Güclü təsir edən maddələrdən istifadə edənlər həbs olunacaq
Azərbaycanda "Güclü təsir edən maddələr və onların külli miqdarının, habelə, zəhərli maddələrin siyahılarının təsdiq edilməsi haqqında" ayrıca qanun olacaq.
Ölkə.Az Trend-ə istinadən xəbər verir ki, bununla bağlı qanun layihəsi Milli Məclisin Hüquq siyasəti və dövlət quruculuğu komitəsinin bu gün keçirilən iclasında müzakirəyə çıxarılıb.
Komitə sədri Əli Hüseynli bildirib ki, Milli Məclisdə dəfələrlə narkotik vasitələr, psixotrop maddələr və onların prekursorlarının siyahısı təsdiqlənib, lakin bu məsələ indiyə kimi ayrı qanunla tənzimlənməyib: "Odur ki, belə bir qanunun qəbul olunması zərurəti ilə bağlı müvafiq layihə hazırlanıb və Milli Məclisə göndərilib".
Nazirlər Kabinetinin nümayəndəsi Ceyhun Hüseynov iclasda deyib ki, bu sənəd dövlət başçısının müvafiq sərəncamına əsasən, Nazirlər Kabineti, həmçinin, Səhiyyə, Ədliyyə, Daxili İşlər Nazirliklərinin, Azərbaycan Milli Elmlər Akademiyasının və Dövlət Gömrük Komitəsinin tövsiyələri əsasında hazırlanıb: "İndiyə qədər bu məsələ ölkəmiz üçün aktuallıq kəsb etmirdi. Ancaq indi belə bir aktuallıq meydana gəlib və bu baxımdan, müvafiq qanunun olması məqsədəuyğun sayılıb".
Güclü təsir edən maddələr və onların külli miqdarının siyahısında 81 maddə, zəhərli maddələrin siyahısında isə ilan zəhəri də daxil olmaqla 22 maddənin adı var.
Bununla bağlı həmçinin, Cinayət Məcəlləsinin 240.3.2-ci və 240-cı maddələrinə əlavə və dəyişiklik edilir. 240.3.2-ci maddəyə edilən əlavə və dəyişikliyə əsasən, güclü təsir edən maddələrə münasibətdə satış məqsədilə qanunsuz hazırlama, emal etmə, əldə etmə, saxlama, daşıma və ya göndərmə, habelə bu maddələri və ya onları hazırlamaq, yaxud emal etmək üçün avadanlığı qanunsuz satmaya görə 4 ildən 8 ilə qədər azadlıqdan məhrumetmə cəzası tətbiq olunur.
Müzakirələrdən sonra qanun layihəsi Milli Məclisin plenar iclasına tövsiyə olunub.
