ABŞ hərbi armadası Cənubi Çin dənizinə daxil oldu
ABŞ-ın təyyarədaşıyan gəmi də daxil olmaqla dəniz eskadrası Cənubi Çin dənizinə daxil olub.
Ölkə.az xəbər verir ki, "Con Stennis" təyyarədaşıyan gəmisi başda olmaqla 2 kreyser və 2 universal hərbi gəmidən ibarət eskadra Parasel və Spratli mübahisəli adalarının olduğu bölgəyə yaxınlaşıb.
Bu mübahisəli adaları eyni vaxta Çin, Filippin, Malayziya, Tayvan və Bruney öz əraziləri hesab edirlər. Çinin son vaxtlar bu bölgədə hərbi gücünü artırması geridə qalan dövlətlərin ciddi narazılığına və narahatlığına səbəb olmuşdu.
Çinin ümumiyyətlə Sakit okeanı hövzəsində donanmasını gücləndirərək bölgənin jandarmına çevrilmək istəyi isə Vaşinqtonu bərk narahat edir. Ona görə də ABŞ bölgədəki hərbi bazalarını gücləndirir və Çinin ekspansiyanın qarşısını almaq üçün ciddi tədbirlər görür.
ABŞ eskadrasının Cənubi Çin dənizinə daxil olması da bu tədbirlər planının tərkib hissəsidir.
