Həftənin icmalı
Sərhəddə öldürülən Yardımlı sakinlərinin kimliyi müəyyənləşdi
14.03.2016
Martın 13-də gecə Azərbaycan-İran sərhədində öldürülən sərhəd pozucularından ikisinin kimliyi müəyyənləşib.
Ölkə.Az APA-ya istinadən xəbər verir ki, onlar Yardımlı rayonunun Ostayir kənd sakinləri - Sadiq Teyyub oğlu Rəhimov və Əkbər Əjdər oğlu Qasımovdur. Sərhəd pozucularından 3-ü isə Banqladeş vətəndaşıdır.
"Gündəlik Teleqraf" qəzeti bağlandı
14.03.2016
Çap mediasının qeyri-populyar olduğu, kağızın qiymətinin bahalaşdığı bir məqamda “Gündəlik Teleqraf” qəzetinin nəşrinin dayandırılmasını məqbul saydıq.
Bu sözləri “Gündəlik Teleqraf” Media Qrupunun rəhbəri Aynur Camalqızı “Gündəlik Teleqraf” qəzetinin bağlanması ilə bağlı Axar.az-a açıqlamasında səsləndirib.
A.Camalqızının sözlərinə görə, hazırda bütün ölkədə idarəetmədə daha çevik mexanizmlər hazırlanır və perspektivli sahələrin inkişaf etdirilməsi prioritetə çevrilib:
Beynəlxalq Qızıl Xaç Komitəsinin (BQXK) əməkdaşları Dilqəm Əsgərov və Şahbaz Quliyevə baş çəkdi
14.03.2016
Beynəlxalq Qızıl Xaç Komitəsinin (BQXK) əməkdaşları Kəlbəcərdə ermənilər tərəfindən girov götürülən azərbaycanlılara baş çəkiblər.
BQXK-nın Azərbaycan nümayəndəliyinin ictimaiyyətlə əlaqələr şöbəsinin rəhbəri İlahə Hüseynova bildirib ki, başçəkmə martın 10-da baş tutub.
BQXK-nın nümayəndələri Dağlıq Qarabağda saxlanılan azərbaycanlılara ailələrindən məlumatlar çatdırıb, onlardan da ailələri üçün məlumat alıblar. İ. Hüseynovanın sözlərinə görə, BXQK mandatına uyğun olaraq saxlanılan şəxslərə ona görə baş çəkir ki, saxlanma şəraitini və onlarla davranışı monitorinq etsin və bu insanların ailələri ilə əlaqə saxlamasına yardımçı olsun.
Ötən ay 328 əcnəbi Azərbaycandan deportasiya edilib
14.03.2016
Ötən ay 1709 əcnəbi tərəfindən Azərbaycanda olma, habelə müvəqqəti və daimi yaşama qaydalarına əməl etmədən inzibati qanunvericiliyin tələblərinin pozulması halları müəyyənləşib.
Dövlət Miqrasiya Xidmətindən verilən məlumata görə, onlardan 13-nün Azərbaycan ərazisində müvəqqəti və ya daimi yaşamaq üçün əsas verən sənədləri itirildiyindən yenisi ilə əvəzlənib, 128 nəfərin ölkə ərazisində yaşamaları leqallaşdırılıb, 1240 əcnəbinin Azərbaycan ərazisini 48 saat ərzində tərk etməsi, 328 əcnəbinin isə inzibati qaydada ölkə hüdudlarından kənara çıxarılması barədə qərarlar qəbul edilib.
Polis Novruz bayramında gücləndirilmiş iş rejimində çalışacaq
15.03.2016
Azərbaycanın daxili işlər orqanları Novruz bayramı ərəfəsində və bayram günlərində gücləndirilmiş iş rejimində çalışacaq.
Ölkə.Az xəbər verir ki, Daxili İşlər Nazirliyinin mətbuat xidmətinin rəis müavini Ehsan Zaidov APA-ya açıqlamasında bildirib ki, bununla bağlı daxili işlər naziri, general-polkovnik Ramil Usubov müvafiq əmr imzalayıb.
Əmrə əsasən, respublikada keçiriləcək Novruz bayramı şənlikləri zamanı ictimai asayişin, qanunçuluğun və hüquq qaydasının qorunmasının, xidməti vəzifələrin yüksək səviyyədə və daha mütəşəkkil icrasının təmin edilməsi məqsədi ilə mart ayının 19-dan 28-dək DİN-in bilavasitə tabe qurumlarının, ərazi polis orqanlarının və nizami polis hissələrinin şəxsi heyəti gücləndirilmiş iş variantına keçiriləcək.
Azərbaycan və Türkiyə sürücülük vəsiqələrini qarşılıqlı tanıyıb
15.03.2016
Azərbaycan və Türkiyədə sürücülük vəsiqələri qarşılıqlı olaraq tanınacaq.
Ölkə.Az APA-ya istinadən xəbər verir ki, bununla bağlı bu gün Ankarada Türkiyə-Azərbaycan arasındakı Yüksək Səviyyəli Strateji Əməkdaşlıq Şurasının V iclasından sonra “Azərbaycan hökuməti ilə Türkiyə hökuməti arasında sürücülük vəsiqələrinin qarşılıqlı tanınması və dəyişdirilməsi haqqında” saziş imzalanıb.
Sazişi Azərbaycan baş nazirinin müavini Abid Şərifov və Türkiyənin daxili işlər naziri Efkan Ala imzalayıblar.
Alimlər qlobal piylənməyin səbəbini aşkarlayıb
15.03.2016
Almaniyanın Eksperimental Genetika İnstitutunun bir qrup aliminin araşdırmasına əsasən, piylənməyə meyilik epigenik mexanizmlər vasitəsi ilə valideynlərdən uşaqlara keçə bilər.
Ölkə.Az Trend-ə istinadən xəbər verir ki, araşdırmanın nəticəsi Nature Genetics jurnalında dərc edilib.
Öz təhqiqatlarında genetiklar piylənmə və insulin asılılığına gətirmış şəkər xəstəliyi olan siçanlar üzərində aparılmış elmi təcrübəyə əsaslanıblar.
Araşdırmaların nəticəsi göstərir ki, siçanların nəvə-nəticələri valideynlərinin eyni xəstəliklərinə meyillilikləri var. Dişi nəticələr erkəklərə nisbətən piylənməyə daha çox meyilli olublar. Erkəklərin qanında isə daha çox glükozanın atlanması müşahidə olunub.
Genetiklərın fikrincə, dünyada 1960-cı ildən geniş yayılmış şəkər xəstəliyinin səbəbi məhs epigenetik irs ola bilər.
Azərbaycanda qeydiyyatda olan narkomanların sayı azalıb
15.03.2016
Azərbaycanda son 9 ildə ilk dəfə qeydiyyatda olan narkomanların sayı azalıb.
Bu, Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının İşçi Qrupunun hazırladığı “Azərbaycan Respublikasında narkotiklərə nəzarət sahəsində 2015-ci il üçün Ölkə Məruzəsi”ndə əksini tapıb.
Keçən il Səhiyyə Nazirliyi Respublika Narkoloji Mərkəzində 2 min 118 (1331-i dispanser, 787-i profilaktik) nəfər qeydiyyatdan çıxıb, 2 min 17 nəfər narkotik istifadəçisi qeydiyyata alınıb. Beləliklə, ölkədə qeydiyyatdan olan narkomanların ümumi sayı 101 nəfər azalaraq 28 min 555 nəfər olub.
Ən çox cinayət törədilən rayonların adları açıqlandı — SİYAHI
16.03.2016
Bakı şəhərinin rayonları üzrə ən çox cinayət hadisələri Binəqdədi rayonunda qeydə alınır.
Ölkə.Az Report-a istinadən xəbər verir ki, 2014-cü ildə Bakı şəhəri üzrə cəmi 12 288 cinayət qeydə alınıb. Bu rəqəm 2013-cü ildə 10 984, 2000-ci ildə 5 539 olub.
2014-cü ildə Binəqədi rayonunda 1 504 cinayət qeydə alınıb. 2013-cü ildə bu rəqəm 1 414, 2000-ci ildə 516 olub.
Xətai rayonunda qeyd olunan il 1 344 cinayət qeydə alınıb. 2000-ci ildə bu göstərici 679 olub.
Bakı şəhərinin rayonları üzrə ən az cinayət Səbail rayonunda qeydə alınır. Belə ki, 2014-cü ildə bu rayonda 700 cinayət qeydə alınıb. 2000-ci ildə bu göstərici 531 olub.
Suraxanı rayonunda qeydə alınan cinayətlərin sayı isə sürətlə artıb. 2000-ci ildə rayonda 336 cinayət qeydə alındığı halda, 2014-cü ildə bu rəqəm 849 olub.
Eləcə də Sabunçu rayonunda 2000-ci ildə 454, 2014-cü ildə 1148 cinayət qeydə alınıb.
Nizami rayonunda 2000-ci ildə 457, 2014-cü ildə isə 1 202 cinayət qeydə alınıb.
Nərimanovda 2000-ci ildə 554, 2014-cü ildə 1 080, Nəsimi rayonunda 2000-ci ildə 731, 2014-cü ildə 1 483 cinayət qeydə alınıb. Yasamalda bu göstərici son 10 ildə 681-dən 1 325-ə yüksəlib.
MSK-dan partiyalara xəbərdarlıq
16.03.2016
Bu günə qədər 14 siyasi partiya 2015-ci il üzrə illik maliyyə hesabatını Mərkəzi Seçki Komissiyasına təqdim edib.
Ölkə.Az APA-ya istinadən xəbər verir ki, bu barədə MSK sədrinin müavini Natiq Məmmədov bildirib.
N. Məmmədov deyib ki, partiyalar qanunvericiliyə uyğun olaraq aprelin 1-ə qədər illik maliyyə hesabatlarının MSK-ya təqdim edilməsi və hesabatların dərc edilərək rəsmiləşdirilməsi prosesini başa çatdırmalıdır: “Keçən il ilk il olduğu üçün siyasi partiyaların bu sahədə fəaliyyətinin təkmilləşməsinə ehtiyac duyulurdu. Bu ildən isə partiyalar illik maliyyə hesabatlarını aprelin 1-ə qədər mütləq MSK-ya təqdim etməlidir.
Pensiyalar vaxtından əvvəl veriləcək
16.03.2016
Dövlət Sosial Müdafiə Fondu (DSMF) qarşıdan gələn Novruz bayramı ilə əlaqədar olaraq bu ilin mart ayı üzrə əmək pensiyalarının vaxtından əvvəl maliyyələşdirilməsini yekunlaşdırıb.
Fondun İctimaiyyətlə əlaqələr sektorundan verilən məlumata görə, mart ayının 15-dək respublikanın şəhər və rayonları üzrə pensiya məbləğlərinin qrafikdə nəzərdə tutulmuş müddətdən əvvəl vətəndaşların pensiya plastik kart hesablarına köçürülməsi başa çatdırılıb.
Rauf Mirqədirov bəraət istəyib
16.03.2016
Bu gün Bakı Apellyasiya Məhkəməsində jurnalist Rauf Mirqədirovun apellyasiya şikayəti üzrə məhkəmə prosesi davam etdirilib.
Ölkə.Az xəbər verir ki, APA-nın məlumatına görə, hakim Abid Abdinbəyovun sədrliyi ilə keçirilən proses qapalı olub.
Vəkil Fuad Ağayev prosesdən sonra bildirib ki, o və Rauf Mirqədirov məhkəməsən bəraət hökmü çıxarılmasını xahiş edib, dövlət ittihamçısı isə hökmün qüvvədə saxlanmasını istəyib.
Azərbaycan dünyanın ən xoşbəxt ölkələri sırasında
16.03.2016
Azərbaycan dünyanın ən xoşbəxt ölkələri sırasında 81-ci yerdə qərarlaşıb.
Ölkə.Az APA-ya istinadən xəbər verir ki, hesabat BMT nəzdində Dayanıqlı İnkişaf Məsələlərinin Həlli Şəbəkəsi və Kolumbiya Universitetinin Yer İnstitutu tərəfindən hazırlanıb.
Reytinq 157 ölkə üzrə tərtib olunub. Siyahıya ilk yerdə Danimarka, sonuncu yerdə Burundidir. Siyahıda Ermənistan 121, Gürcüstan 126-cı yerdə qərarlaşıb.
ABŞ 13-cü, Böyük Britaniya 23-cü, Fransa 32-ci, İtaliya 50-ci, Rusiya 50-ci, Türkiyə 78-ci yerdədir.
Rauf Mirqədirov azadlığa buraxıldı
17.03.2016
Bu gün Bakı Apellyasiya Məhkəməsində jurnalist Rauf Mirqədirovun apellyasiya şikayəti üzrə məhkəmə başa çatıb.
Ölkə.Az Report-a istinadən xəbər verir ki, hakim Abid Abdinbəyovun sədrliyi ilə keçirilən prosesdə qərar elan olunub.
Qərara əsasən, jurnalistə 5 il şərti həbs cəzası verilib.
O, məhkəmə zalından azadlığa buraxılıb.
Qeyd edək ki, R.Mirqədirov 2014-cü ilin aprel ayında Türkiyədə saxlanılıb. Jurnalist daha sonra Azərbaycana deportasiya olunub. O, Cinayət Məcəlləsinin 274-cü (dövlətə xəyanət) maddəsi ilə ittiham olunub.
Azərbaycanda yay vaxtına keçid ləğv olundu — RƏSMİ
17.03.2016
Azərbaycan Nazirlər Kabinetinin 17.03.2016-cı il tarixli 131 saylı Qərarına əsasən, carı ilin 27 mart tarixində (bazar günü) ölkə ərazisində yay vaxtına keçid ləğv olunur.
Ölkə.Az APA-ya istinadən xəbər verir ki, Nazirlər Kabinetinin 17.03.1997-ci il tarixli 21 saylı Qərarı qüvvədən düşmüş hesab edilir.
Qeyd edək ki, ölkəmizdə yay və qış vaxtlarına keçid bir sıra tibbi-psixoloji və sosial-mənəvi problemlərin yaranmasına və İKT sistemlərinin qəbul olunmuş beynəlxalq vaxt qrafiki ilə sinxronlaşdırılması sahəsində bəzi çətinliklərin meydana gəlməsini nəzərə alaraq, AMEA-nın Rəyasət Heyəti GMT+4 (Qrinviç vaxtı+4 saat) vaxtını əsas götürməklə Azərbaycan Respublikasında yay və qış vaxtlarına keçid praktikasının ləğv edilməsini təklif edib.
Onu da qeyd edək ki, qış və yay vaxtlarının tətbiqi barədə Nazirlər Kabineti 1997-ci ildə qərar verib. Qərara əsasən, hər il oktyabrın son bazar günündə ölkə ərazisində qış, martın son bazar günündə isə yay vaxtına keçilir.
Əfv sərəncamındakı tanınmış — Şəxslər
17.03.2016
Qeyd etdiyimiz kimi Azərbaycan Respublikasının prezidenti İlham Əliyev Novruz Bayramı münasibəti ilə bir sıra şəxsləri əfv edib.
Ölkə.az xəbər verir ki, ümumilikdə 148 nəfər müxtəlif maddələr üzrə cəzaçəkən Azərbaycan və bir neçə xarici ölkənin vətəndaşını əfv edib.
Əfv olunanların arasında ictimaiyyətin kifayət qədər yaxşı tanıdığı şəxslər, siyasətçilər və keçmiş dövlət məmurları da var.
Əfv sərəncamında Prezident Administrasiyasının keçmiş işlər müdiri Akif Muradverdiyev;
"İnsan hüquqları" klubunun rəhbəri Rəsul Cəfərov;
Jurnalist Pərviz Həşimli;
Azərbaycan Milli Dövlətçilik Partiyasının sədri Nemət Pənahlı;
Müsavat Partiyası başqanın müavinləri Tofiq Yaqublu və Yadigar Sadıqov;
Müsavatçı gənc Sirac Kərimli;
"Demokratiyanın Tədrisi Mərkəzi"nin həmtəsisçisi və sədri Anar Məmmədli;
Hüquq müdafiəçisi Taleh Xasməmmədov;
NİDA-nın üzvləri Məmməd Əzizov, Rəşadət Axundov, Rəşad Həsənov, Ömər Məmmədov;
"Talışi sədo" qəzetinin baş redaktoru Hilal Məmmədov da yer alıb.
ABŞ Azərbaycan prezidentinin əfv sərəncamını alqışlayıb
18.03.2016
ABŞ Azərbaycan prezidenti İlham Əliyevin əfv sərəncamı imzalamasını və məhkəmənin jurnalist Rauf Mirqədirovun azadlığa buraxılması barədə qərar qəbul etməsini alqışlayıb.
Ölkə.Az APA-ya istinadən xəbər verir ki, bu barədə ABŞ Dövlət Departamentinin bəyanatında bildirilir. Bəyanatda ABŞ-ın Azərbaycan hökumətinin atdığı müsbət addımı alqışladığı vurğulanır.
“Biz əlavə müsbət addımlar üzrə Azərbaycan hökuməti ilə əməkdaşlığı davam etdirmək niyyətindəyik”, - deyə bəyanatda qeyd olunur.
Qeyd edək ki, martın 17-də Azərbaycan prezidenti İlham Əliyevin imzaladığı əfv sərəncamı ilə 148 məhbus azadlığa qovuşub. Onların arasında ictimai-siyasi fəaliyyəti ilə tanınmış şəxslər də var.
Həmçinin ötən gün məhkəmə dövlətə xəyanət ittihamı ilə 6 il müddətinə azadlıqdan məhrum edilən Rauf Mirqədirovun 5 il sınaq müddəti təyin olunmaqla azadlığa buraxılması barədə qərar qəbul edib.
60 mindən çox müəllimin əmək haqları artacaq
18.03.2016
Prezident İlham Əliyevin dövlət ümumi təhsil müəssisələrində çalışan bilik və bacarıqlarının diaqnostik qiymətləndirilməsi aparılan müəllimlərin əməkhaqqının artırılması haqqında sərəncam ölkədəki müəllimlərin 40 faizinə - 60 mindən artıq müəllimə şamil ediləcək.
Ölkə.Az Trend-ə istinadən xəbər verir ki, bunu bu gün keçirilən mətbuat konfransında Təhsil Nazirliyinin maliyyə şöbəsinin müdiri Rauf Orucov deyib.
R.Orucov qeyd edib ki, “Dövlət ümumi təhsil müəssisələrində çalışan bilik və bacarıqlarının diaqnostik qiymətləndirilməsi aparılan müəllimlərin dərs yükünün və əməkhaqqının artırılması haqqında”sərəncama əsasən, müəllimlərin aylıq vəzifə maaşları 2016-cı il aprelin 1-dən orta hesabla 10 faiz artırılacaq.
Nazir: Məqsədimiz Azərbaycanı regionun əsas ticarət qovşağına çevirməkdir
18.03.2016
Son illər ərzində davam edən qlobal iqtisadi böhran, eləcə də neftin qiymətinin aşağı düşməsi, iqtisadi fəallığın və ticarət dövriyyəsinin azalması ölkəmiz üçün müəyyən çətinliklər yaratsa da, qeyri-neft sektorunun inkişafının vacibliyini artırıb, o cümlədən nəqliyyat sahəsində daha fəaliyyətin daha yüksək səviyyə keçid almasına şərait yaradıb.
Ölkə.Az APA-ya istinadən xəbər verir ki, bunu nəqliyyat naziri Ziya Məmmədov “Bakı Beynəlxalq Dəniz Ticarət Limanı” QSC-nin yaradılmasının 1 illiyinə həsr olunmuş hesabat xarakterli tədbirdə çıxışı zamanı bildirib.
Zakir Həsənov: Silahlı Qüvvələrimiz ərazi bütövlüyümüzün bərpa edilməsinə hazırdır
18.03.2016
Azərbaycanın müdafiə naziri general-polkovnik Zakir Həsənov ATƏT-in fəaliyyətdə olan sədrinin Cənubi Qafqaz üzrə xüsusi nümayəndəsi Günter Baxlerin rəhbərlik etdiyi nümayəndə heyətini qəbul edib.
Müdafiə Nazirliyinin mətbuat xidmətindən verilən məlumata görə, müdafiə naziri qonaqlara regiondakı hərbi-siyasi vəziyyət, Azərbaycan torpaqlarının Ermənistan tərəfindən işğalının davam etməsi, qaçqın və məcburi köçkünlərin mövcud problemləri, o cümlədən beynəlxalq təşkilatların münaqişənin tənzimlənməsi istiqamətində atdıqları addımların nəticəsiz qalması barədə fikirlərini bildirib.
“Ermənistanın cinayətkar, terrorçu rəhbərliyi dinc azərbaycanlı əhaliyə qarşı soyqırımı dövlət siyasəti səviyyəsində həyata keçirib. Bu gün də qoşunların təmas xəttində gərginliyin artmasında Ermənistanın kriminal hərbi-siyasi rejimi bilavasitə günahkardır. Münaqişənin beynəlxalq hüququn normaları və prinsipləri çərçivəsində, Azərbaycanın dövlət sərhədləri daxilində həllinin yeganə yolu dünya ictimaiyyətinin birgə fəaliyyəti ilə işğalçı qüvvələrin torpaqlarımızdan çıxarılmasıdır. Silahlı Qüvvələrimiz ərazi bütövlüyümüzün bərpa edilməsinə hazırdır və bu şərəfli vəzifəni yerinə yetirmək üçün kifayət qədər gücə və qüvvəyə malikdir”, - deyə nazir qeyd edib.
Azərbaycanda əcnəbilərlə ailə quranların sayı artıb
18.03.2016
Azərbaycanda əcnəbilərlə ailə quranların sayı yenidən artıb.
Ölkə.Az xəbər verir ki, Ailə, Qadın və Uşaq Problemləri üzrə Dövlət Komitəsinin İnformasiya və analitik araşdırmalar şöbəsinin müdiri Elgün Səfərov Trend-ə bildirib ki, adətən, hər il əcnəbilərlə nikaha daxil olanların sayı 2600-2700 arasında dəyişir. Yalnız 2014-cü ildə bu statistikanın azalması qeydə alınsa da, 2015-ci ildə əcnəbilərlə ailə quranların sayı yenidən artıb. Belə ki, 2012-ci ildə Azərbaycanda 2688, 2013-cü ildə 2780, 2014-cü ildə 1816, 2015-ci ildə isə 2680 nəfər əcnəbi ilə nikaha daxil olub.
E.Səfərov qeyd edib ki, Azərbaycan vətəndaşları daha çox qonşu ölkələrin - Rusiya, Türkiyə, Gürcüstan vətəndaşları ilə ailə qururlar.
Türk Dünyası Sosioloqlar Birliyinin vitse-prezidenti, Türkiyənin Üsküdar Universitetinin Sosiologiya kafedrasının müdiri, sosiologiya elmləri doktoru Əbülfəz Süleymanlı Trend-ə bildirib ki, ölkələrarası gediş-gəlişlərin artdığı, kommunikasiya texnologiyalarının sürətlə inkişaf etdiyi və qloballaşmanın vüsət aldığı müasir dövrdə qarışıq nikahların bütün dünyada artması müşahidə olunur.
Sabahdan 9 gün ardıcıl qeyri-iş günü olacaq
19.03.2016
Novruz bayramı ilə əlaqədar 9 gün ardıcıl qeyri-iş günü olacaq.
Nazirlər Kabinetinin qərarına əsasən, 2016-cı ildə 20, 21, 22, 23, 24 mart Novruz bayramıdır.
Əmək Məcəlləsinə əsasən, 20 mart bazar gününə təsadüf etdiyi üçün iş və istirahət günlərinin yerləri dəyişdiriləcək, 25 mart qeyri-iş günü olacaq. 19, 26 və 27 mart tarixləri də şənbə və bazar günlərinə təsadüf etdiyi üçün Novruz bayramında ardıcıl 9 gün – 19, 20, 21, 22, 23, 24, 25, 26 və 27 mart tarixləri qeyri-iş günüdür.
Bakı metrosunda baş verən terror aktından 22 il ötür
19.03.2016
1994-cü il mart ayının 19-da saat 13:00-da “20 Yanvar” metrostansiyasında partlayış olub. Qatarın baş vaqonuna qoyulmuş saat mexanizmli əldə düzəltmə bomba qatar stansiyada dayananda işə düşüb.
Terror aktı zamanı 14 nəfər ölüb, 49 nəfər yaralanıb. Terror aktının icraçısı Oqtay Qurbanov partlayış zamanı ölüb. Həlak olanlar arasında xalq artisti Rafiq Babayev də olub. Partlayışdan metro stansiyasının tavanı bəzi hissələrdə çöküb.
Ölkə prezidenti terror aktının araşdırılması üzrə dövlət komissiyasının yaradılması barədə fərman imzalayıb. Cinayətin törədilməsində şübhəli bilinən “Sadval” Ləzgi Milli Hərəkatının üzvləri həbs edilib.
İstintaqın nəticələrinə görə terror aktını təşkil edən və törədənlər Ermənistan xüsusi təyinatlı orqanları ilə əlaqəli idilər və hazırlığı bu ölkədə keçiblər. Terror aktı faktı üzrə 11 adam cinayət məsuliyyətinə cəlb edilib, onlardan ikisinə ölüm hökmü verilib, doqquz nəfər isə müxtəlif müddətə azadlıqdan məhrum edilib.
Azərbaycan prezidenti Novruz şənliyində iştirak edib
19.03.2016
Bakıda Azərbaycan xalqının milli bayramı - Novruz münasibətilə ümumxalq şənliyi keçirilib.
APA-nın məlumatına görə, Azərbaycan prezidenti İlham Əliyev və xanımı Mehriban Əliyeva hər il olduğu kimi, bu il də Novruz şənliyində iştirak ediblər.
Dövlət başçısı və xanımı əvvəlcə Qız qalasının qarşısındakı meydana gəliblər. Milli geyimli oğlanlar və qızlar Azərbaycan prezidentinə bayram xonçası təqdim ediblər, dövlətimizin başçısına və xanımına Novruz bayramı münasibətilə təbriklərini çatdırıblar.
Prezident İlham Əliyev Novruz tonqalını alovlandırıb.
Dövlət başçısı bayram şənliyində nitq söyləyib.
Sonra Azərbaycan prezidenti İlham Əliyev və xanımı Mehriban Əliyeva Dənizkənarı Milli Parka gəliblər. Dövlət başçısını və xanımını Novruz bayramının əsas personajları olan Kosa və Keçəl qarşılayıblar. Kosa və Keçəl prezidenti və xanımını bayram münasibətilə təbrik ediblər, dövlət başçısı ilə yumurta döyüşdürüblər.
Avtovağzalda yaranan sərnişin sıxlığına aydınlıq gətirildi
19.03.2016
18 mart 2016-cı il tarixində Bakı Beynəlxalq Avtovağzalından regionlara 621 reyslə 15 mindən çox sərnişin daşınıb ki, bu rəqəm əvvəlki illərlə müqayisədə iki-üç dəfə çoxdur. Bu gün isə Avtovağzalda səhər saatlarından indiyə kimi daşınan sərnişinlərin sayı 18 mini ötüb.
Ölkə.Az xəbər verir ki, bu barədə Nəqliyyat Nazirliyi Dövlət Avtomobil Nəqliyyatı Xidmətinin İctimaiyyətlə əlaqələr şöbəsinin rəhbəri Şəfa Mehmanqızı bildirib.
Onun sözlərinə görə, bütün ehtiyat avtobuslar hazırda müvafiq xətlər üzrə sərnişindaşımanı həyata keçirirlər. Bu dəqiqələrdə regionlara 700-dən çox avtobus yola salınsa da, hələ də sərnişin sıxlığı davam etməkdədir. Bu günkü sıxlığın ən başlıca səbəblərindən biri, sərnişin sayının (məhz bu günkü tarix üçün) fəaliyyət göstərən avtobus sayından 4-5 dəfə çox olması, həmçinin, sərnişinlərinin əksəriyyətinin biletsiz olması və regionlara səfər üçün məhz bugünkü tarixi seçmələridir. Çünki adi günlərdə 400-450 avtobusla sərnişin daşınması həyata keçirilirdi, bu gün 700-dən çox avtobus xəttə çıxarılsa da, sərnişin sayı dəfələrlə çoxdur.
