Türkiyədə prezidentlərin təhvil-təslim mərasimləri

Türkiyə parlamentində (TBMM) keçirilən andiçmə mərasimi zamanı frak geyinmək ənənəsini pozan ilk prezident Əhməd Necdət Sezər olmuşdu.

Ölkə.Az xəbər verir ki, prezidentlik vəzifəsini icra etdiyi müddət ərzində frak geyinməyən 10-cu prezident Sezərdən sonra 11-ci prezident Abdulla Güldə frak geyinməyən prezident kimi tarixə düşüb. 

Türkiyənin 12-ci prezident seçilən Rəcəb Tayyib Ərdoğanın dünən baş tutan andiçmə mərasimində də yeni prezident sadəcə kostyum və qalstuk geyinərək özündən öncəki iki sələfini təqib edib. 

Çankayadakı prezident iqamətgahında keçirilən təhvil-təslim mərasimləri 12 sentyabr 1980-ci ildən sonra hər bir prezident dövründə fərqli şəkildə həyata keçirilib. 7-ci prezident Kənan Evren vəzifəsini Turqut Özala təhvil verərkən sadəcə bir dəstə əsgər ilə balaca bir mərasim təşkil etdirmişdi. 8-ci prezident Turqut Özal prezidentlik dövründə həyatını itirdiyi üçün təhvil-təslim mərasimi keçirməmişdi. 9-cu prezident Süleyman Dəmirəl isə vəzifəsini A tipi (hərbi) mərasimlə təslim etmişdi. 10-cu prezident Sezər ümumiyyətlə Abdulla Gül üçün tədbir təşkil etməmişdi.

Qeyd edək ki, Türkiyə tarixində ən dəb-dəbəli təhvil-təslim tədbirini 11-ci prezident Abdulla Gül dünən 12-ci prezident Ərdoğan üçün təşkil etdi.

Ölkə.Az