MTN-in qalmaqallı agenti Moskvada həbs olundu

 Ləğv edilmiş Naxçıvan MTN-in əməkdaşı olmuş İbrahim Musayevin Moskvada həbs olunduğu barədə məlumat yayılıb.

Ölkə.Az APA-ya istinadən xəbər verir ki, Rusiya Daxili İşlər Nazirliyinin (DİN) saytında fevralın 10-da Rusiya hüquq-mühafizə orqanlarının Moskvada apardıqları əməliyyat axtarış tədbirləri nəticəsində 23 yaşlı şəxsin saxlanıldığı qeyd olunub.

O, Moskva regionunda bir sıra fırıldaqçılıq əməllərində təqsirli bilinir.

İlkin versiyaya görə, cinayətkar şəxs qadınların etimadını qazanaraq vahid sxem üzrə hərəkət edib: xüsusi xidmət orqanlarının əməkdaşı olduğunu deyib, bunun təsdiqi kimi "Makarov" tipli tapançasını onlara nümayiş etdirib. Daha sonra o qadınları 3 yaşlı qızı ilə tanış edib və uşaq üçün onlardan pul yardımı istəyib. Fırıldaq yolu ilə aldığı pulları isə mənimsəyib.

Hazırda o, nəzarət altında saxlanılır. Hüquq-mühafizə orqanlarının əməkdaşlı onu saxlayan vaxt yanında azyaşlı qız da olub.

Qız vətənindəki qohumlarına qaytarılması üçün tibbi-profilaktik mərkəzə göndərilib.

Qeyd edək ki, Rusiya DİN-in məlumatında saxlanan şəxsin Mərkəzi Asiya Respublikalarından birinin vətəndaşı olduğu, öz ölkəsinin ərazisində fırıldaqçılıqla məşğul olduğu üçün beynəlxalq axtarışa verildiyi əksini tapıb.

Məlumatda onun adı qeyd olunmasa da, fotodan belə anlaşılır ki, saxlanan şəxs İbrahim Musayevdir.

Saxlanıldığı kamerada sorğu-sual edilən 23 yaşlı şəxs də Azərbaycan MTN-in əməkdaşı olduğunu, Rusiyaya siyasi sığınacaq almaq məqsədilə qaçdığını deyib. Lakin o, arxası videokameraya tərəf olduğu üçün üzü görünmür.

Xatırladaq ki, İ. Musayev İran lehinə casusluqda ittiham olunmuş, sonradan Naxçıvan MTN həbsxanasında dünyasını dəyişən Turac Zeynalovun həyat yoldaşını qətlə yetirmək barədə tapşırıq aldığını, lakin bu tapşırığı yerinə yetirilməkdən imtina etdiyini bildirib.

Naxçıvan MTN isə bəyanat yayaraq, İ. Musayevlə heç bir əlaqəsi olmadığını qeyd edərək onun dələduz və fərarı olduğunu açıqlayıb. Naxçıvan MTN-in açıqlamasında T. Zeynalovun xərçəng xəstəliyindən vəfat etdiyi bildirilir. 2012-ci ilin sentyabrında İ. Musayev həyat yoldaşı ilə Rusiyaya gedərək, bu ölkədə qaçqın statusunu almağa cəhd göstərib. Lakin Rusiya müvafiq orqanları onun Azərbaycan tərəfindən axtarışa verildiyi əsas gətirərək, müraciəti rədd edib.

2013-cü ilin sentyabrında isə Rusiyanın Yaroslavl vilayət məhkəməsi İbrahim Musayev barədə qərar çıxarıb. Məhkəmə adı çəkilən şəxsin Azərbaycana ekstradisiyasına qərar verib. Məhkəmənin qərarından apellyasiya şikayəti verilib.