\"Araz Əzimov tamamilə düzgün deyib ki...\"

Azərbaycan xarici işlər nazirinin müavini Araz Əzimovun müsahibəsi ölkədə ən çox müzakirə edilən mövzuya çevrilib.

Araz Əzimov bildirib ki, Bəşər Əsəd prezident kimi hazırda Suriyanın ərazi bütövlüyünün və təhlükəsizliyinin yeganə qarantıdır. Bundan əlavə Araz Əzimovun müsahibəsində Türkiyə yox, İran və Rusiya meyilli fikirlər səsləndirməsi Ərdoğanın Azərbaycan səfəri öncəsi şok effekti yaradıb.

Bununla bağlı politoloq Zərdüşt Əlizadə Ölkə.Az-a danışıb:

"İdealda hər hansısa dövlətin başında demokratik, xalqa hörmət edən bir rəhbərin durması çox gözəl şeydir. Ancaq xalqların özünün inkişaf səviyyəsi bəzən elə olur ki, onlar demokratik hakimiyyətə layiq olmurlar. Dövləti daha yaxşı idarə edə bilən, avtoritar, sərt rəhbərlər olur. Bəşər Əsədə atasının qoyduğu miras bunlardandır. Avtoritar hakimiyyətin çərçivəsində Suriya bütöv dövlət kimi mövcud idi. Qərb və ərəb dünyasının mürtəce kralları Suriyanı sarsıtmağa, dağıtmağa başladılar.

Suriyada marağı olan dövlətlər bütöv Suriyanı zəbt edə bilmədikləri üçün Suriyanı parçalayıb, hərəsi bir parçasına sahib çıxdılar. Faktiki olaraq Suriya dağılıb. İndi Suriyada demokratik quruluşlu dövlət görmək mümkün deyil. Ancaq avtoritar və sərt bir diktatorun rəhbərliyi altında vahid Suriya dövləti mümkündür. Araz Əzimov tamamilə düzgün deyib ki, Suriyanın ərazi bütövlüyünün zəmanəti Bəşər Əsəd rejimidir. Bəşər Əsədi xilas etsələr, Suriya vahid dövlət halında olacaq. Əgər Bəşər Əsədi devirməyə nail olsalar, Suriya vahid dövlət kimi qala bilməyəcək".

Səxavət Məmməd
Ölkə.Az