“Türkiyəyə 10 il öncə uşaq kimi gələn rus...”
“Türkiyənin turizminə zərər vurmağı düşünənlər yanılırlar. Heç bir qara təbliğat dünyanın göz bəbəyi olan İstanbul, İzmir, Aydın, Bursa, Mardini gözdən sala bilməyəcək”.
Bu barədə Türkiyə baş naziri Əhməd Davudoğlu bildirib.
“Turizm xalqlararası əlaqə vasitəsidir. Ölkələr arasında problemlər olsa da, turizm sahəsi bunu həll etməyə qadirdir. Türkiyə dünyanın 6-cı böyük turist ölkələrindən biridir. Buna görə də son vaxtlar baş verən hadisələrə görə zərərə uğrayan tuzim sahəsi üçün bəzi tədbirlər görmüşük.
1. Bütün dünyadan Türkiyəyə turist gətirən A Qrupu səyahət şirkətlərinə yardım göstəriləcək. Hər uçuşa görə 6 min dollar dəstək verəcəyik. Bu, bütün ölkələrə şamil olunacaq.
2. Kredit götürmək imkanı yaradacağıq.
3. Turizm sahəsində tənəzzül baş verdiyi halda bu sahənin borcları ödəniləcək.
4. Mədəniyyət və Turizm Nazirliyinin nəzarəti altında olan dəniz turizminə İnkişaf Nazirliyi dəstək olacaq”.
Baş nazir rus turistlərlə bağlı da danışıb: “Rusiyalı turistlər Türkiyəyə anidən gəlməyiblər. Gəldilər, gördülər, sevdilər və yenidən bura gəldilər. Bundan 10 il öncə Türkiyəyə uşaq kimi gələn rus, indi bir gənc olaraq gəlir. Bu vəziyyəti yalnız bir siyasi qərarla dəyişdirmək olmaz. Mən əminəm ki, rus turistlər hər hansı bir yolla yenidən Türkiyəyə gələcəklər. Xalqımıza səslənib demək istəyirəm ki, hansı xalqla nə problemi yaşayırıqsa-yaşayaq, onlara daha yaxşı münasibət göstərək ki, nə qədər qonaqpərvər bir xalq olduğumuzu yenidən görsünlər”. (qafqazinfo)
