Rövnəq Abdullayevə qarşı

Dünən AFFA haqda saytımızda dərc olunan material idman ictimaiyyətində səs-küyə səbəb olub.

Ölkə.az sözügedən məsələlərlə bağlı yeni təfərrüatlar əldə edib. 

Bildirilir ki, dörd aydır AFFA nə hakimlərə, nə hakim-inspektorlara hər oyun üçün ödəniləcək qonorarı vermir. Haqqını tələb edən hakimlər isə oyunlara təyinat almayacaqları və qurumdan uzaqlaşdırılacaqları ilə hədələnirlər. Hələlik bunun səbəbləri bəlli olmasa da, ortada bir neçə versiya var.

Şübhəsizdir ki, bunu edənlər qurumda Rövnəq Abdullayevə qarşı təxribat aparanlar və onun prezidentliyini qəbul etməyənlərdir. Təşkilatdaxili üsyanı bir qədər alovlandırmaq da məhz bu səbəbdəndir.

Əldə etdiyimiz məlumata görə, hakimlər sonuncu dəfə noyabrın 21-də qonorar alıblar. Bu isə başqa bir mətləbdən xəbər verir. Ağlabatandır ki, AFFA-da maliyyə məsələlərinə nəzarət edən şəxs, yaxud şəxslər (bu şəxsin baş katib Elxan Məmmədov olduğu barədə ehtimal daha böyükdür) qurumun manatla olan pullarını bahalaşmadan əvvəl dollara çevirib saxlayırlar.

Düzdür, bu versiyanı isbatlamaq elə də asan məsələ deyil. Ancaq hər halda mənbənin dedikləri sırasında bu versiya da yer alır.

İndiki halda bu duruma daha çox etiraz edənlər isə yaşlı və gözünü ancaq qonorara dikmiş hakim inspektorlardır. Çünki gənc hakimlər "qara dəftər"ə salınıb gələcək karyeralarını təhlükə altına atmamaq üçün susmağa üstünlük verirlər. Daha doğrusu, buna məcburdurlar.

Mövzunu davam etdirəcəyik.

İntiqam VALEHOĞLU
Ölkə.az