Rusiyaya meyvə-tərəvəz sata bilməyənlər danışdı
Rusiyanın ABŞ və Avropa İttifaqının sanksiyalarına qarşı atılan cavab addımları Azərbaycana aqrar sənaye dövləti kimi potensial baza rolunu vəd edir.
Heç kimə sirr deyil ki, keçmiş ittifaq dönəmində Rusiya və digər ittifaq dövlətlərinin bazarını tərəvəz və bostan məhsulları ilə Azərbaycan təmin edib. Ötən əsrin son onilliyinə kimi cənub bölgəsi ümumittifaq bostanı funksiyasını daşıyıb. İndi isə yaranan bazar problemi əkin sahələrinin kəskin azalmasına səbəb olub.
Fermer Füzuli Hüseynovun sözlərinə görə, "Hər il Rusiya bazarlarından gəlib bizdən məhsul alırdılar. Bu il isə onların sayı azaldı. Demək olar ki, biz xarici bazara məhsul sata bilmədik".
Fermer Cəmil Əzimov isə deyir ki, “Məhsulumuzu Rusiya bazarına çıxarda bilmirik. Bakıda satmışıq, gündə 5 “KamAZ” Rusiya bazarına mal verirdik. İndi heç bir “KamAZ” da olmur”.
Cənub bölgəsinin ən iri tərəvəzçilk rayonu olan Masalıda bu il 3500 hektara yaxın sahədə tərəvəz və bostan bitkiləri əkilib. Yığılan 60 minə yaxın bostan məhsulunun 17 mini istisna olmaqla qalanının satışı demək olar ki, daxili bazarda reallaşıb. Bu bazarda isə həm tələbat, həm qiymətlərin aşağı olması fermerləri razı salmır.
Fermer Hüseynağa Nəcəfov qeyd edir ki, "Son illər tərəvəz məhsulunun Rusiyaya göndərilməsi elə bil daşa dəyib almırlar. Yolda maneələr var, gömrük tarifləri yüksəkdir, vergilər alırlar. Rusiyaya məhsul qəbul edilmədiyinə görə, biz məhsullarımızı yerli bazarda satmaq məcburiyyətində qalırıq”.
Cənublu fermerlər hesab edir ki, "Rusiya bazarının açılması tərəvəzçiliyi cənub bölgəsində yenidən aparıcı sahəyə çevirə bilər, çünki digər sahələrə nisbətən tərəvəzçilk qat-qat rentabellidir". (ANS TV)
Ölkə.Az
