“Bakı-2015”-ə hazırlıq işləri intensivləşdiriləcək
“Yaşıl dalğa” prinsipinin tətbiqi istiqamətində də iş aparılır.
“Nəqliyyat-yol kompleksi üzrə Tədbirlər Planı”nda nəzərdə tutulan işlərin əsas hissəsinin icrası sentyabr-dekabr aylarında daha da intensivləşəcək.
Ölkə.Az azərtac-a istinadən xəbər verir ki, bu barədə Nəqliyyat Nazirliyinin mətbuat katibliyinin rəhbəri Namiq Həsənov bildirib.
Onun sözlərinə görə, gələn il Bakıda keçiriləcək I Avropa Oyunları ilə əlaqədar nəqliyyatın ahəngdar fəaliyyətinin, daşımaların təhlükəsizliyinin təmin edilməsinin və digər təşkilati məsələlərin əlaqələndirilməsi istiqamətində təxirəsalınmaz tədbirlər uğurla həyata keçirilir.
Plana əsasən nəqliyyat-yol kompleksinin müxtəlif istiqamətləri üzrə qurumun tərkibində olan təşkilatların konkret vəzifələri, görəcəyi işlər müəyyənləşdirilib. Buraya həm yolların çəkilişi, yeni qatarların, avtobus və taksilərin alınması ilə bağlı danışıqların aparılması, həm də müəyyən marşrutlar üzrə hərəkət sxemlərinə dəyişikliklər edilməsi aiddir.
Beynəlxalq Avtovağzal Kompleksi də daxil olmaqla, rayonlardakı avtovağzalların işlərinin əlaqələndiriləcəyini, paytaxtda sərnişin nəqliyyatında kart-ödəniş sisteminin tətbiqinin sürətləndiriləcəyini qeyd edən N.Həsənov bildirib ki, planda nəzərdə tutulan bütün tədbirlər 2015-ci ilin birinci rübünədək – I Avropa Oyunları başlayana qədər tam yekunlaşdırılacaq.
Elə layihələr var ki, onların icrasını bir qədər də sürətləndirmək lazım gəlir. Buna 500 ədəd taksinin alınmasına dair imzalanan müqaviləni misal göstərmək olar. Bu haqda danışan N.Həsənov məlumat verib ki, müqavilədə son müddət olaraq 2015-ci ilin birinci rübü göstərilsə də, taksilərin ilk hissəsinin Bakıya bu ilin oktyabr-noyabr aylarında gətirilməsi planlaşdırılır. Həmin taksilər, ilk növbədə, rəsmi heyətə, idmançılara, turistlərə xidmət edəcək.
N.Həsənov qeyd edib ki, nəqliyyatı intellektual idarəetmə sistemi ilə bağlı işlər də sürətləndirilir. Artıq paytaxtın mərkəzindəki avtobus dayanacaqlarında quraşdırılan informasiya terminalları ilə Nəqliyyatı İntellektual İdarəetmə Mərkəzi arasında bağlantı tam təmin olunub. Mərkəz tərəfindən, həmçinin daha çox işıqforda avtomobillərin orta sürətini arıtmağa imkan verən “yaşıl dalğa” prinsipinin tətbiqi istiqamətində də iş aparılır.
Ölkə.Az
