Əzraillə "çilingağac" oynayan 10 insan
Bəziləri pilləkəndən yıxılaraq həyatını itirdiyi halda, digərləri təyyarədən yıxılaraq sağ qalmağı bacarır.
Ölkə.az sizə ölümə meydan oxumuş 10 insanın başına gələn təbiət, tibb və riyazi qanunlara belə tabe olmayan qeyri-adi hadisələri təqdim edir.
1944-cü ildə çavuş Nikolas Stefen Alkmeyd Almaniya üzərindən növbəti hava reydini həyata keçirirdi. Bu zaman onun olduğu təyyarə almanlar tərəfindən vurulur və düşmə zamanı təyyarə yanmağa başlayır. Stefan təyyarədən atılaraq ölməyi yanaraq ölməkdən üstün tutur. Paraşütü alovlar içərisində yandığından Alkmeydin sağ qalmaq üçün heç bir şansı qalmır. Beləliklə, o, 5500 metr hündürlükdən öncə şam ağaclarının, daha sonra isə yumşaq qarın üzərinə düşürək huşunu itirir. Bu hadisənin ən maraqlı tərəfi isə "uçuş" zamanı onun heç bir zədə almamasıdır. Tezliklə onu aşkar edən almanlar baş verən hadisədən o qədər təəccüblənmişdilər ki, nəinki onu sərbəst buraxdılar, hətta bu möcüzəvi hadisəni təsdiq edən sertifikat belə verdilər.
Mişel Fankın başına gələn hadisəni həkimlər möcüzə adlandırılar. Belə ki, o, iki yaşında olarkən suyun altında havasız 1 saat qalmasına baxmayaraq sağ qalmağı bacarıb. Qardaşı ilə gölün kənarında oynayan balaca Mişelin gözlənilmədən ayağı sürüşür və suya düşür. Onu yalnız 60 dəqiqə sonra tapmaq mümkün olur. Ürək döyüntüləri eşidilməyən və bədən hərarəti 18 dərəcə olan balacanı xəstəxanaya çatdırlırlar. Burada həkimlər xüsusi aparatla onun qanını isidirək həyata qaytarmağa çalışırlar. Bu hadisədən 3 saat sonra uşağın ürəyi yenidən döyünməyə başlayır.
Növbəti "ölməz insan" adlandıracağımız bu şəxs Finians Keycdir. O, dəmir yolunda işləyərkən partlayış baş verir və uzunluğu 1 metrdən çox olan dəmir onun beyin sümüyünü dəlib keçir. Yaşamağa davam edən Keycin həkimlərin müdaxiləsi ilə başından dəmir boru çıxarılır. Dəmirin beyini zədələməsi onun sağ tərəfini iflic vurmasına və psixikasında dəyişikliklər yaratmasına səbəb olur. Lakin buna baxmayaraq Finians Keyc yaşamağa davam edir.
Cianna Cesson ölümə hələ ana bətnində olarkən qalib gəlib. Onun 17 yaşlı anası 30 həftəlik hamilə olarkən uşaqdan qurtulmaq qərarına gəlir. Həkimə müraciət edərək abort olunmasını istəyir və abort xüsusi maddə ilə həyata keçirilir. Uşaqlıq yoluna yeridilən bu dərman qaydaya görə dölün inkişafına son qoymalı idi. Amma gözlənilməz hadisə baş verir və növbəti gün xəstəxanada uşaq səsləri eşidilir. Bir kiloqramdan az çəkisi olan körpə həkimlər tərəfindən xilas edilir. Uğursuz əməliyyatın nəticəsi olaraq Cianna beyin iflicindən əziyyət çəkir. Lakin buna baxmayaraq o sağlamdır və abortlardan imtina aksiyalarında iştirak edir. Bununla bərabər o marafonlara qatılır, səsini eşitdirməyə çalışır, qadınların və hələ doğulmamış körpələrin hüquqları uğrunda mübarizə aparır.
Təqdim edəcəyimiz növbəti hadisə isə ümumiyyətlə biologiya qanunlarına ziddir. Karlos Rodriqes 14 yaşı olarkən narkotik vasitələrin təsiri altında və sərxoş vəziyyətdə maşın qaçırır. Bu zaman Rodriqesin idarə etdiyi maşın dəmir boruya çırpılaraq qəzaya uğrayır. Zərbənin təsirindən Karlos maşının qabaq şüşəsindən çölə çıxaraq yerə dəyər və bu zaman başından güclü zədə olur. Bu dəhşətli hadisə nəticəsində Rodriqes beyninin yarısından məhrum olur. Beyninin 60%-dən çoxunun götürülməsinə baxmayaraq o nəinki sağ qalmağı bacarır, həm də ağlını və dərrakəsini belə saxlayır. Onun şəxsiyyəti, yaddaşı və əqli bacarıqlarında da heçbir dəyişiklik baş verməyib.
Haqqında bəhs edəcəyimiz növbəti qəhrəman isə həyatı ilə fantastik filmləri belə geridə qoyur. Roy Sallivan ildırım vurma nəticəsində sağ qalıb. Maraqlısı odur ki, Roy bunu nə az, nə çox, düz yeddi dəfə bacarıb. Bütün həyatı boyu yeddi dəfə ildırımın qurbanı olan Roy hər dəfə yanıq və digər ağır xəsarətlər alıb. İnsanın bütün həyatı boyu bir dəfə ildırım vurma ehtimalı 1:3000 təşkil edir. Statistikaya əsasən bir insanın sağ qalması şərti ilə yeddi dəfə ildırım vurması ehtimalı isə 2 200 000 000 000 000 000 000 000 : 1-dir. Qeyd edək ki, Salilvanun həyat yoldaşını da bir dəfə həyətdə paltar asarkən ildırım vurub.
Bəlkə də indi haqqında bəhs edəcəyimiz bu hadisəni filmlərdə belə görsək, inanmarıq. 2014-cü ildə Rusiyanın Severodvinsk şəhərində yaşlı təqaüdçü qadın qonşusu ilə dalaşarkən 39 bıçaq zərbəsi alır. Bu zaman onun demək olar ki, bütün həyati əhəmiyyətli, vacib orqanları ciddi zədə alır. Bundan sonra yaşaya bilmək mümkünsüz hesab olunsa da, bu yaşlı qadın bütün əməliyyatlardan uğurla çıxır və tezliklə ayağa qalxır.
İndi haqqında danışacağımız insanı isə sözün əsl mənasında "ölməz insan" adlandırmaq olar. Yer üzündə edamdan sonra sağ qalmağı bacarmış insan demək olar ki, yoxdur. Lakin Venseslao Maquel bu siyahıya aid deyil. Belə ki, o, Meksika üsyanı zamanı məhkəmə qarşısına çıxarılmadan güllələnmə cəzasına məhkum olunmuşdu. Edam zamanı 9 güllə alan Maquel edam nəzarətçisi tərəfindən ehtiyat üçün son bir gülləni də başından alır. İnanmaq çətin olsa da, Maquel nəinki möcüzəvi şəkildə sağ qalmağı, həm də əsgərlər gedəndən sonra oradan qaçaraq uzaqlaşmağı da bacarır.
1972-ci ildə JAT 367 təyyarə reysinə stüardessa Vesna Nikoliçin əvəzinə səhvən Vesna Vuloviç göndərilir. Təyyarə 10 min metr hündürlükdə olarkən partlayıcı qurğu işə düşür və partlayış nəticəsində kabinə əsas korpusdan ayrılır. Təyyarənin qalıqları qarla örtülmüş şam ağaclarının üzərinə düşür. On kilometr hündürlükdən yerə çırpılan təyyarənin qalıqları arasında Vesna Vuloviç yaşam mübarizəsini davam etdirir. Yerli sakinlər tərəfindən tapıldıqdan sonra 27 gün komada 16 ay isə xəstəxanada yatır. Bundan sonra ayağa qalxan keçmiş stüardessa yenidən işinə qayıtmaq istəsə də, hava yolu şirkəti onu yalnız ofis daxili işə yönləndirir. Bu hadisə Ginnesin Rekordlar Kitabında paraşütsüz ən hündür tullanma kimi qeydə alınır. Yəqin ki, bu rekordu hələ uzun illər kimsə yeniləyə bilməyəcək.
Franke Selak 1962-ci ilin qışında qatarla səyahət edərkən qatar relsdən çıxır və yolun kənarındakı buzlu gölə düşür. Bu faciə zamanı 17 nəfər ölür, lakin şok halında və bir çiyni çıxmış vəziyyətdə olan Selak sahilə üzməyi bacarır. Bu hələ başlanğıc idi. Bundan bir il sonra Selak təyyarədə olarkən gözlənilmədən təyyarənin qapısı açılır və burada olan 20 nəfərdən 19-u həyatını itirir. Selak saman tayasına düşdüyü üçün sağ qalır. 1966-cı ildə isə bu dəfə avtobusla səyahət edərkən avtobus çaya düşür, dörd nəfər ölür, o isə sıyrıqlarla ölümdən xilas olur. 1970-ci ildə avtomobili ilə gedərkən qəflətən maşın alovlanmağa başlayır. Benzin çəninin partlamasından bir neçə dəqiqə qabaq özünü çölə atmağı bacarır. 1973-cü ildə avtomobilin yanacaq nasosunda yaranan nasazlıq ucbatından yanacaq mühərrikin hər tərəfinə yayılaraq, alovlanmağa başlayır. Havalandırma dəliklərindən anında maşının içinə daxil olan alov Selakın yalnız saçlarını yandırır. Təyyarə, avtobus və maşından sonra sanki növbə piyada faciəsində idi. Belə ki 1995-ci ildə yolu keçərkən onu avtobus vurur. Bu dəfə də Selak canını qurtara bilir. Ölümə meydan oxuyan qəhrəmanımız bu dəfə yenə şəxsi avtomobilində idi. Döngəni dönərkən gözlənilmədən yük avtomobili ilə qarşılaşdı və qəzadan yayınmaq üçün sükanı var gücü ilə döndərdi. Bu zaman sükan qırıldı və Selak yenə zamanında cəld tərpənməyi bacardı. Artıq növbəti saniyə Selak 400 metrlik yüksəklikdən uçurumdakı avtomobilinin alışıb yanmasını izləyirdi. 2003-cü ildə pianino müəllimi işləyən Franke Selak ömründə ilk və son lotoreya bileti alaraq 1 milyon dollar qazandı və 2004-cü ildə o, "Doritos"un reklam siması olmağı qəbul etdi. Amma son anda Sidneyə təyyarəylə getməkdən imtina etdiyi üçün müqavilə ləğv olundu.
Hazırladı: Məhbubə Gülməmmədova
Ölkə.Az
