Keçmiş kəşfiyyatçı: \"Bu terror aktında KQB-nin dəst-xətti görünür\"

Ankarada baş verən terror aktının kimlər tərəfindən törədilməsi ən çox müzakirə edilən mözudur

Terror aktının paytaxt Ankarada və hərbçilərə qarşı törədilməsi bunun üçün ciddi hazırlığın olmasından xəbər verir. Rusiya mediasının yazdığı xəbərə görə, Ankara terroru zamanı həlak olanlardan 21 nəfəri Türkiyə hərbi hava qüvvələrinin pilotları olublar.

Ankara terroru və bu terrorun kimlər tərəfindən törədilməsi ilə bağlı Təhlükəsizlik Araşdırmaları Mərkəzinin rəhbəri, Milli Təhlükəsizlik Nazirliyinin sabiq polkovniki İlham İsmayıl Ölkə.Az-a danışıb:

"İlkin versiya kimi, hadisənin məhz hərbçilərə və paytaxta yönəldilməsi xüsusi hazırlıqdan xəbər verir. Bu terror aktının təşkilatçısı çox güman ki, Rusiyadır. İcraçı isə PYD üzvü olan Suriya vətəndaşıdır. Bu terror aktını nə PKK, nə də İŞİD etməyib. Bu terror aktının məhz hərbçilərə yönəldilməsi qisas alma prosesi olduğunu göstərir.

SSRİ dövründə də xaricdə qətllər həyata keçirmək üçün ixtisaslaşmış kadrlar var idi. Vaxtı ilə bunu DTK (KQB) həyata keçirirdi. DTK-nın (KQB) bundan ötrü xüsusi bir şöbəsi də var idi. İndi də Rusiya SSRİ-nin ənənəsini davam etdirir. Artıq neçə müddətdir ki, Rusiyanın Türkiyəyə olan xüsusi qərəzi məhz burada özünü göstərir. Birbaşa iddia etmək olmasa da bu işin təşkilatçılığının birbaşa Rusiya xüsusi xidmət orqanları tərəfindən törədildiyini demək olar.

Türkiyə hökuməti bu terror aktı ilə bağlı PYD-nin üstünə düşüb. Türkiyə son zamanlar məhz PYD-nin mövqelərini atəşə tuturdu. Ancaq bu terror aktına baxıldıqda icraçının PYD üzvü, təşkilatçının isə dəqiq deyə bilməsək də, Rusiyanın olduğunu söyləmək olar".

Qeyd edək ki, 24 noyabr 2015-ci ildə Türkiyənin hava məkanını pozan Rusiyaya məxsus "Su-24" tipli hərbi təyyarə Türkiyə tərəfindən vurulmuşdu. Təyyarədə olan pilotlardan biri isə ölmüşdü.

Səxavət Məmməd
Ölkə.Az