\"Terrorçu qadınlar çarşab geyinirlər deyə polis onları tuta bilmir\"

Türkiyənin İstanbul şəhərinin mərkəzində, İstiqlal prospektində güclü partlayış baş verib. Son məlumata görə, hadisə nəticəsində 4 nəfər ölüb, 3-ü ağır olmaqla 20 nəfər də yaralanıb.

Son zamanlar Türkiyənin böyük şəhərlərində terror aktlarının baş verməsi artıq adi hal alıb. Son 5 ayda paytaxt Ankarada 3 qanlı terror aktı baş verib. Həmin terror aktları nəticəsində onlarla insan ölüb, çoxlu sayda insan isə yaralanıb. Baş verən terror aktlarından öncə Türkiyə dövləti və kəşfiyyatı hadisələrdən xəbərdar olsa da, ancaq terror aktlarının qarşısını almaqda aciz qalıblar.

Qarşıdan turizim mövsümünün gəldiyini nəzərə aldıqda, terrorçuların böyük şəhər və turistik yerlərdə bu çirkin əməllərini törətməsi həm də Türkiyəyə gələcək turist axınının qarşısının alınması kimi də qiymətləndirilə bilər. Qeyd edək ki, Türkiyənin turizim sektoru ölkənin əsas gəlir mənbələrindən biri sayılır.

Son zamanlar Türkiyədə baş verən terror aktları, polis və kəşfiyyatın çarəsizliyi barədə politoloq, müstəqil ekspert Qabil Hüseyinli Ölkə.Az-a danışıb:

"Ötən dəfəki açıqlamamda polisdə və kəşfiyyatda müəyyən zəfiliklərin olduğunu söyləmişdim. Bununla yanaşı qarşıdakı düşmən də çox təcrübəlidir və müəyyən dövlətlərin himayəsi altında işləyir. Onar bütün məlumatları vaxtında alır və Türkiyə hökümətinin aldığı qərarları analiz edərək özlərinin fəaliyyət istiqamətini dəqiqləşdirə bilirlər.

Məsələnin belə çətin olması ondan ibarətidir ki, kürd əhalisi ölkənin iri şəhərlərində yaşayır, özü də sayları çoxdur. Belə olan tərzdə onları tapmaq müəyyən qədər çətinləşir. İstanbulda çoxlu sayda kürd yaşayır. O kürdlərin böyük bir hissəsi PKK-nın ya dəstəkçisidir, ya da ona rəğbət bəsləyir. Belə olan halda terroçular xalq içərisində ölkənin hər yerində sərbəst şəkildə gəzə bilirlər.

Polisin və kəşfiyyatın işini ağırlaşdıran əsas məsələlərdən biri də, son dövrdə Türkiyədə qadınların böyük əksəriyyətinin xüsusi başörtüsü və dini uniformalardan istifadə etməsidir. Bu hal kürdlərin də işini asanlaşdırır və kürdlər də bundan çox yaxşı istifadə edirlər. Qadınlara münasibətdə bir sıra qadağanedici tədbirlər çıxarıldığına görə kürdlər də bu metoddan çox yaxşı yararlanırlar. Canlı bombaların demək olar ki, böyük əksəriyyəti qadınlar olur. İndi görəcəksiniz ki, bu terror aktını törədən də qadın olacaq. Həmin qadınlar da bir qayda olaraq başı qapalı, dini geyim geyinir. Türkiyədə son zaman bərqərar olan şəriət qanunlarına bənzər qanunlar polis və kəşfiyyatın işini ağırlaşdırır. Terrorçu qadın örtünür, başını bağlayır, belinə və qarnına bomba bağlayır və beləcə polisin nəzarətindən yayınır.

Bunlar hamısı Ərdoğanın gətirdiyi sistemdir. Baş örtüsü, qadınların qapadılması ağı qaradan fərqləndirməyə imkan vermir. Bu hal ölkəyə çox böyük ziyan vuracaq. Bu sistem ölkənin milli şüuruna vurduğu ziyandan başqa, ölkənin təhlükəsizliyinə də çox ciddi ziyan vurur. Başını bağlayıb, dini uniforma geyinən qadın terrorçular ölkədə sərbəst dolaşır. Bəzən bu uniformalardan kişilər də istifadə edir. Ona görə ki, qapalı qadına yaxınlaşan yoxdur.

İstiqlal prospektində bomba ilə gəzən birini tapmaq o qədər də çətin olmamalıdır. Burada polis və kəşfiyyatın zəif olmasını qeyd etmək lazımdır. Bir yandan da onu bildirim ki, düşmən də çox hiyləgərdir. Partizan üsulundan istifadə edərək mübarizə aparır. Həm də bu gün İstanbulda Ərdoğanla Davudoğlunun da iştirak etdiyi mühüm tədbir keçirilir. Buna görə də polisin əsas diqqəti bura yönəldiyindən ərazidə patrulların sayı da az olub".

Qeyd edək ki, ABŞ-ın Türkiyədəki səfirliyi mart ayının 20-də Türkiyədə terror aktının ola biləcəyi barədə xəbərdarlıq etmişdi.

Səxavət Məmməd
Ölkə.Az