\"Qarabağ problemini həll etmək üçün onun arxasında duran dövlətə qələbə çalmaq lazımdır\"

BMT öz vəzifələrini yerinə yetirə bilmir

Bu haqda "Amnesty International" təşkilatının dərc etdiyi hesabatda deyilir.

"Amnesty International"ın "Müasir dünyada insan hüquqları" ilə bağlı illik hesabatında bildirilir ki, BMT insanları müharibələrin gətirdiyi bədbəxtliklərdən qorumaq üçün yaradılıb. Amma bu gün BMT böyük problemlər qarşısında öz səlahiyyətlərini yerinə yetirə bilmir.

Yeri gəlmişkən Ermənistanın Azərbaycana etdiyi təcavüzlə bağlı BMT Təhlükəsizlik Şurası tərəfindən 1993-cü ildə 4 qətnamə qəbul edib, ancaq o qətnamələr kağız üzərində qalıb.

Bu məsələ ilə bağlı politoloq Zərdüşt Əlizadə Ölkə.Az-a danışıb:

"BMT dünyada ən mötəbər təşkilatdır. Ancaq BMT-nin icra mexanizmləri onun daimi üzvü və veto hüququ olan 5 ölkədən asılıdır. Onların hamısı qüdrətli dövlətlərdir. 5 ölkə istəyəndə ki, hansısa bir qərar Təhlükəsizlik Şurasından keçsin, o zaman sövdələşib o qərarı qəbul edirlər və həmin qərarı həyata keçirirlər.

BMT-nin qərarlarının arxasında mütləq güc dayanmalıdır. Bu güc isə böyük dövlətlərdədir. 4 qətnamə dediniz, Ermənistanın Azərbaycana etdiyi təcavüzlə bağlı BMT Təhlükəsizlik Şurası tərəfindən 1993-cü ildə qəbul edilmiş 4 qətnamənin həyata keçirilməsi üçün güc olmalıdır. O güc elə bir güc olmalıdır ki, Qarabağ müharibəsini təhrik etmiş, qızışdırmış, işğalçının arxasında duran gücə qalib gəlsin. O güc Rusiyadır. Rusiyaya qalib gələ biləcək başqa bir güc varmı? Yoxdur. Ola bilsin ABŞ 4 qətnamənin həyata keçməsini istəyərdi, ancaq ABŞ da istəmir. ABŞ da Ermənistanın tərəfindədir. Ona görə də, qəbul etdikləri qətnamələrdə işğalçı kimi Ermənistan Respublikasının adı yoxdur. Qətnamələrdə erməni qoşunları yazılıb. Bu erməni qoşunları Marsdan gəlib, yoxsa Aydan gəlib bilinmir. Elə erməni qoşunları yazılıb. Erməni qoşunlarına qarşı da heç bir sanksiya tətbiq etmək mümkün deyil.

İnsan hüquqları hər bir dövlətin özünün mədəniyyətindən asılı olan məsələdir. Azərbaycan xalqı ömür boyu bilməyib ki, insan hüquqları nədir. Azərbaycan xalqı işğal altında olan bir xalq olub. Əvvəlcə feodal İranın tərkibində, sonra isə SSRİ-nin tərkibində. Onlarda isə insan haqları olmayıb. Azərbaycan müxalifəti, hökuməti özünü demokratik adlandırır. Evdə bişməyib, qonşudan gəlməyib, haradan bilsinlər insan haqları nədir. Bilmədikləri üçün də hörmət etmirlər. Azərbaycanda problemi olan qaçır polisə, məhkəməyə şikayət edir, onlar da baxmayanda gəlir insan hüquqlarını qanmayan müxalifətə şikayət edir. Məgər müxalifət bilir ki, insan hüquqları nədir? Hakimiyyət əleyhinə istifadə etmək lazımdırsa, bundan danışıb, yazırlar. BMT-nin vəhşi dünyada insan hüquqlarını qorumağa gücü çatmır".

Səxavət Məmməd
Ölkə.Az