\"Qərbin və Rusiyanın Türkiyəyə qarşı olan terror təşkilatları ilə münasibətləri olub\"

ABŞ-ın Dövlət Departamenti bəyanat yayaraq PYD-ni müttəfiqi adlandırıb.

ABŞ-ın Dövlət Departamentinin bu bəyanatı Türkiyədə şok effekti yaradıb.

Departamentin rəsmi nümayəndəsi Con Kirbi deyib ki, PYD İŞİD-lə mübarizədə ciddi rol oynayıb. NATO tərəfindən bu qruplaşmanın bütün əməliyyatı havadan dəstəklənir. Gələcəkdə də PYD-yə hərbi yardımların davam edəcəyini gözləyirik.

Bununla bağlı Ümid Partiyasının sədri İqbal Ağazadə Ölkə.Az-a danışıb:

"ABŞ bundan əvvəl başqa bir bəyanat da vermişdi. ABŞ-ın müdafiə naziri ölkəsinin terrora qarşı Türkiyə ilə birgə mübarizə aparacağı ilə bağlı bəyanat vermişdi. Hər kəs maraqları istiqamətində fəaliyyət göstərir. Hər kəsin Yaxın Şərq coğrafiyasında öz maraqları var. Türkiyənin maraqları ilə yanaşı, digər dövlətlərin də maraqları var.

Hər kəs öz marağının təmin olunması uğrunda mübarizə aparır. Ancaq biz təbii ki, Türkiyəni müdafiə edirik, qardaş ölkənin yanındayıq. İstər PKK, istər PYD və digər təşəkilatları terrorçu təşkilatlar hesab edirik. Zaman-zaman Qərbin və Rusiyanın bu təşkilatlarla isti münasibətləri olub. Bu da o dövlətlərin maraqlarına söykənib. Təbii ki, Türkiyənin maraqlarını hər kəs təmin edə bilməz. Türkiyənin öz maraqları çox önəmlidir. Türkiyə bu istiqamətdə ciddi addımlar atacaq və Türkiyəni kimsənin marağı durdura bilməyəcək".

Qeyd edək ki, Türkiyə hökuməti Ankarada baş verən terror aktını PYD-nin etdiyini bildirir.

Səxavət Məmməd
Ölkə.Az