Nardaranda \"Bilik evi\"nin açılışı olub

Nardaran qəsəbəsində Bilik Fondunun Nardaran "Bilik evi"nin açılış mərasimi olub. 

Mərasimdə millətlərarası, multikulturalizm və dini məsələlər üzrə dövlət müşaviri, akademik Kamal Abdullayev, Sabunçu Rayon İcra Hakimiyyətinin başçısı Adil Vəliyev, millət vəkili Dilarə Cəbrayılova və başqaları iştirak edib.

Nardaranda Bilik evinin yaradılmasını dövlətin yerli əhaliyə diqqət və qayğısının daha bir nümunəsi kimi dəyərləndirən akademik Kamal Abdullayev bu ocaqda gənclərin və yeniyetmələrin dünyagörüşünün hərtərəfli inkişafı üçün geniş şərait yaradıldığını, müxtəlif kursların təşkil olunacağını, mütəmadi olaraq ədəbiyyat, incəsənət və dövlət xadimləri ilə maraqlı görüşlərin keçiriləcəyini, gənclərə elmi biliklərlə yanaşı, peşə vərdişlərinin də aşılanacağını vurğulayıb.

Son illər ölkə başçısının göstərişi ilə Nardaranda abadlıq işlərinin sürətlə inkişaf etdiyini deyən Sabunçu Rayon İcra Hakimiyyətinin başçısı Adil Vəliyev "Bilik evi"nin yaradılması münasibəti ilə Nardaran gənclərini təbrik edib.

Tədbir Nardaran məktəblilərinin hazırladığı bədii-musiqili proqramla davam edib. Mirzə Fətəli Axundzadənin "Hekayəti-Müsyö Jordan həkimi-nəbatat və dərviş Məstəli şah" əsərinin motivləri əsasında səhnəcik göstərilib, şagirdlər şeirlər söyləyib, mahnılar oxuyub, “Azərbaycan multikulturalizminin ədəbi-bədii qaynaqları” kitabından parçalar səsləndiriblər. 
 

Qeyd edək ki, yaxın gələcəkdə Gəncə, İsmayıllı və Astarada Bilik evlərinin açılması nəzərdə tutulur.

Ölkə.Az