Əli Abbasov: Dövlətin büdcəsindən pul gözləməyin
“Heç kim 12 telekanal ilə kifayətlənməyəcək”.
“Teleradio” İstehsalat Birliyinə xaricdən ucuz kredit cəlb edərək ödənişli əsaslar ilə telekanalların yayımının rayon mərkəzlərində və kəndlərdə genişləndirilməsi tapşırığı verilib.
Ölkə.Az marja-ya istinadən xəbər verir ki, Rabitə və Yüksək Texnologiyalar Nazirliyində 2014-cü ilin 6 ayının yekunları ilə bağlı keçirilmiş kollegiya iclasında nazir Əli Abbasovun bildirdiyinə görə, ölkə əhalisinin yaşadığı ərazilərin 97,5%-i açıq paketlə (10-12 kanal) rəqəmli televiziya yayımı ilə təmin edilib. Amma, Azərbaycanda heç kim 12 telekanal ilə kifayətlənməyəcək:
“Ona görə “Teleradio” İB-nin ikinci bir fəaliyyəti proqramların sayını artırmaq olmalıdır. Sosial proqram paketinə (pulsuz açıq paket yayımı) daxil olan proqramların sayı 12-dən çox olarsa, bu, kabel televiziyası xidməti göstərən şirkətlərə zərbə olar. 12-dən yuxarı sayda telekanalları ödənişli əsaslar ilə artırmaq lazımdır. Onu da edirsiniz. Bu iş sürətlənməlidir”.
Nazir “Teleradio” İB-nin sədrinə tapşırıq verib ki, bu sahədə işlərin sürətləndirilməsi üçün yeni investisiya mənbələri tapılmalıdır:
“Dövlətin büdcəsindən pul gözləməyin. Sentyabr-oktyabr aylarına qədər rayonlarda və kəndlərdə ödənişli telekanalların yayımlanması üzrə layihə hazırlayıb təqdim edin. Sonra həmin layihəni müzakirə edək və onun əsasında ucuz kredit cəlb etmək üçün beynəlxalq kredit təşkilatların müraciət edək. Bu istiqamətdə iş aparmaq lazımdır. Təxminən 10 milyon manat kredit cəlb edə bilərsiniz”.
Ölkə.Az
