Kirayədə yaşayan tanınmış aktyorlarımız

Bu gün Azərbaycanda teatr aktyorlarının bayramı-milli teatr günü qeyd olunur.

Ancaq nə qədər bayram əhval-ruhiyyəsində olsalar da, onların bir qismi hazırda evsizdir. Bəziləri yaxın adamlarının evində, bəziləri isə kirayələrdə yaşayaraq, sənətlə məşğul olmağa çalışırlar.

Ölkə.az onların bir qismini təqdim edir.

Akademik Milli Dram Teatrının bir çox seriallardan da tanıdığımız aktrisası Rada Nəsibova hazırda kirayədə yaşayır. Ana teatrın digər aktrisası, əməkdar artist Şəlalə Şahvələdqızı da anasıyla birgə kirayədədir. "Azdrama"nın digər iki "kirayənişini" isə aktrisa Şəhla İsmayılova və aktyor Sərdar Rüstəmovdur.

Gənc Tamaşaçılar Teatrının iki tanınmış siması da mənzil problemindən əziyyət çəkir. Bir sıra telelayihələrin aparıcısı olmuş aktyor Elnur Kərimov və təcrübəli aktyor, əməkdar artist Elşən Rüstəmov sözügedən teatrın evsiz aktyorlarıdır. Teatrın digər tanınmış siması, əməkdar artist Nicat Kazımov isə uzun müddət qayınanasının evində yaşasa da, sonradan həmin evin ikinci mərtəbəsini inşa etdirərək orada məskunlaşıb.

Bakı Uşaq Teatrından kirayədə yaşayan yeganə aktyor bir müddət öncə böyrəyini satacağını söyləyən Cavanşir Məhərrəmovdur.

Dövlət Musiqili Teatrından isə cəmi bir aktyor kirayədə ömür-gün sürür. Bu əməkdar artist Novruz Qartaldır.

İntiqam VALEHOĞLU
Ölkə.az