Zakir Fərəcov keçmiş deputatı 8 saat DYP-də saxlatdırdı
Bir neçə gün öncə sabiq millət vəkili Nizami İsgəndərovun şəxsi avtomobili Sumqayıt Şəhər Yol Polisi tərəfindən saxlanılaraq cərimə meydançasına aparılıb.
Ölkə.Az vətəninfo-ya istinadən bildirir ki, polis avtomobili saxlayan zaman avtomobili sürücü idarə edirmiş və sabiq millət vəkili avtomobildə olmayıb.
Məlumata görə, sabiq millət vəkili hadisə ilə bağlı Sumqayıt şəhər Yol Polis İdarəsinə gedib və avtomobilinin saxlanılmasının səbəbini öyrənməyə çalışıb. Sumqayıt şəhər DYP-dən bildiriblər ki, avtomobilin cəriməsi var, ödənilməyib.
Belə olduqda, millət vəkili də avtomobilinin cəriməsi olmadığı ilə bağlı sənəd təqdim edib. Bundan sonra ikinci bir bəhanə ortaya atılıb. Bu dəfə isə sabiq millət vəkilinə "Avtomobilinin sənədləri qaydasında deyil" deyilib. Mənbə bildirir ki, Nizami İsgəndərov avtomobilin bütün sənədlərini göstərib və sənədlərin qaydasında olduğunu sübut edib və avtomobilinin qeyri-qanuni olaraq saxlanıldığını bildirərək, avtomobilin cərimə meydançasından buraxılmasını tələb edib.
Belə olduqda isə Sumqayıt şəhər DYP-nin əməkdaşları avtomobilin cərimə meydançasından buraxılması üçün müvafiq şəxsin imza atmalı olduğunu bildiriblər. Həmin DYP əməkdaşı isə nə az, nə çox, düz 8 saat Sumqayıt şəhər DYP-nə gəlməyib və Nizami İsgəndərov gecə saat 22:00-da avtomobilini cərimə meydançasından çıxara bilib.
Məlumatlı mənbə bildirir ki, sabiq millət vəkilinin başına gələn bu hadisə sifarişli olub və belə bir oyunun qurulması Sumqayıt şəhər DYP-dən istənilib.
Qeyd edək ki, Nizami İsgəndərov iş adamı "Univermaq Zaman" kimi tanınan Zaman İsgəndərovun oğludur.
