"Bizim aviasiyamız İŞİD-ə heç nə edə bilmədi"
Rusiya Suriyadakı hərbi hava qrupunu bu ölkədən çıxarmaq qərarına gəlib.
Ölkə.az xəbər verir ki, Putinin bu qərarı dünya mediasının manşetindədir və Rusiyanın özündə də bu qərar birmənalı qarşılanmayıb.
Rusiyanın aparıcı KİV-lərində çıxış edən bir sıra politoloqlar və hərbi ekspertlər Kremlin bu addımını tənqid ediblər. Rusiyada tanınmış hərbi aviasiya üzrə müstəqil ekspert Vadim Lukaşeviç Putinin Suriyadakı hərbi kampaniyasını və sonda alınan bu qərarı analiz edib.
Ekspert bildirib ki, əməliyyatlara başlayandan atəşkəs haqda razılıq əldə olunana qədər Rusiya aviasiyasının təyyarələri 9 min döyüş uçuşu keçirib. Rusiya Müdafiə Nazirliyinin verdiyi rəsmi məlumata görə isə məhv edilmiş yaraqlıların ümumi sayı 2 min nəfərdir.
"Bu çox, hətta həddən aşağı göstəricidir. Belə çıxır ki, Rusiya aviasiyası hər 4-5 döyüş uçuşu zamanı yalnız bir terrorçu məhv edib. Hər uçuş zamanı tökülən tonlarla bombalar isə boş yerə sərf olunub. Bundan başqa bütün dünya bizim Suriyadan qaçdığımızı danışır. Çünki müxaliflərin Suriyaya məxsus Miq-21 qırıcısını vurmasından sonra biz tələsik olaraq hərbi əməliyyatları dayandırıb, aviasiyamızı Suriyadan çıxarırıq. Buna nə ad vermək olar? Ümumilikdə isə belə nəticəyə gəlmək olar ki, Rusiya terrorçulara heç nə edə bilməyib", deyə ekspert bildirib.
Xatırladırıq ki, Rusiya prezidenti Putin srağagün gecə aldığı ani bir qərarla təyyarələrini Suriyadan çıxardı. Hazırda Rusiyaya məxsus təyyarələr ölkəyə geri gətirilir.
