Hesablama Palatası materialları Baş Prokurorluğa göndərib

İki nəzarət tədbiri üzrə yoxlama materialları Baş Prokurorluğa göndərilib.

Cari ilin ilk 6 ayı ərzində Palata tərəfindən, İş Planına uyğun olaraq, 48 nəzarət tədbirinin başlanması, bundan 27-sinin nəticələri üzrə qərar qəbul olunub.

Ölkə.Az xəbər verir ki, Hesablama Palatasının mətbuat xidmətindən verilən məlumata görə, həyata keçirilməsi qərara alınmış tədbirlərin 4-ü dövlət büdcəsinin gəlirlərini, qalan 43-ü dövlət büdcəsinin, biri Dövlət Sosial Müdafiə Fondunun  xərclərini əhatə edib. Hesabat dövrü ərazində dövlət büdcəsinin xərclərini əhatə edən audit tədbirləri ilə yanaşı bir ekspert-analitik təhlildə başa çatdırılıb.

“Qərar qəbul edilmiş nəzarət tədbirlərinin əhatə etdiyi ümumi məbləğin 10,1%-ni sosial xərclər, 61,8%-ni əsaslı vəsait qoyuluşları təşkil edib. Audit olunan vəsaitin 80,8%-ni mərkəzləşdirilmiş xərcləri, 19,2%-ni yerli xərcləri əhatə edib.

Nəticələri barədə qərar qəbul olunmuş nəzarət tədbirləri üzrə Hesablama Palatası tərəfindən müvafiq qurumlara 36 təqdimat göndərilib.

Bəzi nəzarət tədbirlərinin nəticələrinin hesabat dövrünün sonunda müzakirə olunduğunu nəzərə alsaq, 23 tədbir üzrə Kollegiya qərarının icrası ilə bağlı Palataya təqdim edilmiş məlumatlara əsasən 2014-cü ilin ilk 6 ayı üçün, ümumilikdə 1479,8 min manat məbləğində vəsaitin bərpası, yerinə yetirilməmiş iş və xidmətlər üzrə 108,8 min manat məbləğində işlərin və xidmətlərin görülməsi, 1128,7 min manat məbləğində çatışmayan və ya müqavilə öhdəliklərinin yerinə yetirilməsi təmin olunmayan inventar və avadanlıqların, dərman vasitələrinin büdcə təşkilatlarına təhvil verilməsi təmin edilmiş, 270,5 ştat vahidi azaldılıb”, - məlumatda deyilir.

Qeyd edilir ki, cari ilin 6 ayı ərzində həyata keçirilmiş audit tədbirləri nəticəsində aşkar edilmiş nöqsan və çatışmazlıqlara yol verən 113 nəfər məsul şəxs barəsində aidiyyəti orqanlar tərəfindən müxtəlif intizam tənbehi tədbirlərinin görülməsinə də nail olub.

Bundan əlavə, 2 nəzarət tədbiri üzrə yoxlama materualları Baş Prokurorluğuna göndərilməsi qərara alınıb.

Ölkə.Az