AXCP sədri icra başçılarını dilənçi adlandırdı
“Azərbaycanın ancaq və ancaq mərkəzi yollarında vəziyyət ürkaçandır. Ayağını əyalət yoluna qoyan kimi sanki başqa aləmə düşürsən. Paytaxt Bakının elə yolları var ki, traktorla getmək daha münasibdir. Neft ölkəsinin yollarının hələ də bərbad olması yanlış idarəçiliyin, korrupsiyanın və iş yarıtmazlığının təcəssümüdür. Kənd yollarının böyük əksəriyyəti isə yarıtmaz gündədir. Elə yollar var ki, sovetlər dönəmindən bəri əl gəzdirilməyib”.
Bunu Ölkə.Az-a Azərbaycan Xalq Cəbhəsi Partiyasının sədri Razi Nurllayev deyib. Sədr yolların bərbad durumda olmasınaəsas səbəb kimi yerli icra hakimiyyətlərinin yarıtmaz fəaliyyətini göstərib:
“Mədəniyyət yol ilə başlayır. Şəhərlərarası qəsəbələrarası, kəndarası yolların müharibədən çıxmış kimi illərlə qalmasını necə başa düşmək olar? Məgər, yolların çəkilməsi üçün mütləq şəkildə Prezidentin Ehtiyat Fondundan vəsaitmi ayrılmalıdır? Artıq yerli icra hakimiyyətlərində də belə bir vərdiş yaranıb ki, pul ayrılmasa yollar elə bərbad qalmalıdır. Yolların çala-çüxurunu dolurmağa nə deyirsiniz? Məgər icra hakimiyyətlərinin, bələdiyyələrin 2000, 3000 manatı yoxdur ki, bir yol hamarlayıcı traktorla (qreyder) yolların çala-çüxurlarının doldurlmasını təşkil etsinlər?. Məgər 5-10 maşın çınqıl, qum töküb yolları hamarlamaq bu qədərmi çətindir? Səbəb birdir. Məsuliyyətsizlik, bacarıqsızlıq və dövlət büdcəsini talamaq meylləri. Hər kəs prezidentin əlinə baxır. Elə bil dilənçidirlər”.
Razi Nurullayev bildirib ki, yerli icra hakimiyyətlərinin özləri qazanmaq, sərmayələr cəlb etmək, xaricdə yaşayan yerli azərbaycanlıları işə və abadlaşdırmaya cəlb etmək bacarıqları yoxdur:
“Uzun sözün qısası, nomenklatur düşüncəli, köhnə fikirli, zamanın tələblərinə cavab verməyən, həm fiziki, mənəvi, həm də zehni cəhətdən qocalan məmur kütləsinin, xüsusən də icra hakimiyyəi başçılarının dəyişdirilməsi vacidbir. Minlərlə xaricdə oxuyub gəlmiş gənc kadrlar var. Onları fiziki və mənəvi cəhətdən pas atmış məmur kütləsinin ixtiyarına verib kölə kimi şəxsiyyətini sındırmaqdansa, elə gənc kadrların özlərini yüksək postlara təyin etmək gərəkir”.
