu sahəni təmsil edən insanlar məsuliyyəti dərk etməlidirlər. Mədəniyyət sahəsini təmsil edən insanların davranışının inzibati yolla qarşısının alınması mümkün deyil. O insanlar həyatları, davranışları, cəmiyyətdəki sözləri ilə buna əməl etməlidirlər, öz nüfuzlarını saxlamalıdırlar. Onlar bilməlidirlər ki, hər bir söz və hərəkətləri cəmiyyətdə müəyyən əks-sadə doğuracaq. Mən kimə deyə bilərəm ki, vuruşmasın? Yenə deyirəm, burda inzibati tədbirdən söhbət gedə bilməz”.
Başa düşmədim, məgər təhsil cəmiyyətə qapalı sahədir? Bu nə biabırçı cavabdır. Anlaşılandır. İyirmi ildir naziri olduğu ölkənin ana dilini öyrənə bilməyən nazir bəlkə də başqa cür demək istəyib. Amma jurnalistlər düz "perevod" eləməyiblər.
Belə yerdə deyiblər ki, elçisi gülüm olanın başına külüm olur. Nazir belə deyirsə, hələ o biri manıslar sağ olsunlar ki, bir-birini duelə çağırmırlar.
Baş redaktordan
Ölkə.az
