Sizdəki terrordur, bizdəki yox?!
"Niyə bügünkü terror aktları məhz Belçikada baş verib? Son hadisələr onu göstərir ki, Fransadakı kimi, eyni anda, eyni gündə ayrı-ayrı yerlərdə terror aktları törədilib. Və bu terror aktları Fransadan başlayıb".
Bunu Milli.Az-a açıqlamasında təhlükəsizlik və beynəlxalq məsələlər üzrə ekspert, "Baku Network" ekspert qrupunun rəhbəri, politoloq Elxan Ələsgərov bildirib.
"Bu yaxınlarda Fransanın paytaxtı Parisdə törədilən terror aktlarının təşkilində əsas şübhəli şəxs Salah Əbdüsəlam özünü "şəhid kəməri" ilə "Stad de Frans" stadionunda partlatmaq istəyirmiş. Brüsselin Molenbek kommunasında yaxalanan Salah Əbdüsəlama rəsmi ittiham elan olunub. 27 yaşlı Əbdüsəlam terror aktlarının təşkilində günahlandırılır. Əbdüsəlamla birlikdə həmçinin Monir Əhməd Alyaax və Abid.A. da terrorizmlə bağlı ittiham ediliblər. Onlar həmçinin terror təşkilatına üzvlükdə və terrorçulara kömək etməkdə günahlandırılırlar. Bu radikallar tutulandan sonra isə bugünkü terror aktları baş verdi. Demək olar ki, Belçika xüsusi qüvvələri terrorçuların ən ağrılı nöqtəsinə toxunublar. Və Fransada olan terror artıq Belçikaya çatdı.
Son xəbərlərdə Belçikadakı terror aktlarını İŞID-lə bağlamaq istəyirlər, amma bu mənə müammalı gəlir. Hal-hazırda bir siyasət yürüdülür ki, olan hadisələri qaçqınların üstünə yıxırlar, amma əslində bu dəhşəti törədən məhz Avropanın özündə yetişmiş radikal qüvvələrdir. Onlar qıraqdan gəlməyiblər, qaçqınlarla gəlməyiblər. Və bütün bu mülahizələr, guya bunu törədən qaçqınlardır, yanlışdır və məntiqsizdir. Terroru törədən qüvvələr Avropada antiislam ab-havasını yaratmaq istəyirlər. Terrorizmin mənbəyi Belçikada doğulmuş və yaşayan insanlardır.
Hal-hazırda Belçikada iqtidar vakuumu var - bu isə terroru törədən ikinci amildir. Ölkədə flamandlar və valonlar bir dövlətin işində anlaşa bilmirlər. Yadımdadır, bu yaxınlarda Belçikanın Flamand regionunun yerli qanunverici orqanının bir qrup üzvü Azərbaycan Respublikasının Ermənistan tərəfindən işğal olunmuş ərazilərinə qanunsuz səfər edib. Bu səfərdə iştirak etmiş regional deputatlar Belçika daxilində və onun hüdudlarından kənarda radikal separatizmi dəstəkləyən baxışlara malikdirlər. Hətta onların bəziləri etnik və dini zəmində nifrəti təşviq edən mövqeləri ilə fərqlənirlər. Yəni bu deputatlar siyasi oyunbazlıq edirlər, separatçıları dəstəkləyirlər. Yəni terroru pisləyənlər erməni terrorizmini dəstəkləyirlər! Amma burada sual vermək lazımdır - bu terrorizmin arasında fərq varmı?
Fransa, Belçika, digər Avropa ölkələri bildirirlər ki, vətandaşları terror təşkilatlarına qoşulurlar. Bu ölkələr Suriyada terrorçuları dəstəkləyirdilər, indi isə bunun nəticəsini görürlər.
Azərbaycan terrorizmin qurbanı olub. Bu yaxınlarda paytaxtımızda keçirilən IV Qlobal Forumda bu haqda danışılıb. Terrorizmin milləti, mənsubiyyəti yoxdur. Nə vaxta kimi siyasi oyunlar olacaq, terrorizm Avropada davam edəcək.
