İlhamənin oğlu: "Elgizin şəxsi fikridir, mənim xəbərim yoxdur"
Xalq artisti İlhamə Quliyevanın oğlu Orxan Nadirov teleaparıcı Elgiz Əkbərin sosial şəbəkədə yazdıqlarına münasibət bildirib.
Ölkə.Az-ın məlumatına görə, anasının vida mərasimində jurnalistlərin suallarını cavablandıran Nadirov teleaparıcının "İlhamə xanım mirasını əsgərlərə bağışlayıb" fikrini ilk dəfə eşitdiyini diqqətə çatdırıb:
"Bu sözü birinci dəfədir ki, eşidirəm. Ola bilər Elgizin şəxsi fikridir, amma mənim xəbərim yoxdur. İnsan dünyasını dəyişəndə arxasınca çox sözlər danışırlar".
O, İ.Quliyevanın "məni tabutda basdırın" vəsiyyətinə də münasibət bildirib və bunun mümkünsüz olduğunu açıqlayıb:
"Biz müsəlmanıq və müsəlmanlar tabutda basdırılmır. Anam özü həcc ziyarətində də olmuşdu".
Nadirov ötən gün jurnalistlərlə arasında yaranmış anlaşılmazlığa da aydınlıq gətirib və üzrxahlıq edib:
"Dünən istəmədən bir az anlaşılmazlıq yarandı. Buna görə üzrxahlıq edirəm. Məndən nə hiss keçirdiyimi soruşmaqlarına əsəbləşdim. Əgər konsert, toy olsaydı, deyərdim ki, sevinirəm. Son dəfə gecə 11-də danışmışdıq. Adətən bir-birimizə ya gecə, ya da günorta 12-dən sonra zəng vururduq. Anam həmişə mətbuata, sizə önəm verib. O necə, mən də elə".
Xatırladaq ki, İlhamə Quliyeva ötən gün 73 yaşında dünyasını dəyişib.
İntiqam VALEHOĞLU
FOTOLAR: Nurlan Gülməmmədov
