Ağdamdakı qaçqın qəsəbələrinin qazı söndürüldü

Ağdamda yerlşən məcburi köçkünlərin yaşadığı qəsəbələrə qaz verilmir.

Qəsəbə sakinlərinin Ölkə.Az-a verdiyi məlumata görə, 1 həftədir ki, Ağdamda yerləşən Alıbəyli-1 və Alıbəyli-2 qəsəbəsinə qaz verilmir.

Sakinlərin bildirdiyinə görə, xüsusilə hava soyuq olanda qazın verilişini dayandırırlar. Ağdamın qaz idarəsinə zəng edib maraqlananda isə bildirirlər ki, qazı Bakıdan azaldıblar. Əgər verilən qazın həcmi Bakıdan azaldılıbsa, o zaman digər qəsəbələrdə niyə azaldılmayıb?

Qəsəbə sakinlərinin sözlərinə görə, verilən qazla nəinki evi qızdırmaq, hətta çay qaynatmaq və yemək bişirmək belə mümkün deyil. Ona görə də sakinlər alternativ yollardan istifadə etmək məcburiyyətində qalırlar.

"Bizə qazın verilməsi üçün yolu kəsək, yoxsa kilsə tikək?", deyə qəsəbə sakinləri bildirirlər.

Sakinlər həm də onu vurğulayıblar ki, hər iki qəsəbəyə qazı gecə saat 2-dən sonra verirlər. Bunun hansı məntiqə sığdığını isə nə sakinlər, nə də biz ayırd edə bilmədik. Bəlkə aidiyyatı orqanlar ayırd edə bilərlər.

Sakinlərdən biri redaksiyamıza gecə saat 2-dən sonra Alıbəyli-2 qaçqın qəsəbəsində çəkdiyi bu fotonu göndərib:

Səxavət Məmməd
Ölkə.Az