Səddam Hüseynin kəndləri İŞİD-in işğalında

“Əl-Cəzirə” telekanalının müxbiri Kərkükün Molla Abdulla cəbhəsində olub.

Kürd peşmərgələri və türkmanlar İŞİD qüvvələrinə qarşı bu bölgədə döyüşürlər.

Burada Kürdüstan Regional Rəhbərliyi peşmərgə nazirinin müavini Ənvər Hacı Mahmud və cəbhə komandiri olan türkman Kamal Kərküki müdafiə strategiyalarından danışıblar:

“Molla Abdullah bölgəsi strateji əhəmiyyətə sahibdir. Mosul ilə Kərkük sərhədində olan bu bölgə Kərkük şəhərinə 24 kilometr uzaqlıqda yerləşir. Bölgənin 40 kəndi var, 32 kənddə İraqın keçmiş lideri Səddam Hüseyn dövründə yerləşdirilən ərəblər yaşayır. Kəndlər bu gün İŞİD-in əlindədir. Digər 8 kürd kəndi isə peşmərgə nəzarətindədir”.

Kərküki İŞİD-ə atəşkəs təklif etdiklərini, lakin qəbul etmədiklərini açıqlayıb. Ənvər Mahmud isə deyib ki, İraq hökuməti onlara silah və hərbi yardım etmir. Onun sözlərinə görə, peşmərgənin əlində olan silahlar olduqca köhnədir:

“İŞİD Mosulda mərkəzi hökumət ordusuna aid əhəmiyyətli və güclü silahları ələ keçirib. Bunlar Amerikan silahlarıdır. Peşmərgəyə İŞİD-ə qarşı döyüşmək üçün Avropa, Amerika silah köməyi etməlidir”.  (axar.az)