Həftənin icmalı
"Azerspace-2" peyki gələn il kosmosa buraxılacaq
22.02.2016
Azərbaycanın “Azerspace-2” ikinci peykinin layihələndirilməsi üzrə işlərə başlanılıb.
Ölkə.Az xəbər verir ki. bunu “Azərkosmos” ASC-nin peyk əməliyyatları üzrə qrupunun rəhbəri Dunay Bədirxanov Trend-ə deyib. D.Bədirxanovun sözlərinə görə, proses ilə yaxından tanış olmaq üçün ASC-nin əməkdaşları ABŞ-da “Space Systems Loral” (SSL) şirkətinin peyk istehsal zavodundadırlar.
Peykin dizaynı orta və ağır geostasionar və yüksək eliptik telekommunikasiya peyklərinin hazırlanmasında istifadə edilən 1300 seriya (SS/L 1300) platforması əsasında həyata keçiriləcək. İkinci peyk proqramı Kanadanın “Export Development Canada” (EDC) kredit agentliyinin uzunmüddətli və güzəştli kreditləri hesabına həyata keçiriləcək.
Dövlət qurumlarının saytlarına giriş bərpa edilir
22.02.2016
Bəzi dövlət qurumlarının saytlarına girişdə yaranan problem aradan qaldırılıb.
Ölkə.Az xəbər verir ki, bu barədə "APA-Economics"ə Xüsusi Dövlət Mühafizə Xidmətinin Xüsusi Rabitə və İnformasiya Təhlükəsizliyi Dövlət Agentliyinin Kompüter İnsidentlərinə Qarşı Mübarizə Mərkəzindən bildirilib.
"Problem artıq aradan qaldırılıb. Saytlara normal qaydada giriş mümkündür", - deyə mərkəzdən bildirilib.
Yeni doğulan körpələrin ölüm səbəbləri
22.02.2016
Azərbaycanda son illərdə yeni doğulmuşlar arasında ölüm əmsalı təxminən 10 promilledir, yəni hər 1000 yenidoğulan uşaqdan 10-u dünyasını dəyişir.
Ölkə.Az xəbər verir ki, bunu Trend-ə Azərbaycan Səhiyyə Nazirliyinin baş neonatoloqu, SN-nin Neonatoloji xidmətin təkmilləşdirilməsi üzrə xüsusi Komissiyasının sədri Rüstəm Hüseynov deyib.Uşaq ölümlərinin sayının əvvəlki illərə nisbətən azaldığını deyən R.Hüseynov bildirib ki, hər bir uşaq ölümü faktı araşdırılır.
Onun sözlərinə görə, dünyasını dəyişən yeni doğulmuşların çoxu vaxtından əvvəl doğulan uşaqlar olur: “Doğuş zədələri, hava çatışmazlığı (asfiksiya və hipoksiya) yeni doğulmuşların ölümünə səbəb olan xəstəliklər arasında çox az faiz təşkil edir. Bütün dünyada olduğu kimi, Azərbaycanda da yeni doğulmuş uşaqlarda ölümün ən birinci səbəbi yetkinsizliklə əlaqədardır”.
Akif Çovdarovun həbs müddəti artırıldı
22.02.2016
Ləğv edilmiş Milli Təhlükəsizlik Nazirliyinin (MTN) Energetika və Nəqliyyat Sahələrində Təhlükəsizlik Baş İdarəsinin həbsdə olan sabiq rəisi, general-mayor Akif Çovdarovun barəsində seçilmiş həbs qətimkan tədbirinin müddəti artırılıb.
Ölkə.Az xəbər verir ki, Trend-in məlumatına görə, Səbail rayon məhkəməsinin qərarı ilə A.Çovdarov barəsində seçilmiş həbs qətimkan tədbirinin müddəti 3 ay uzadılıb.
Soydaşlarımız Ağ Evin qarşısında aksiya keçirib — FOTO
22.02.2016
ABŞ-ın paytaxtı Vaşinqton şəhərində yaşayan azərbaycanlıların yaratdığı Vaşinqton Azərbaycan Komitəsi 21 fevralda Ağ Evin qarşısında Dünya Ana Dili Günü münasibətilə aksiya keçirib.
Komitənin təmsilçisi Zaur Bayramlı Ölkə.Az-a bildirib ki, Vaşinqtonda yaşayan soydaşlarımızın qatıldığı aksiyada İran rejimi tərəfindən İİR-də yaşayan 40 milyon türkün ana dilindən istifadə hüquqlarının məhdudlaşdıırlması pislənilib, “Ana dilində təhsil istəyirik", “Siyasi məhbuslara azadlıq” şüarları səsləndirilib.
Havanın yağışlı olmasına baxmayaraq, aksiya 1 saatdan cox davam edib və ətrafda xeyli insanın toplaşmasına səbəb olub.
Birinci sinfə şagird qəbulu bu il də elektron olacaq
22.02.2016
Bakıda 2016-2017-ci dərs ilindən I sinfə şagird qəbulu elektron sistem vasitəsilə həyata keçiriləcək.
Təhsil Nazirliyindən verilən məlumata görə, təhsil naziri Mikayıl Cabbarov “2016-2017-ci dərs ili üçün I sinfə şagird qəbulunun elektron sistem vasitəsilə həyata keçirilməsi barədə” əmr imzalayıb.
Əmrə əsasən, Bakı şəhərinin ümumtəhsil məktəblərində, Təhsil Nazirliyinin birbaşa tabeliyindəki lisey və gimnaziyalarda 2016-2017-ci dərs ili üçün I sinfə şagird qəbulunun Bakı Şəhəri üzrə Təhsil İdarəsi tərəfindən ərizələrin onlayn qeydiyyatı aparılmaqla, elektron sistem vasitəsilə həyata keçirilməsi qərara alınıb.
Sumqayıtda küçələrdən birinə Mübariz İbrahimovun adı verildi
22.02.2016
Sumqayıt şəhərində küçələrdən birinə Milli qəhrəman Mübariz İbrahimovun adı verilib.
Ölkə.Az-ın xəbərinə görə, bu barədə Report-a Sumqayıt Şəhər İcra Hakimiyyətinin mətbuat xidmətindən bildirilib.
Məlumatda qeyd olunub ki, bununla bağlı İcra hakimiyyətinin başçısı Zakir Fərəcov qərar verib.
Naxçıvan əhalisinin sayı açıqlanıb
22.02.2016
Naxçıvan Muxtar Respublikasında əhalinin sayı açıqlanıb.
Ölkə.Az xəbər verir ki, 2016-cı ilin yanvarın 1-nə muxtar respublikada əhalinin sayı 444 min 423 nəfər təşkil edib. Bu, ötən ilin analoji dövrü ilə müqayisədə 4 min 641 nəfər və ya 1,1% çoxdur.
Azərbaycan şirkəti “Türk Hava Yolları”nı məhkəməyə verdi
23.02.2016
"Aqat-R" Məhdud Məsuliyyətli Cəmiyyəti (MMC) "Türk Hava Yolları"nın Azərbaycan nümayəndəliyini məhkəməyə verib.
Ölkə.Az Report-a istinadən xəbər verir ki. MMC dəymiş ziyanın ödənilməsi barədə tələb irəli sürüb. 2 saylı Bakı İnzibati-İqtisadi Məhkəməsi iddianı qismən təmin edib. Qərardan narazı qalan "Türk Hava Yolları"nın Azərbaycan nümayəndəliyi apellyasiya şikayəti verib. Bakı Apellyasiya Məhkəməsinin qərarı ilə akt dəyişdirilmədən saxlanılıb. Daha sonra nümayəndəlik kassasiya şikayəti ilə Ali Məhkəməyə müraciət edib. İşə Azərbaycan Ali Məhkəməsində baxılacaq.
Rasim Əliyevi öldürənləri 63 il həbs gözləyir
23.02.2016
Bu gün Bakı Ağır Cinayətlər Məhkəməsində ann.tv saytının əməkdaşı Rasim Əliyevin ölümündə təqsirləndirilən Elşən İsmayılov, Camal Məmmədov, Arif Əliyev, Kənan Mədətov və Samir Mustafayevin cinayət işi üzrə növbəti məhkəmə prosesi keçirilib.
Ölkə.Az Report-a istinadən xəbər verir ki, hakim Eldar İsmayılovun sədrliyi ilə keçirilən iclasda məhkəmə istintaqının yekunlaşdığı elan olunub.
Prosesdə R.Əliyevin döyülmə anını özündə əks etdirən videogörüntülər və xəstəxanada verdiyi müsahibələr nümayiş etdirilib.
Dövlət ittihamçısı çıxış edib. Prokuror E.İsmayılov və A.Əliyevin hər birinə 14 il, C.Məmmədova 12 il, S.Məmmədov və K.Mədətovun hər birinə 11 il 6 ay həbs cəzası (ümumilikdə 63 il) istəyib.
Məhkəmənin növbəti prosesi martın 1-nə təyin olunub.
“Sovetski”dən köçmək istəməyənlər məhkəməyə veriləcək
24.02.2016
Bakı şəhərinin Baş Planına əsasən “Sovetski” adlanan ərazidə köçürmə və daşınmaz əmlakın sökülməsi işləri icra olunur.
Ölkə.Az-ın APA-ya istinadən məlumatına görə, köçürmə prosesinin ikinci mərhələsində alqı-satqı prosesi və söküntü işləri davam etdirilir.
Kiçiksahəli mənzillərin sakinlərinin yeni mənzillərlə təmin edilməsi istiqamətində işlər icra olunmaqdadır. Artıq Nərimanov rayonu ərazisində 9 mərtəbəli, 2 bloklu tamamilə rekonstruksiya olunmuş binada 2 otaqlı 104 mənzil hər bir kommunal şəraitlə təchiz edilərək kiçiksahəli mənzillərin sakinlərinə verilib. Yaxın günlərdə onlardan 94 ailə yeni mənzillərə köçə biləcəklər.
MTN bandasının şantaj videoları tapıldı
24.02.2016
Milli Təhlükəsizlik Nazirliyi rəhbərliyinin insanları şantaj üçün istifadə etdiyi gizli çəkilişlər olan videomateriallar tapılıb.
Ölkə.Az xəbər verir ki, məlumatı azadliq.info yayıb. Sayt bildirir ki, hazırda istintaq bu şəbəkənin şantaj əməliyyatlarını araşdırır. Xəbərə görə, şəbəkənin üzvlərindən bir neçəsinin, xüsusilə Akif Çovdarovun nəzarətində əyləncə mərkəzləri, hotel və restoranlar olub ki, ora video kameralar yerləşdirilib. Həmin obyektlərdə dincələn vəzifəli, yaxud imkanlı şəxslər sonradan videogörüntülərlə şantaj olunub.
Eldar Mahmudovun şəbəkəsinin zərərsizləşdirilməsi ilə bağlı əməliyyatlar zamanı dəstə üzvlərindən bir neçəsinin evindən şantaj videoları çıxıb. İstintaq bu məsələni daha dərindən araşdıraraq hansı vəzifəli şəxslərin MTN-nin şantajına qalmasını üzə çıxarmağa çalışır. İstintaqda şübhələr var ki, bəzi məmurlar şantajın qurbanı olaraq hələ də şəbəkəyə xidmət göstərə bilər.
Azərbaycanın dini liderlərindən dünyaya müraciət
24.02.2016
Azərbaycanda fəaliyyət göstərən dini icmaların rəhbərləri dünya dini liderlərinə, parlamentlərə, beynəlxalq təşkilatlara və İnsan hüquqları üzrə Avropa Məhkəməsinə müraciət ünvanlayıb.
Ölkə.Az xəbər verir ki, Şeyxülislam Allahşükür Paşazadə (Qafqaz Müsəlmanları İdarəsinin sədri) ALEKSANDR (Bakı və Azərbaycan Arxiyepiskopu), Melih Yevdayevin (Azərbaycandakı Dağ yəhudiləri icmasının rəhbəri) imzaladığı müraciət Xocalı soyqırımı ilə bağlıdır.
Xocalı soyqırımı ilə bağlı 39 nəfər axtarılır
24.02.2016
Xocalı soyqırımında təqsirli bilinən 39 nəfər barəsində soyqırımı və digər ağır maddələrlə məhkəmələr tərəfindən həbs qətimkan tədbiri seçilib, onlar axtarışa verilib.
Ölkə.Az APA-ya istinadən xəbər verir ki, bunu Baş Prokurorluq, Daxili İşlər Nazirliyi və Dövlət Təhlükəsizlik Xidmətinin birgə yaradılan İstintaq Qrupunun üzvü Ələkbər Xəlilov deyib.
O qeyd edib ki, axtarışa verilənlərdən 18 nəfəri 366 motoatıcı alayın hərbçiləri olub:
“Onların arasında erməni, rus və başqa millətlərdən olan şəxslər var. Eyni zamanda, axtarışa verilənlər arasında Xankəndi və Əsgəran polis idarəsinin əməkdaşları da var”.
Ə.Xəlilov əlavə edib ki, istintaq-əməliyyat tədbirləri davam etdirilir.
Azərbaycan Rusiyaya nota verdi
24.02.2016
“Ermənistana hücum xarakterli silah və hərbi texnikanın verilməsi münaqişənin həllinə xidmət etmir”
Rusiya tərəfindən Ermənistana silah və hərbi texnikanın alınmasını nəzərdə tutan 200 milyon ABŞ dolları məbləğində kreditin verilməsinə dair sazişin 10 fevral 2016-cı il tarixində qüvvəyə minməsi ilə əlaqədar Azərbaycan Xarici İşlər Nazirliyi tərəfindən Rusiya Federasiyası XİN-ə nota ünvanlanıb.
Polisi döyən Abdullayevlər ailəsini tutdular — RƏSMİ
24.02.2016
Bakıda polisə hücum etmiş şəxslər saxlanılıb.
Azərbaycanın Baş Prokurorluğunun mətbuat xidmətindən Ölkə.Az-a verilən məlumata görə, hadisə fevralın 24-də baş verib.
Belə ki, paytaxtın Xəzər rayonu ərazisində xidmətdə olan polis serjantları Vüqar Abbasov və Ceyhun Ağayev işıqforun qadağanedici siqnalında hərəkət edən “VAZ 2107” markalı 10-DL-542 dövlət qeydiyyat nişanlı avtomobilə saxla işarəsi versələr də, sürücü polis əməkdaşlarının qanuni tələblərinə tabe olmayaraq yüksək sürətlə hərəkətini davam etdirib.
Qayda pozucusu avtomobilini yaşadığı Mərdəkan qəsəbəsi, Qızılqum bağlar masisivində avtomobilini saxlayıb.
“Avtomobili saxladıqdan sonra sürücü Rakif Abdullayev, avtomobildə olan qardaşı Gülbala Abdullayev və atası Rafiq Abdullayev ətrafda olan daş, taxta və digər küt alətlərdən istifadə edərək polis əməkdaşları V.Abbasova və C.Ağayevə fiziki zor tətbiq etməklə müxtəlif bədən xəsarətləri yetiriblər.
Səhiyyə Nazirliyi: Depressiya halları artıb
24.02.2016
“Bizim Mərkəzə hər il təxminən 2 000 yeni xəstə müraciət edir. 2014-cü ildə bu say 1 680-dən, 2015-ci ildə 1 900-dən çox olub”.
Ölkə.Az xəbər verir ki, bunu APA-ya Səhiyyə Nazirliyinin Psixi Sağlamlıq Mərkəzinin (PSM) rəhbəri, Azərbaycan Tibb Universitetinin Psixiatriya kafedrasının professoru, tibb elmləri doktoru Fuad İsmayılov deyib.
O bildirib ki, Ümumdünya Səhiyyə Təşkilatının (ÜST) məlumatına görə depressiyaya meyllilik kişilərə nisbətən qadınlarda 2 dəfə çoxdur: “Bu, Azərbaycana da aiddir”.
F. İsmayılov “Azərbaycanda intihar edənlərin neçə faizi ruhi xəstələrdir?” sualına cavab olaraq deyib ki, psixi sağlam olan insan heç vaxt intihar etmir: “İnsanda ən azı krizis vəziyyəti, depressiya halı olmalıdır ki, o özünü öldürsün. Hazırda bütün dünya üzrə, o cümlədən də Azərbaycanda depressiya hallarının sayı artıb”.
“Kredit milyonçularının” həbs müddəti artırıldı
25.02.2016
Nərimanov Rayon Məhkəməsində “Azərbaycan Beynəlxalq Bankı” ASC-dən kredit götürərək qaytarmamaqda günahlandırılan daha 8 nəfər iş adamı barəsində seçilmiş həbs qətimkan tədbirinin müddəti uzadılıb.
Ölkə.Az xəbər verir ki, “Report”un əldə etdiyi məlumata görə, həmin iş adamları barəsində həbs qətimkan tədbirinin müddəti üç ay artırılıb.
Bununla da Beynəlxalq Bank işinə görə saxlanılan və barəsində seçilmiş həbs qətimkan tədbirinin müddəti uzadılan iş adamlarının sayı 11 olub.
Qeyd edək ki, daha əvvəl “Azərbaycan Beynəlxalq Bankı” ASC-dən kredit götürərək qaytarmamaqda günahlandırılan “City Developer” MMC-nin direktoru Ratmir Bəkirov, “Azərbaycan Consaltinq Qrup” MMC-nin rəhbəri Erhan Cavad Yavuz və "Şəki İpək Aqro" MMC-nin icraçı direktoru Cavid Muxtarov barəsində də seçilmiş həbs qətimkan tədbirinin müddəti üç ay artırılıb.
Prokurorların səlahiyyətləri artırılır
25.02.2016
Azərbaycanda bir sıra məsələlərdə prokurorların səlahiyyətlərinin artırılması nəzərdə tutulur.
Ölkə.Az xəbər verir ki, hüquqşünas-ekspert Ərşad Hüseynov bildirib ki, bu məsələ Milli Məclis tərəfindən qəbul edilən yeni İnzibati Xətalar Məcəlləsində öz əksini tapıb.
Onun sözlərinə görə, yeni İnzibati Xətalar Məcəlləsində əksər xəta tərkibləri, məsuliyyətə cəlb etmə qaydası və digər məsələlər köhnədə olduğuna oxşardır.
Məcəllədə ən ciddi konseptual yenilik prokuror nəzarəti ilə bağlıdır
Xocalı soyqırımı Peru mətbuatında
25.02.2016
Perunun ən nüfuzlu qəzetlərindən biri olan “El Peruano“ qəzetində Xocalı soyqırımına həsr olunmuş ““Xocalı soyqırımı” adlı məqalə dərc edilmişdir.
Məqalədə erməni hərbi birləşmələrinin keçmiş SSRİ-nin 366-cı alayının yardımı ilə Azərbaycan Respublikasının Dağlıq Qarabağ bölgəsində yerləşən Xocalının əhalisinə qarşı 1992-ci ilin 26 fevralında törətdiyi soyqırımından danışılır.
Ermənilərin qadın, uşaq, qoca demədən Xocalının azərbaycanlı əhalisini misli görülməmiş şəkildə xüsusi amansızlıqla öldürdüyü, baş verən qətliamın 20-əsrin ən böyük faciələrindən biri olduğu məqalədə qeyd olunur.
Xamenei şeyxlə Azərbaycan dilində danışdı
25.02.2016
Qafqaz Müsəlmanları İdarəsinin (QMİ) sədri Hacı Allahşükür Paşazadə ilə İranın Ali Rəhbəri Seyid Əli Xamenei arasında görüş çox səmimi şəraitdə keçib.
Bu barədə İranın Bakıdakı səfiri Möhsün Pakayin bildirib.
Səfirin sözlərinə görə, görüşdə Allahşükür Paşazadə ilə Xamenei Azərbaycan dilində danışıb, bir sıra məsələlərlə bağlı fikir mübadiləsi aparıblar.
“Səfər çərçivəsində prezident İlham Əliyev Həsən Ruhanini Azərbaycana səfərə dəvət edib. Düşünürəm ki, bu səfər iki ölkə münasibətlərində yeni səhifə açacaq. Yaxın 6 ay ərzində ölkələrimiz arasında böyük hadisələrin şahidi olacağıq”,-deyə səfir bildirib.
HİV-dən qoruyan üzük yaradıldı
25.02.2016
ABŞ Milli Səhiyyə İnstitutunun tədqiqatçıları dapivirinli vaginal üzük icad ediblər, üzük HİV-ə yoluxma riskini yetərincə azaldır.
Ölkə.Az oxu.az-a istinadən xəbər verir ki, tədqiqat işi “The New England Journal of Medicine” jurnalında dərc edilib.
Tədqiqatda HİV ilə mübarizənin ənənəvi üsullarının uğurlu olmadığı Cənubi Afrika, Uqanda, Zimbabve və Malaviya sakinləri iştirak edib.
Üzük 18-45 yaşarası 2629 qadında sınaqdan keçirilib.
Xocalıdan 24 il ötür...
26.02.2016
Bu gün Xocalı faciəsindən 24 il ötür.
1992-ci il fevralın 26-da Ermənistan hərbi birləşmələri 7 min əhalisi olan Xocalı şəhərində soyqırım aktı həyata keçirib.
Xocalı soyqırımı zamanı 613 nəfər öldürülüb, 1000 nəfər müxtəlif yaşlı dinc sakin aldığı güllə yarasından əlil olub. 106 nəfər qadın, 63 azyaşlı uşaq, 70 qoca qətlə yetirildi. 8 ailə tamamilə məhv edilib, 25 uşaq hər iki valideynini, 130 uşaq isə valideynlərindən birini itirib. Faciə baş verən gecə 1275 nəfər dinc sakin əsir götürülüb, onlardan 150 nəfərin taleyi indi də məlum deyil.
Şəhər əhalisinin bir hissəsi zorakılıqdan qaçıb canını qurtarmaq istəyərkən əvvəlcədən düzəldilmiş pusqularda qətlə yetirilib. Rusiyanın "Memorial" hüquq-müdafiə mərkəzinin məlumatına əsasən, dörd gün ərzində yalnız Ağdama Xocalıda qətlə yetirilmiş 200 azərbaycanlının meyiti gətirilib, onlarla meyitin təhqirə məruz qalması faktı aşkar edilib. Ağdamda 181 meyit (13-ü uşaq olmaqla 130 kişi və 51 qadın) məhkəmə-tibbi ekspertizadan keçirilib.
Ekspertiza zamanı müəyyən edilib ki, 151 nəfərin ölümünə güllə yaraları, 20 nəfərin ölümünə qəlpə yaraları səbəb olub, 10 nəfər küt alətlə vurularaq öldürülüb. Hüquq-müdafiə mərkəzi diri adamın baş dərisinin soyulması faktını da qeydə alıb.
Xocalı soyqırımı Azərbaycan tarixinə ən dəhşətli və faciəli səhifələrdən biri kimi daxil olub.
Xocalı soyqırımının ildönümü hər il Azərbaycan və dünyanın bir çox ölkələrində hüznlə qeyd olunur. Artıq dünyanın bir neçə ölkəsinin parlamenti Xocalı soyqırımını tanıyan qərar qəbul edib.
Prezident İlham Əliyev “Xocalı” abidəsini ziyarət etdi
26.02.2016
Azərbaycan prezidenti İlham Əliyev Bakıda Xocalı soyqırımı qurbanlarının xatirəsinə ucaldılmış “Xocalı” abidəsini ziyarət edib.
Ölkə.Az xəbər verir ki, prezident abidənin önünə əklil qoyub, faciə qurbanlarının xatirəsinə ehtiramını bildirib.
Mərasimdə Prezidenti hökumət və dövlət rəsmiləri müşayiət edib.
Anma mərasiminin iştirakçıları abidənin önünə tər qızılgüllər, qərənfillər düzüblər.
Bakı sakinlərinin “Xocalı” abidəsi önünə axını davam edir.
Qeyd edək ki, bu gün Xocalı faciəsindən 23 il ötür.
Bakının siması tamamilə dəyişiləcək
26.02.2016
Bakı şəhəri tamamilə dəyişəcək. Paytaxtımızda sürət qatarları, tramvaylar şütüyəcək, dənizin içərisinə doğru yaşıllıq zolaqları salınacaq, əhalinin məskunlaşması artırılacaq. Bütün bunlar yeni layihədə əksini tapib.
Ölkə.Az-ın XəzərXəbər-ə istinadən verdiyi məlumata görə, söhbət Bakı şəhərinin Ərazidən İstifadə və Zonalaşdırma Planından gedir.
Layihə üzərində işlərə 5 aydır başlanılıb. Bakı Dövlət Layihə İnstitutunda hazırlanan plana yalnız paytaxtın 12 inzibati rayonu daxil edilib.
Azərbaycanda icbari yığımın ödənilməməsinə görə yeni cərimələr
26.02.2016
Azərbaycanda ödəniş kartı ilə aparılan valyuta əməliyyatları üzrə qanunda nəzərdə tutulan hallarda icbari yığımın ödənilməməsinə görə cərimə tətbiq ediləcək.
Milli Məclisdən Ölkə.Az-a verilən məlumata görə, bununla bağlı İnzibati Xətalar Məcəlləsinə dəyişiklik edilməsi nəzərdə tutulur.
Yeni layihəyə əsasən, fiziki və hüquqi şəxslər inzibati xətanın bilavasitə obyekti olmuş ödənilməmiş icbari yığımın 100 faizi miqdarında cərimə edilir.
İlham Əliyevlə Putin arasında telefon danışığı
26.02.2016
Fevralın 26-da Azərbaycan Prezidenti İlham Əliyev ilə Rusiya Federasiyasının Prezidenti Vladimir Putin arasında telefon danışığı olub.
Ölkə.Az xəbər verir ki, telefon danışığı zamanı Azərbaycan Respublikası ilə Rusiya Federasiyası arasında ikitərəfli əməkdaşlıq münasibətlərinin aktual məsələləri, xüsusilə də ticarət-iqtisadi sahədə əməkdaşlıq ətrafında fikir mübadiləsi davam etdirilib.
Prezident AzTV rəhbərliyinin bu səlahiyyətini əlindən aldı — FƏRMAN
27.02.2016
Azərbaycan prezidenti İlham Əliyev "Azərbaycan Televiziya və Radio Verilişləri" Qapalı Səhmdar Cəmiyyətinin yaradılması haqqında" 2005-ci il 23 mart tarixli 213 nömrəli fərmanında dəyişiklik edilməsi barədə fərman imzalayıb.
Fərmana əsasən, "Azərbaycan Televiziya və Radio Verilişləri" Qapalı Səhmdar Cəmiyyətinin yaradılması haqqında" Azərbaycan Respublikası prezidentinin 2005-ci il 23 mart tarixli 213 nömrəli fərmanına (Azərbaycan Respublikasının Qanunvericilik Toplusu, 2005, № 3, maddə 171) aşağıdakı məzmunda 1-1-ci hissə əlavə edilib.
Əlavədə deyilir ki, cəmiyyətdə səhmdarların ümumi yığıncağının səlahiyyətlərinin həyata keçirilməsi aşağıdakı dövlət orqanlarına həvalə edillir:
Azərbaycan Respublikasının prezidentinə: -cəmiyyətin yenidən təşkili və ləğvi məsələlərinin həll edilməsi; - cəmiyyətin sədrinin və onun müavinlərinin vəzifəyə təyin və vəzifədən azad edilməsi.
İndiyə qədər İdarə Heyətinin müstəqil şəkildə Cəmiyyətin təsis etdiyi hüquqi şəxslərin, filialların və nümayəndəliklərin vəzifəli şəxslərini təyin etmək və onların əməkhaqqını müəyyən etmək səlahiyyəti olub. Dəyişikliyə əsasən isə, artıq İdarə Heyəti "Azərbaycan Televiziya və Radio Verilişləri" QSC-nin törəmə müəssisələrinin, habelə idarə, filial və nümayəndəliklərinin rəhbərlərinin vəzifəyə təyin və vəzifədən azad edilməsinə Nazirlər Kabinetinin razılığını almalıdır.
Milli Məclisin xərcləri azaldılır
27.02.2016
Milli Məclisin 2016-cı il üçün nəzərdə tutulan xərcləri azaldılır.
Ölkə.Az-ın Trend-ə istinadən məlumatına görə, bu barədə məsələ Milli Məclisin martın 4-nə planlaşdırılan növbəti iclasının gündəliyinə daxil edilib.
Belə ki, “Azərbaycan Respublikası Milli Məclisinin 2016-cı il üçün xərclər smetası haqqında” Milli Məclisin 2015-ci il 20 oktyabr tarixli qərarına edilən dəyişikliyə əsasən, Milli Məclisin və onun aparatının 2016-cı il üçün xərclər smetası 22 694 934 manat məbləğində müəyyən edilib.
Qeyd edək ki, Milli Məclisin 14 oktyabr 2015-ci il tarixli iclasında 2016-cı il üçün xərclər smetası 22 745 955 manat müəyyən edilmişdi.
