Röya: "İlhamə xanım demişdi ki, taclarımı sənə verəcəyəm"
Xalq artisti İlhamə Quliyevanın vida mərasiminə qatılan əməkdar artist Röya Ayxan maraqlı açıqlamalar verib.
Ölkə.Az-ın məlumatına görə, jurnalistlərin suallarını cavablandıran sənətçi mərhum xalq artisti barədə fikirlərini paylaşıb:
"Məncə İlhamə xanım 73 yaşına qədər çox gözəl yaşadı. Allah bizə də o günü qismət eləsin. Allahla Allahlıq edə bilmərik ki. Bayaq Orxana da dedim, sizə də deyirəm. Bax mən də özümə belə ölüm arzu edirəm. Axşam deyim-gülüm, səhər yuxudan ayılım deyim ki, özümü pis hiss edirəm və ölüm. Ən qorxduğum illərlə xəstə yatmaqdır. Onu sərt qadın kimi tanıyıblar. Amma unutmayaq o, şir bürcüdür. Şirlərin xoşuna gəlir ki, onu tərifləsinlər. Qəlbən vallah elə adam deyildi, çox pozitiv idi. Efirdən elə görünə bilərik. Bu bizim özümüzü qorumağımızdır. Belə olmasa, bizi tapdayıb keçərlər. Həyatda nə qədər zəif olduğumuzu bilmirsiniz. Bəlkə də həyatdakı zəifliyimizə görə kameranı görəndə daha hirsli oluruq ki, bizi zəif bilən adam çox güclü olduğumuzu görsün".
Əməkdar artist bildirib ki, İlhamə Quliyeva taclarını ona verəcəyini söyləyibmiş:
"Mən də onun kimi layiqli getmək istəyirəm. İstəyirəm dövlətimi onun kimi sevim. O cür musiqilərdən sonra təbliğat apardı ki, insan dövlətini, dövlət başçısını necə sevməlidir. Mən onda görmüşəm bu sevgini, vallah. Allah rəhmət eləsin. Çox böyük itki idi. O mahnıları bir də necə eşidəcəyik. Qismət olmadı... Axırıncı dəfə ən qəşəng yadımda qalan sözü bu olmuşdu. Dedi ki, nə qədər tacım var, hamısını sənə verəcəyəm. Çox pozitiv adam idi. Mən onu çox istəyirəm. Başqa şəxsi məsələlərə fikir vermirəm. Başqaları ilə olan problemləri özünə aiddir".
Qeyd edək ki, fevralın 25-də dünyasını dəyişən İlhamə Quliyeva öz vəsiyyətinə uyğun olaraq İkinci Fəxri Xiyabanda, anası Tükəzban İsmayılovanın yanında dəfn ediləcək.
İntiqam VALEHOĞLU
Fotolar: Nurlan Gülməmmədov
