\"Planet Parni iz Baku\" millimizi aşağıladı

 

Ölkə.Az sportnet.az-a istinadən xəbər verir ki, yenicə yayılan "Hamı Avroppalara" adlı konsertin tam videosunda yığmamız "Çolaqlar" adlandırılıb. 

 

Belə təqdimat konsertin əvvəlində ölkəmizin avropalılara əlifba sırası ilə tanıdılması zamanı edilib. Heydər Əliyev adına Respublika Sarayında minlərlə tamaşaçı qarşısındakı səhnədə növbə Ç hərfinə çatanda millimizin üzərinə "Çolaqlar" sözü yazılmış oyunöncəsi kollektiv fotosu nümayiş etdirilib. Bu təqdimat tamaşaçıların uğultulu gülüşləri ilə qarşılanıb. 

 

Sportnet.az-ın kiçik araşdırması nəticəsində məlum olub ki, foto DÇ-2014-ün seçmə qrup mərhələsi çərçivəsində 2013-cü il oktyabrın 15-də "Bakcell Arena"da keçirilmiş Azərbaycan - Rusiya matçından əvvəl çəkilib. Fotoda bu futbolçular yer alıb (soldan sağa):

 

Mahir Şükürov (klubsuzdur), Kamran Ağayev (hazırda "İnter"dədir), Rəşad Sadıqov ("Qarabağ"), Rüfət Dadaşov (Almaniya Regional Liqası, "Halberştadt"), Rauf Əliyev ("İnter"), Volodimir Levin (karyerasını bitirib), Maksim Medvedev ("Qarabağ"), Ruslan Abışov ("Qəbələ"), Araz Abdullayev ("Neftçi"), Elnur Allahverdiyev (klubsuzdur), Əfran İsmayılov ("Qarabağ"). 

 

Qarşılaşma 1:1 hesablı heç-heçə ilə nəticələnib. Yığmamız 73-cü dəqiqədə Maksim Medvedevin meydandan qovulmasından sonra azlıqda qalmasına baxmayaraq, 90-cı dəqiqədə Vaqif Cavadovun qolu ilə bərabərliyə nail olub. Bu matçda millimiz təqdim olunduğu kimi, ələ düşən imkanları sağa-sola xərcləməyib. Əksinə, azsaylı qol imkanını oyuna sonradan daxil olan Cavadov baş zərbəsi ilə tamamlayıb. Digər tərəfdən, millimiz tarixi ərzində ən çox - 9 xalı məhz həmin seçmə tsikldə toplayıb və 6 komandalı qrupu 4-cü pillədə başa vurub. 

 

Qeyd edək ki, "Hamı Avroppalara" konserti AFFA İcraiyyə Komitəsinin sabiq üzvü, "Şöhrət" ordenli mərhum futbolçu Ələkbər Məmmədovun xatirəsinə həsr olunub.