Ağcabədi icra başçısının şok səs yazısı yayıldı

İcra başçısı bir müddət öncə Ağcabədi rayonunun Şənlik kəndinə əhali ilə görüşməyə getmiş və görüşdə bir sıra məsələlərə toxunmuşdur.

Ölkə.Az xəbər verir ki, bu görüşdən sonra cumhuriyyet.az-a göndərilən səs yazısında Şahin Məmmədov kənd əhalisinə deyir ki, onlara içməli su və təmir olunmuş yol lazımdır: “İcra başçısı bildirib ki, kimin nəyinə lazımdır ki, hansısa işə nə qədər pul ayrıldığını öyrənməyə cəhd etsin. Bu pullar kiminsə dədəsinin deyil ki, narahat olsunlar. Əgər mən bu pullara tamah salmıramsa, siz niyə tamah salırsınız? Ən maraqlısı isə bu olub ki, Şahin Məmmədov əhaliyə deyib ki, bura gəlib işləmək istəyən təşkilatlar yazı-pozudan qorxur. Əgər bir də bu kənddən kimsə, hansısa şikayət dolu yazını yazıb mətbuata ötürsə onu əhali yığışaraq daş qalaq etsinlər”.

Hörmətli başçı bilməlidir ki, ölkə ərazisində istənilən işə ictimai nəzarəti həyata keçirmək üçün prezident İlham Əliyev cənabları xalqa çağırış edib. Cənab prezident eyni zamanda xalqa çağırış edərək rüşvətə korrupsiyaya qarşı aparılan kampaniyada əhalini fəal olmağa çağırıb. Yəqin bütün bu kimi işlər icra başçısı Şahin Məmmədovun planlarını alt-üst edir.

Mövzunu diqqətdə saxlayacağıq.