Bakıda tapançalı Qaqaş tutuldu
Respublikanın daxili işlər orqanları cinayətkarlıqla mübarizə sahəsində növbəti əməliyyat tədbiri həyata keçirib.
Ölkə.Az-ın APA TV-ə istinadən məlumatına görə, Nizami Rayon Polis İdarəsinin (RPİ) 23-cü Polis Bölməsinə Bakı şəhər sakini əvvəllər məhkum olunmuş Qaqaş Musayevdə odlu silah olması barədə əməliyyat məlumatı daxil olub. Keçirilən təxirəsalınmaz tədbirlər nəticəsində Q.Musayev rayon ərazisində saxlanılaraq bölməyə gətirilib. Onun üzərinə baxış zamanı sandıqçasında 5 ədəd patron olan “Naqan” markalı tapança aşkar olunaraq götürülüb.
Təhqiqatçı Tərlan İbrahimli həmin şəxsin üzərinə keçirilən baxış zamanı 1 ədəd “Naqan” tipli revolver və 5 ədəd güllənin müəyyən edildiyini bildirib:
“Aparılan araşdırma zamanı dindirilən Musayev Qaqaş Xanlar oğlu bildirib ki, həmin silahı təxminən 15 gün əvvəl metronun “Xalqlar dostluğu” stansiyası yaxınlığındakı parkda gəzərkən ağacın dibindən tapıb və silahın yararlılığını yoxlamaq üçün bir dəfə atəş açıb. Bundan sonra isə həmin silahı üstündə gəzdirib”.
Saxlanılan şəxs Qaqaş Musayev isı gecə ikən silahı parkdan tapdığını qeyd edib:
““Naqan” tipli tapança idi. Ondan sonra böyrümdə gəzdirirdim. Gecə saatlarında “Sərin” restoranının yanından gəlirdim yavaş-yavaş. İki nəfər yaxınlaşdı və 23-cü Polis Bölməsinə gətirdilər. Orda da silahı təhvil vermişəm”.
Faktla bağlı Nizami RPİ-nin İstintaq Şöbəsində cinayət işi başlanıb, araşdırmalar davam etdirilir.
