Qeyri-adi soyğun
Məşhur Hollivud filmindən nümunə götürdü, mağazanı bu cür soymağa qərar verdi.
ATV Xəbər bildirir ki, Avstraliyanın Kvinslend ştatında bir oğru qeyri-adi soyğun gerçəkləşdirərək hər kəsi təəccübləndirib. Elektron Texnika məhsullarının satıldığı mağazanın hər tərəfinin xəbərdarlıq siqnalı ilə təchiz olunduğunu düşünən soyğunçu, bu tələyə düşməmək üçün mağazaya tavandan enməyə qərar verib.
Hər bir detalı yadda saxlasa da, kameraları unudan avstraliyalı törətdiyi cinayətin anbaan lentə alınmasına mane ola bilməyib. Kəndirlə mağazaya enən, bu vaxt ayağını da zədələyən soyğunçu, kassadakı pulları götürüb, gəldiyi yolla, kəndirlə yuxarı dırmanaraq aradan çıxıb.
Görüntüləri izləyən polislər oğrunun axtarışına başlayıb. Hələlik, bu axtarışlar heç bir nəticə verməyib. Mediada nümayiş olunan görüntülər isə ciddi müzakirələrə yol açıb. Sakinlər oxşar soyğunun qeydə alınmaması üçün qabaqlayıcı tədbirlərin görülməsini tələb edir.
