Həftənin icmalı
Nazir: "İşsizlərin böyük qismi gənclərdir"
08.02.2016
"Hazırda işsizlərin böyük qismini gənclər təşkil edir".
Ölkə.Az "Report"a istinadən xəbər verir ki, bunu əmək və əhalinin sosial müdafiəsi naziri Səlim Müslümov deyib. O bildirib ki, yaşı 25-dən az olanların işsizliyinin artım tempi, yaşı 25-dən çox olan insanların işsizliyindən 3 dəfə çoxdur:
"Təəssüf ki, işəgötürənlərin 30 faizi ixtisaslı kadrların azlığından şikayət edirlər. Bu da yüksək ixtisaslı kadrların hazırlanmasının, bu sahədə təhsil sistemi və peşə hazırlığının hələ ki, yetərli olmaması ilə bağlıdır. Getdikcə əmək bazarında ehtiyac olmayan insan resursları artır. Yəni demoqrafik artım ilə əmək resurslarının mövcud bazarın tələblərinə uyğun hazırlanması prosesi arasında bir disbalans yaranıb. Bunun aradan qaldırılması üçün müxtəlif tədbirlərin həyata keçiriləsi vacibdir".
Nazirin sözlərinə görə, işəgötürənlərin müasir dövrdə tələbləri də dəyişib: "Bu gün işəgötürənlər kadrların hazırlanması prosesində iştirak etmək istəmirlər. Onlar daha çox hazır, dərhal işə başlayacaq mütəxəssislər tələb edirlər".
Zibillikdən 50-dək sənəd tapıldı
08.02.2016
Məişət tullantıları arasından son bir həftə ərzində 50-ə yaxın müxtəlif sənədlər - 22 şəxsiyyət vəsiqəsi, 6 pasport, 1 hərbi bilet, 3 sürücülük vəsiqəsi, 3 avtomobil texniki pasportu, 13 müxtəlif bank kartı və s. tapılıb.
“Təmiz Şəhər” ASC-nin mətbuat xidmətindən Ölkə.Az-a verilən məlumata görə, tapılmış sənədlər “Təmiz Şəhər” ASC-nin əməkdaşları tərəfindən polisə təhvil verilib.
Bu universitetdə kafedralar və şöbələr bağlandı
08.02.201
Bakı Slavyan Universitetinin (BSU) strateji inkişaf planına uyğun olaraq mövcud strukturların optimallaşdırılması, kadr potensialından daha səmərəli istifadə məqsədi ilə islahatlar aparılır.
BSU-nun mətbuat xidmətindən APA-ya verilən məlumata görə, universitetdə 7 kafedra, 5 şöbə və 2 elmi-tədqiqat laboratoriyası ləğv edilib. Ləğv edilmiş strukturların bir sıra funksiyaları digər uyğun qurumlarda cəmlənib, tədris strukturları isə təhsil sahəsində yeni tələblərə və beynəlxalq təcrübəyə uyğun şəkildə birləşdirilərək yenidən formalaşdırılıb.
Ləğv olunmuş fakültələrin bazasında “Filologiya və jurnalistika” və “Beynəlxalq münasibətlər və tərcümə” fakültələri yaradılıb. Bütün bunlar fənlərarası və ixtisaslararası əlaqələrin dərinləşdirilməsinə, tələbələrin təhsilinin Bolonya prosesinə daha sıx uyğunlaşdırılmasına təkan verəcək.
Azərbaycanlı alim asteroid təhlükəsi ilə bağlı xəbərdarlıq etdi
08.02.2016
2013 TX68 asteroidinin fırlanma müddəti 2 ildən bir az artıqdır. Buna görə də tez-tez Yer kürəsinin həndəvərində olacaq.
Ölkə.Az-ın xəbərinə görə, bunu APA-ya açıqlamasında AMEA-nın müxbir üzvü, Şamaxı Astrofizika Rəsədxanasının elmi işçisi Əyyub Quliyev deyib.
“2013 TX68 asteroidi Çelyabinsk asteroidinə bənzəyir. Çelyabinsk asteroidinin diametri təxminən 19 metr idi. Bu isə ondan təxminən iki dəfə böyükdür. Lakin asteroidin Yerlə toqquşma ehtimalı böyük deyil”, - deyə Ə.Quliyev bildirib.
O qeyd edib ki, 2013-cü il TX 68 asteroidi 2013-cü ildə Katalina rəsədxanasında kəşf olunub.
Baş prokurorluq sahibkarlara xəbərdarlıq etdi
08.02.2016
"Manatın məzənnəsində baş verən dəyişiklikdən istifadə edərək süni qiymət artımı, mal qıtlığının yaradılması, inhisarçılıq, istehlakçıların aldadılması və digər sui-istifadə hallarının qarşısının alınması məqsədilə Azərbaycan Prezidenti İlham İlham Əliyevin verdiyi göstərişlərə uyğun tədbirlər həyata keçirilir".
Ölkə.Az xəbər verir ki, bunu "Report"un sorğusuna cavab olaraq Baş Prokurorluğun mətbuat xidmətinin rəhbəri Eldar Sultanov bildirib.
"Baş prokuror yanında Korrupsiyaya qarşı Mübarizə Baş İdarəsi və İqtisadiyyat Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti tərəfindən təsdiq edilən birgə Tədbirlər Planına müvafiq olaraq bu kimi hallara qarşı təxirəsalınmaz qabaqlayıcı, inzibati, habelə istintaq-əməliyyat tədbirləri keçirilir və görülən tədbirlər barədə kütləvi informasiya vasitələri ilə ictimaiyyətə mütəmadi məlumatların verilməsi təmin edilir. Bundan sonra da bu qəbildən olan bütün neqativ hallara qarşı ən kəsərli tədbirlər görüləcək", - E.Sultanov vurğulayıb.
Nazirlikdən kanalda batan ərəblərlə bağlı — Açıqlama
09.02.2016
Kanalda batan xarici ölkə vətəndaşlarına ov icazəsi verilməyib.
Bu barədə Ekologiya və Təbii Sərvətlər Nazirliyinin (ETSN) Mətbuat Xidmətindən məlumat verilib.
Məlumatda bildirilir ki, 8 fevral 2016-ci il tarixində gecə saatlarında İmişli rayonunun Xəlifəli kəndinin çöl sahəsində qanunsuz ov edərkən kanala düşən xarici ölkə vətəndaşlarına ETSN tərəfindən ov icazəsi verilməyib.
Aparılan araşdırmalar zamanı məlum olub ki, həmin şəxslər, Səudiyyə Ərəbistanı və Qətər vətəndaşları və onları ölkəyə dəvət edənlər tərəfindən müvafiq ov icazəsinin alınması üçün ETSN-ə hər hansı müraciət olunmayıb. Ona görə də, onların ov icazəsi olmaması səbəbindən gecə saatlarında qanunsuz olaraq ov sahəsinə çıxdıqları ehtimal olunur.
Parlamentdə bələdiyyələrlə bağlı işçi qrup yaradıldı
09.02.2016
Milli Məclisdə qanunvericilik səviyyəsində bələdiyyələrin qarşılaşdıqları problemlərin aradan qaldırılması ilə əlaqədar işçi qrup yaradılıb.
Bu barədə Ölkə.Az APA-ya istinadən xəbər verir.
Məlumata görə, bu sözləri bələdiyyələrin fəaliyyətinə inzibati nəzarəti həyata keçirən orqanın illik məruzəsinin Milli Məclisin Regional məsələlər komitəsində müzakirəsi zamanı komitənin sədri Arif Rəhimzadə bildirib.
Azərbaycanda “donuz qripi”nə qarşı vaksin yoxdur
09.02.2016
""Donuz pripi" və digər təhlükəli viruslar əleyhinə dövlət xəstəxanalarında vaksinlər yoxdur. Kim istəyirsə, özəl klinikalarda peyvənd oluna bilər".
Ölkə.Az xəbər verir ki, bunu AzVision.az-a açıqlamasında Respublika Gigiyena və Epidemiologiya Mərkəzinin baş direktorunun epidemiologiya məsələləri üzrə müavini Afaq Əliyeva deyib.
O, bildirib ki, Azərbaycanda qrip əleyhinə vaksinasiyanın aparılmasına ehtiyac yoxdur. Çünki ölkəmizdə AH1N1 virusu qeydə alınmayıb.
Azərbaycanda evlənmək istəyən 54 nəfərdə “SPİD” tapıldı
09.02.2016
Ötən ilin yayından bu günə qədər nikaha daxil olmaq istəyən 94 min 400 nəfər tibbi müayinədən keçirilib.
Səhiyyə Nazirliyindən Ölkə.Az-a verilən məlumata görə, ölkədə nikaha daxil olmaq istəyənlərin icbari tibbi müayinəsi tətbiq olunduğu andan 31 dekabr 2015-ci il tarixlərinədək müayinələrdən keçmiş 84 min 600 nəfərdən bəzilərində müxtəlif xarakterli infeksiyalar aşkar olunsa da, ümumilikdə müayinədən keçən və nikaha daxil olmaq istəyən şəxslərin əksəriyyətinin sağlamlıq durumunun qənaətbəxş olduğu aşkar olunub.
Keçən il müayinədən keçmiş 5 min 534 nəfərdə talassemiya daşıyıcılığı, 239 nəfərdə sifilis, 54 nəfərdə isə QİÇS aşkarlanıb.
Bu ilin ilk ayında 9 min 800 nəfər tibbi müayinədən keçib. Yanvar ayında müayinələrdən keçmiş 246 nəfərin talassemiya daşıyıcılığı, 22 nəfərdə sifilis, 1 nəfərdə isə QİÇS tapılıb.
Sığorta fırıldaqçıları peyda olub — Sürücülərin nəzərinə
10.02.2016
Bakıda bir qrup sığorta fırıldaqçısı özünü sığorta agenti kimi təqdim edərək, sürücülərə ya SMS göndərir, ya da birbaşa zəng edərək icbari sığortalarının etibarsız olduğunu deyirlər. Buna inanan sürücüyə isə əlavə pul müqabilində sığortanı bərpa etməyi təklif edirlər.
Ölkə.Az xezerxeber-ə istinadən xəbər verir ki, bu, son vaxtlar ortaya çıxan sığorta fırıldaqçılarının ən çox istifadə etdikləri yoldur.
Sığorta eksperti Abbas Babayev deyir ki, sığorta müqavilələri avtomobilin sahibindən asılı olmayaraq öz qüvvəsində qalır. Yalnız bir halda icbari sığortaya vaxtından əvvəl xitam verilə bilər.
Bu kimi hallarla insanları aldadan şəxslər cinayət məsuliyyətinə cəlb oluna bilərlər.
Azərbaycan qənaət rejiminə keçdi
10.02.2016
Paytaxtda bir çox küçələrdə gecə saatlarında işıqlar söndürülməyə başlayıb.
Dünya bazarında neftin qiymətinin kəskin ucuzlaşması və dolların bahalaşmasından sonra Azərbaycan hökuməti müxtəlif xərclərə qənaət etməyə başlayıb. Bunlardan biri də paytaxtda elektrik enerjisinə qənaət edilməsi ilə bağlıdır.
Ölkə.Az ANS PRESS-ə istinadən xəbər verir ki, qənaət planı şəhərin mərkəzi küçələrində də hiss edilir. Belə ki, paytaxtın Səbail, Yasamal, Abşeron və s. kimi rayonlarında əvvəllər gecə saatlarına qədər söndürülməyən işıqlar indi daha tez söndürülür.
Azərbaycanda iki yeni komitə yaradılır
10.02.2016
Standartlaşdırma, Metrologiya və Patent üzrə Dövlət Komitəsinin nəzdində iki yeni texniki komitə yaradılacaq.
Bunu Dövlət Komitəsinin aparat rəhbəri Arif Əşrəfov bu gün keçirilən mətbuat konfransında deyib.
O qeyd edib ki, hazırda Dövlət Komitəsinin nəzdində 9 texniki komitə fəaliyyət göstərir: “Hazırda enerji səmərəliliyi və yol nəqliyyatının tənzimlənməsi ilə bağlı yeni iki texniki komitənin yaradılması istiqamətində iş aparılır”.
A.Əşrəfov həmçinin Standartlaşdırma, Metrologiya və Patent üzrə Dövlət Komitəsində Apellyasiya Şurası yaradıldığını bildirib.
Tərkibinə 6 nəfər daxil şuraya A.Əşrəfov rəhbərlik edəcək.
MTN-in keçmiş rəis müavininin həbs müddəti uzadıldı
10.02.2016
Keçmiş Milli Təhlükəsizlik Nazirliyinin (MTN) Baş İstintaq İdarəsinin rəis müavini, polkovnik Sahib Ələkbərov barəsində seçilmiş həbs qətimkan tədbirinin müddəti uzadılıb.
Ölkə.Az-ın APA-ya istinadən xəbərinə görə, bununla bağlı bu gün Səbail rayon Məhkəməsində qərar qəbul olunub.
Məhkəmə həbs qətimkan tədbirinin daha 3 ay müddətinə uzadılması barədə qərar qəbul edib.
Azərbaycandan mindən çox əcnəbi deportasiya edilib
10.02.2016
Dövlət Miqrasiya Xidməti məlumat yaydı.
Bu ilin yanvar ayı ərzində 1569 əcnəbi tərəfindən Azərbaycan Respublikasında olma, habelə müvəqqəti və daimi yaşama qaydalarına əməl etmədən inzibati qanunvericiliyin tələblərinin pozulması halları müəyyən edilib.
Bu barədə Dövlət Miqrasiya Xidmətindən bildirilib.
Həmin əcnəbilərdən 4-nün Azərbaycan ərazisində müvəqqəti və ya daimi yaşamaq üçün əsas verən sənədləri itirildiyindən yenisi ilə əvəz olunub. 101 nəfərin ölkə ərazisində yaşamaları leqallaşdırılıb.
Daxili Qoşunlar Nardarandan çıxarılır
10.02.2016
Nardaranda yerləşdirilmiş polis postlarının böyük əksəriyyəti yığışdırılıb.
Ölkə.Az xəbər verir ki, bu barədə APA-ya yerli sakinlər məlumat veriblər. Sakinlərin sözlərinə görə, hazırda qəsəbənin yalnız giriş və çıxışında postlar qalmaqdadır. Qəsəbənin içərisindəki polis postları isə artıq götürülüb.
Nardaran təhlükəsizliyə nəzarət edən Daxili Qoşunların da bir hissəsi qəsəbədən çıxarılıb.
Sabunçu rayon Polis İdarəsindən bildirilib ki, hazırda qəsəbədə sakitlik hökm sürür və əməliyyat şəraiti tam nəzarət altındadır.
Malıbəyli və Quşçuların işğalından 24 il ötür
11.02.2016
Bu gün Şuşanın Malıbəyli və Quşçular kəndlərinin işğalı günüdür. Yuxarı Quşçular – Azərbaycan Respublikasının Şuşa rayonunun inzibati ərazi vahidində kənddir. 1992-ci ildə Ermənistan Silahlı Qüvvələri tərəfindən işğal edilib.
Qanunsuz ov edən 48 nəfər saxlanılıb
11.02.2016
Azərbaycanda ötən ay qanunsuz ov etdiyinə görə saxlanılan şəxslərin sayı açıqlanıb.
“Ovçuluq haqqında” Azərbaycan Respublikası Qanununun tələblərinə əməl olunması vəziyyətinin araşdırılması, qanunsuz ov edilməsi hallarının qarşısının alınması məqsədilə Ekologiya və Təbii Sərvətlər Nazirliyinin əməkdaşları tərəfindən respublika ərazisində növbəti reydlər keçirilib.
Nazirlikdən bildirilib ki, 2016-cı ilin yanvar ayı ərzində keçirilən reydlər zamanı qanunsuz ov etməyə cəhd edən 48 nəfər saxlanılıb. Onlardan 43 ədəd ov tüfəngi və 202 ədəd patron maddi sübut kimi götürülüb. 41 qanun pozucusu barəsində akt və protokol tərtib olunaraq hər biri 1000 manat olmaqla, ümumilikdə 41000 manat məbləğində cərimə tətbiq edilib. Sənəd təqdim etməyən 7 təqsirkar şəxs barəsində isə tədbir görülməsi, şəxsiyyətlərinin müəyyənləşdirilərək qanunvericiliyə uyğun qaydada məsuliyyətə cəlb edilməsi məqsədilə aidiyyəti Rayon Polis Şöbələrinə müraciət olunub.
Сinsi azlıqlar Təhsil Nazirliyinə etiraz edir
11.02.2016
Azərbaycanda cinsi azlqıları təmsil edən “Nəfəs LGBT Azərbaycan Alyansı” Təhsil Nazirliyindən şikayətçidir.
Təşkilatın iradlarına səbəb Azərbaycan Müəllimlər İnstitutunun Psixologiya fakültəsində tədris olunan “Ailə psixologiyası” adlı dərslikdə homoseksuallıq barədə tibbi əsaslara sığmayan səhvlərin olmasıdır.
“Belə ki, 2015-ci ilin nəşri olan və Azərbaycan Respublikası Təhsil Nazirliyi tərəfindən təsdiq edilən kitabda homoseksuallıq təhrif olunmuş (qeyri-normal) cinsi meyl pozuntusu, patologiya kimi göstərilib və zoofiliya, pedofiliya, nekrofiliya kimi digər patologiyalarla eyni sıraya qoyulmuşdur. Eyni zamanda bu halın psixopatlarda rast gəlindiyi qeyd edilib. Kitabda homoseksualların xəstə insanlar olması barədə cümlə də yer alır.
Azərbaycanın axtardığı 375 cinayətkar tapıldı
11.02.2016
Dövlət Sərhəd Xidmətinin (DSX) əməkdaşları yanvar ayında dövlət sərhədini pozduqları üçün 27 halda 46 nəfəri saxlayıb.
DSX-nın mətbuat mərkəzindən Ölkə.Az-a verilən məlumata görə, saxlanılanların 16 nəfəri Azərbaycan, 13 nəfəri Banqladeş, 4 nəfəri Pakistan, 3 nəfəri Özbəkistan, 3 nəfəri İran, 3 nəfəri Nigeriya, hər ölkədən bir nəfər olmaqla Türkmənistan, Əfqanıstan, Qambiya vətəndaşları olub.
Qurumdan bildirilib ki, sərhəd rejim qaydalarını pozduqlarına görə yaşıl sərhəddə 3 halda 5 nəfər, Xəzər dənizində 4 halda 6 nəfər saxlanılaraq barələrində müvafiq tədbir görülüb.
Yunus cütlüyünü ölkədən buraxmadılar
11.02.2016
Yasamal rayon Məhkəməsində Leyla Yunus və Arif Yunusun müraciətinə baxılıb.
Ölkə.Az xəbər verir ki, Vəkil Elçin Sadıqovun APA-ya verdiyi məlumata görə, məhkəmə onların müraciətini təmin etməyib. Vəkil qərardan apellyasiya şikayəti verəcəklərini bildirib.
Qeyd edək ki, Leyla və Arif Yunuslar müalicə üçün müvəqqəti Azərbaycan Respublikası hüdudlarından kənara çıxmağa icazə verilməsi üçün Yasamal Rayon Məhkəməsinə ərizə ilə müraciət ediblər.
Ərizədə qeyd olunub ki, həkim ekspertin rəyinə əsasən, Leyla Yunus xroniki hepatit, arterial hipertenziya, şəkərli diabet xəstəliklərindən əziyyət çəkir, öd kisəsindəki bir böyük daş pankreatit fəsadlarla şiddətli qarın ağrılarına səbəb olur və bu xəstənin xəstəxanada yerləşdirilməsinə, daşın çıxarılması üçün təcili əməliyyat olunmasına ehtiyac var.
Ötən il 70-ə yaxın şəxsə böyrək köçürülüb
11.02.2016
Azərbaycan Prezidenti İlham Əliyevin regionların 2014-2018-ci illərdə sosial-iqtisadi inkişafı Dövlət Proqramının icrasının ikinci ilinin yekunlarına həsr olunmuş konfransda verdiyi tövsiyələrə uyğun olaraq, səhiyyə naziri Oqtay Şirəliyev fevralın 11-də Qazax şəhərində rayon ictimaiyyətinin nümayəndələri ilə görüşüb.
Səhiyyə Nazirliyinin mətbuat xidmətindən Ölkə.Az-a verilən məlumata görə, görüşdə nazirliyin səlahiyyətli nümayəndələri ilə yanaşı, Qazax rayon yerli icra hakimiyyəti orqanlarının, bələdiyyələrin, idarə, müəssisə və təşkilatlarının rəhbərləri, sahibkarlar, rayon ziyalıları iştirak ediblər.
Bu kolleclər birləşdirilərək yeni kolleclər yaradıldı
12.02.2016
Azərbaycan Nazirlər Kabineti orta ixtisas təhsili müəssisələrinin şəbəkəsinin optimallaşdırılması və Azərbaycan Respublikası Nazirlər Kabinetinin (NK) 2011-ci il 15 iyul tarixli 118 nömrəli qərarı ilə təsdiq edilmiş “Azərbaycan Respublikası Təhsil Nazirliyinin strukturuna daxil olmayan tabeliyindəki qurumların Siyahısı”nda dəyişikliklər edib.
Nazirlər Kabinetindən verilən məlumata görə, orta ixtisas təhsili müəssisələrinin şəbəkəsinin optimallaşdırılması, təkrarlanmanın aradan qaldırılması, idarəetmənin, maliyyələşdirmənin, kadr hazırlığının səmərəsinin və keyfiyyətinin yüksəldilməsi məqsədi ilə Bakı Sosial Pedaqoji Kolleci Bakı Humanitar Kollecinə, Bakı Kompüter Kolleci Bakı İdarəetmə və Texnologiya Kollecinə, Şuşa Musiqi Kolleci Şuşa Humanitar Kollecinə qoşulub.
Gəncə Texniki Kolleci və Gəncə Humanitar Kolleci birləşdirilərək Gəncə Dövlət Regional Kolleci, Şəki Pedaqoji Kolleci və Şəki Musiqi Kolleci birləşdirilərək Şəki Dövlət Regional Kolleci, Şamaxı Humanitar Kolleci və Şamaxı Dövlət Sənaye-İqtisad Kolleci birləşdirilərək Şamaxı Dövlət Regional Kolleci, Bakı Neft-Energetika Kolleci Azərbaycan Dövlət Neft və Sənaye Universitetinin nəzdində Bakı Neft-Energetika Kolleci,Sumqayıt Dövlət Texniki Kolleci Sumqayıt Dövlət Universitetinin nəzdində Sumqayıt Dövlət Texniki Kolleci adlandırılıb.
İlham Əliyevə ən çox şikayət edən vətəndaşlar — SİYAHI
12.02.2016
Təkrar müraciətlərin sayının çox olmasının digər səbəbi isə bu işdə “səy göstərən” vətəndaşlardır və onlar ötən il də fəal olmuşlar.
Onlardan bəziləri müntəzəm və çox vaxt da əsassız müraciətlər yazmaqda davam edir və bu ənənəni neçə ildir ki, qoruyub saxlayırlar.
Bu sözləri Prezident Administrasiyasının Sənədlərlə və vətəndaşların müraciətləri ilə iş şöbəsinin müdiri Süleyman İsmayılov yeni məqaləsində bildirib.
Buna misal olaraq, Binəqədidən Roza Hümbətova və Zərbani Ağayevanı, Xətaidən Elman Heydərovu, Qönçə Səmədovanı, Nərimanovdan Kamran Rəcəbovu və Rəşad Səlimlini,Nəsimidən Sevda Hüseynova və Oqtay Əliyevi, Sabunçudan Olqa Smolyaninovanı,Səbaildən Akif Əliyev və Alya Təmrazovanı, Yasamaldan Sevda Süleymanova, Yelena Yusifova, Emil Qasımov və Susanna İslamzadəni, Lənkərandan Nazim Məmmədovu,Mingəçevirdən Kifayət Məmmədovanı, Abşerondan Tural Əhmədov və Lətifə Zeynəddinovanı, Ağdamdan Rövşən Şıxıyevi misal göstərmək olar.
Ünvanlı sosial yardım yeni qaydalarla veriləcək
12.02.2016
Azərbaycanda “Ünvanlı dövlət sosial yardımın alınması üçün müraciət edilməsi, onun təyin olunması, verilməsi və verilməsindən imtina edilməsi Qaydaları”ı təsdiq edilib.
Ölkə.Az Nazirlər Kabinetinin mətbuat xidmətinə istinadən xəbər verir ki, yeni qaydalar təsdiq olunduğu üçün “Sosial yardımın alınması üçün müraciət edilməsi, onun təyin olunması, verilməsi və verilməsindən imtina edilməsi Qaydaları”nın və “Ailənin orta aylıq gəlirinin hesablanması Qaydası”nın təsdiq edilməsi haqqında” Nazirlər Kabinetinin 2006-cı il 2 fevral tarixli ləğv edilib.
Yeni qaydaya əsasən, Azərbaycan Respublikasının ərazisində yaşayan və müraciətdən əvvəlki son 12 (on iki) ay ərzində orta aylıq gəliri ailə üzvünün əmək qabiliyyətini itirməsi, ailə üzvünün vəfat etməsi, ailənin əmək qabiliyyətli 23 yaşadək üzvünün əyani təhsil alması və s səbəblərdən hər bir ailə üzvü üçün ehtiyac meyarının məcmusundan aşağı olan aztəminatlı ailələr ehtiyac meyarının məcmusu ilə orta aylıq gəlirinin arasındakı fərq məbləğində sosial yardım almaq hüququna malikdirlər.
Azərbaycan televiziyasının yaranmasından 60 il ötür
12.02.2016
Qıvraq «qoca» TV
Tənha yaşayan ahıl qonşumdan bir dəfə xəbər aldım:
– Bayram günlərində darıxmırdınızmı?
– Darıxmaq nə şeydir?! – deyə o, ötkəm cavab verdi. – Məgər televizorla darıxmaq olar?..
Televiziya qəbulediciləri bu gün sadəcə məişət əşyamız deyil, sanki ailəmizin üzvlərindən biridir, özü də ona digər üzvlərdən daha artıq vaxt və diqqət ayırırıq. Səhər tezdən ilk növbədə məhz televizora «Sabahın xeyir!» deyirik. Necə? Onu istəkli kanalda işə salmaqla. Sübh çağı, biz hələ yuyunmamış, heç nə yeməmiş – sevimli verilişimizin aparıcıları və qonaqları öz növbəsində birbaşa evimizə daxil olurlar. Və mürəkkəb iş günündən, yaxud ...dükan-bazara yürüşdən əvvəl artistlərin bizə verdikləri gümrahlığı, pozitiv əhval-ruhiyyəni heç nə ilə müqayisə etmək mümkün deyil!
Məhz televiziya insanları toyuqlarla eyni vaxtda yatmağı tərgitməyə vadar edib. Ekran qarşısında keçirdiyimiz maraqlı gecədən sonra isə səhər heç bir xoruz bizi öz banlamağı ilə oyada bilməz...
Televiziya Azərbaycana nə az, nə çox – düz 60 il əvvəl gəlmişdir.
Tələbat olmayan ixtisaslara qəbul məhdudlaşdırıldı
12.02.2016
Bu günə qədər ölkəmizdə fəaliyyət göstərən Təhsil Nazirliyinin tabeliyində olan orta ixtisas təhsil müəssisələrinin 40%-dən çoxu humanitar, pedaqoji və musiqi yönümlüdür.
Bir çox kolleclər eyni profil üzrə kadr hazırlığı həyata keçirir və bəzilərində peşəkar idarəetmə və müəllim heyəti ilə bağlı o qədər yüksək keyfiyyət olmadığı üçün onların fəaliyyəti qənaətbəxş hesab edilə bilməz.
Bunu Təhsil Nazirliyinin ictimaiyyətlə əlaqələr şöbəsinin müdiri Cəsarət Valehov bildirib.
İŞİD tərkibində döyüşmüş şəxslər həbs edilib
12.02.2016
Dövlət Təhlükəsizliyi Xidməti (DTX) tərəfindən Azərbaycan Respublikasının vətəndaşlarının dini radikal silahlı birləşmələrə və ölkə hüdudlarından kənarda aparılan silahlı münaqişələrə cəlb edilmələrinə qarşı kompleks mübarizə tədbirləri davam etdirilir.
DTX-nın İctimai əlaqələr şöbəsindən verilən məlumatda bildirilir ki, həyata keçirilmiş son istintaq-əməliyyat tədbirləri nəticəsində Azərbaycan Respublikasının qanunvericiliyi ilə nəzərdə tutulmayan silahlı birləşmələrin yaradılmasında və fəaliyyətində iştirak etmə, onları döyüş sursatı və əsgəri ləvazimatla təchiz etmə, dini düşmənçilik zəminində ölkə hüdudlarından kənarda hərbi təlimlər keçmə, silahlı münaqişələrdə iştirak etmə və digər hüquqazidd əməllərinin törədilməsində şübhəli bilinən Azərbaycan Respublikasının vətəndaşları - Adiyev Orxan Mehdi oğlu, Muxtarov İbad Abbasəli oğlu, Abdullayev Məhəbbət Şərif oğlu, Bədəlov Rasim Asəf oğlu, Əzizov İlahi Rəşaiq oğlu, Məmmədov Zöhrab Mümbariz oğlu, Abdullazadə Zərbəli İsgəndər oğlu və Marfin Vladimir Yevqenyeviç saxlanılmışlar.
Əli Abbasovun bağ evindən 1 milyon dollar oğurlandı
13.02.2016
Azərbaycanın sabiq rabitə və yüksək texnologiya naziri Əli Abbasovun Goradil qəsəbəsində yerləşən bağ evindən 1 milyon dollar oğurlayıblar.
Ölkə.Az xəbər verir ki, haqqin.az bu barədə hüquq-mühafizə oraqanlarındakı mənbəyə istinadən məlumat yayıb. Oğurluq nazirin işdən azad olduqdan bir neçə həftə sonra baş verib.
Məlumata görə, axtarış-istintaq tədbirləri nəticəsində qarətçilər həbs ediliblər.
Gəncənin tarixinə dair yeni sənədlər tapılıb
13.02.2016
AMEA-nın Gəncə Bölməsinin Türkiyəyə ezam olunmuş əməkdaşları Gəncə şəhərinin tarixinə dair sənədlər və Nizami Gəncəvinin əsərlərinin əlyazmalarını əldə edib.
Akademiyadan Trend-ə verilən məlumata görə, Türkiyənin bir neçə arxiv və kitabxanasında aparılan araşdırmalardan sonra Başbakanlık Osmanlı Dövlət Arxivindən Gəncə şəhərinin hərbi-siyasi və iqtisadi tarixinə aid 181 arxiv sənəd toplanaraq, Akademiyaya təhvil verilib.
