"Suriyadan çıxmaq planı Rusiyanın növbəti hiyləsidir"

Rusiyanın Suriyadan çıxacağı xəbəri dünya mediasının gündəmini zəbt edib.

Putinin atdığı bu addım birmənalı qarşılanmır. Rusiyanın Suriyadan çıxmasının hansısa bir oyunun parçası və manevr olduğunu deyənlər də var. Rusiyadan əlavə İrana bağlı "Hizbullah" terror təşkilatının da Suriyadan çıxdığı barədə xəbərlər yayılıb. Rusiya Suriyadan həqiqətən çıxır, yoxsa bu bir oyundur?

Bu suala hərbi ekspert Üzeyir Cəfərov Ölkə.Az-a verdiyi açıqlamada cavab verib:

"Rusiyanın Suriyadan hərbi təyyarələrini çıxarması mənim üçün də çox gözlənilməz oldu. Bu Rusiya tərəfindən növbəti bir hiylədir. Rusiyanın məqsədi nə idi və nəyə nail oldu? Putin çaşqın bir vəziyyətdədir. Bu sadəcə olaraq bir görüntüdür, hiylədir, Bəşər Əsədi xilas etmək üçün növbəti bir oyundur. Bu oyun beynəlxalq ictimaiyyəti aldatmağa yönəlmiş bir oyundur. Rusiya hərbi bazalarından döyüş təyyarələrini geri çəkir, ancaq Rusiya Suriya ilə bağlı iddialarından heç vaxt geri çəkilməyəcək. Rusiyanın qeyri-səmimi addımları hər şeydə özünü büruzə verir.

Türkiyə ilə bağlı məsələlərdə bunu görmək olar. Türkiyə vətəndaşlarını Rusiyadan deportasiya edən Kreml indi miqrasiya xidməti vasitəsi ilə deyir ki, qayda-qanuna əməl edən türklər Rusiyada çox rahat yaşaya bilərlər. Yaxud, qoşunlarını Suriyadan geri çəkən Rusiya "S-400" zenit-raket komplekslərini Suriyadan çıxarmağı düşünmür. Bu necə çəkilmədir ki, döyüş təyyarələrini çıxarır, ancaq "S-400" zenit-raket kompleksini Suriyada saxlayır? Bunu hansısa sıravi bir adam deyil, Rusiya prezident admistrasiyasının başçısı Sergey İvanov bəyan edir ki, zenit-raket kompleksləri döyüş təyyarələrini effektli qorumaq üçün lazımdır. Əgər orada döyüş əməliyyatları aparılmayacaqsa, bu kompleksləri orada niyə saxlayırlar? Aydın görünür ki, bu, Rusiyanın növbəti oyunlarından biridir.

Donbasda vəziyyət yenidən pisləşib. Rusiya orada yenidən başını alova salmaq istəməz. Donbasla bağlı danışıqlar üçün ABŞ-ın dövlət katibi Con Kerri Moskvaya gələcək. Ukrayna məsələsi ilə bağlı Moskvada iki dövlət arasında çox ciddi danışıqlar olacaq.

Putinin vəziyyəti çox çətindir. Sergey Şoyqu ilə Sergey Lavrovun Putinin qəbulunda Suriya ilə bağlı qərarı verərkən üz cizgilərinə fikir verəndə bu qərardan çox narazı olduqlarını aydın görmək olardı. Rusiya kimi nəhəng bir dövlətə hamı qeyri-ciddi yanaşma sərgiləyir ki, İŞİD-lə mübarizə aparırdınsa, bəs nəyə nail oldun, niyə qoşunları geri çəkirsən? Putin deyir ki, biz məqsədimizə nail olduq. Məqsəd nə idi? Bunun cavabını tapmaq lazımdır.

Dünəndən Suriyadakı döyüş təyyarələrini hazırlayırlar ki, oradan çıxarsınlar. Bununla bağlı geniş təbliğat da aparılır. Ancaq bunlar hamısı oyundur, dünyanınn gözünə kül üfürməkdir.

Ankara dünyanın ən sakit paytaxtlarından biri idi. Ancaq son zamanlar orada teror aktlarının baş verməsi dünyanı ayağa qaldırdı. Artıq hər kəs bilir ki, bu tip hadisələrin başında Putinin yalnış siyasəti dayanır. Putinin səhv addımları beynəlxalq terrora dəstək oldu. Terrorçulara stimul verdi, onlar silahlandırıldı. Türkiyədə baş verən terror aktından bir neçə saat sonra Putin türk xalqına başsağlığı verdi. Prezident İlham Əliyev isə Ankara terrorundan dərhal sonra Türkiyəyə səfər etdi. Bütün bunların fonunda ruslar Qarabağda da vəziyyəti gərginləşdirə bilərlər. Ona görə də ordumuz təmas xəttində çox diqqətli və ayıq-sayıq olmalıdır".

Səxavət Məmməd
Ölkə.Az